ސްކޮޓްލެންޑާއި އިންގްލެންޑުގެ ޚާއްސަ މެޗެއް މިއަންނަ އަހަރު
އިންގްލެންޑާއި ސްކޮޓްލެންޑު އެންމެ ފަހުން ބައްދަލުކުރީ 2021 ވަނަ އަހަރު އޮތް ޔޫރޯ 2020ގައި
ޔޫރޯ 2020 ގައި އިންގްލެންޑާއި ސްކޮޓްލެންޑް ބައްދަލުކުރި މެޗުގެ ތެރެއިން
ސްކޮޓްލެންޑާއި އިންގްލެންޑު ވާދަކުރާ ޚާއްސަ ފުޓްބޯޅަ މެޗެއް މިއަންނަ އަހަރަށް ތާވަލުކޮށްފިއެވެ.
މި މެޗު ތާވަލުކޮށްފައިވަނީ އެދެޤައުމު ވާދަކުރި ފުރަތަމަ މެޗަށް 150 އަހަރު ފުރޭ މުނާސަބަތާއި ގުޅުވައިގެންނެވެ. މި ދެޓީމު އެންމެ ފުރަތަމަ ވާދަކުރީ 1872 ވަނަ އަހަރުއެވެ. މެޗު ކުޅުނީ ސްކޮޓްލެންޑްގެ ގްލާސްގޯގައި އޮތް ކްރިކެޓް ސްޓޭޑިއަމްއެއްގައެވެ. އެމެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ. މިއީ ދުނިޔޭގެ ފުޓްބޯޅައިގެ ތާރީޚުގައި އެންމެ ފުރަތަމަ ކުޅުނު ބައިނަލްއަގްވާމީ މެޗުކަމަށް ފީފާއިން ވަނީ ފާހަގަކޮށްފައެވެ.
އިންގްލެންޑާއި ސްކޮޓްލެންޑު އެންމެ ފަހުން ބައްދަލުކުރީ 2021 ވަނަ އަހަރު އޮތް ޔޫރޯ 2020ގައެވެ. އިންގްލެންޑުގެ ވެމްބްލީ ސްޓޭޑިއަމްގައި ކުޅުނު މި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ.
މިއަންނަ އަހަރަށް ތާވަލުކުރެވިފައިވާ މެޗު ކުޅުމަށް ހަމަޖެހިފައި އޮތީ ސްކޮޓްލެންޑްގެ ހެމްޕްޑެންގައެވެ. ކުރިއަށް ތާވަލުކުރެވިފައި އޮތް މެޗާއި ގުޅޭގޮތުން ސްކޮޓްލެންޑުގެ ކޯޗު ސްޓީވް ކްލާކް ބުނީ އެމެޗުގައި އަމިއްލަ ރަށުގައި، މި ތާރީޚީ މެޗުން މޮޅުވުމަކީ އޭނާ އަދި ޓީމަށްވެސް ލިބޭނެ ވަރަށް ބޮޑު އުފަލެއް ކަމަށެވެ. އިންގްލެންޑުގެ ކޯޗު ގަރެތު ސައުތުގޭޓު ބުނީ ސްކޮޓްލެންޑާއި އިންގްލެންޑު ކުރިމަތިލާ ކޮންމެ މެޗަކީވެސް ޚާއްސަ މެޗެއް ކަމަށެވެ.
