އިންޑިޔާގެ ގުޖްރާތު ސްޓޭޓްގައި 140 އަހަރަށް ވުރެ ގިނަދުވަސްވެފައިވާ ބްރިޖެއް ވެއްޓި ސަތޭކައަށް ވުރެ ގިނަ މީހުން މަރުވި ހާދިސާ ހިނގި ސަރަހައްދަށް އެ ގައުމުގެ ބޮޑުވަޒީރު ނަރެންދްރަ މޯދީ ޒިޔާރަތްކުރައްވައިފިއެވެ.
މޯދީ ވަނީ އެ ސަރަހައްދުގައި ހަރަކާތްތެރިވާ އޮފިޝަލުންގެ މަސައްކަތް ބައްލަވާލައްވާފައެވެ. މި ހާދިސާ ހިނގި ސަރަހައްދުގައި މީހުން ހޯދުމަށް އަދިވެސް ޑައިވަރުން ދަނީ ކެނޑިނޭޅި މަސައްކަތްކުރަމުން ކަމަށް އެ ގައުމުގެ މީޑިއާ ރިޕޯޓުތައް ބުނެއެވެ. އެ ގައުމުގެ ފުލުހުން މި މައްސަލަ ސީރިއަސް މައްސަލައެއްގެ ގޮތުގައި ބަލާ ތަހުގީގު ކުރިއަށްގެންދާއިރު މި މައްސަލަ އާ ގުޅުން ހުރި ބައެއް މީހުން ފުލުހުންގެ ބެލުމުގެ ދަށަށް ގެންގޮސްފައިވެއެވެ. މި މައްސަލައިގައި 9 މީހުން ހައްޔަރުކޮށްފައިވާ ކަން ހާމަކޮށްފައިވާއިރު އޭގެ ތެރޭގައި ބްރިޖުގެ މަރާމާތުގެ މަސައްކަތް ހަވާލުކޮށްފައިވާ ކުންފުނީގެ މުވައްޒަފުން ހިމެނެއެވެ.
މި ބްރިޖަކީ 1870 ވަނަ އަހަރު، އިނގިރޭސިންގެ އިސްތިއުމާރުގެ ދަށުގައި އިންޑިއާ އޮތް ދުވަސްވަރު އިމާރާތްކޮށްފައިވާ ބްރިޖެކެވެ. އެ ބްރިޖު އަލުން ހުޅުވާފައި ވަނީ މަރާމާތުކުރަން ބަންދުކޮށްފައި އޮތުމަށް ފަހު ނިމިދިޔަ ހަފްތާގެ ތެރޭގައެވެ.
މި ހާދިސާގައި މަރުވި މީހުންގެ ތެރޭގައި އަންހެނުންނާއި ކުޑަކުދިން އަދި އުމުރުން ދުވަސްވީ މީހުން ގިނަ އަދަދަކަށް ހިމެނޭ ކަމަށް މިޑިއާ ރިޕޯޓުތައް ބުނެއެވެ. މި ބްރިޖުގެ މަސައްކަތް ކުރި ކުންފުންޏަށް ގިނަ ތުހުމަތުތަކެއް ދަނީ ކުރެވެމުންނެވެ. އޭގެ ތެރޭގައި ފިޓްނެސް ސެޓްފިކެޓް ހޯދަން ބޭނުންވާ ވަރަށް މަސައްކަތުގެ ކޮލިޓީ ނުހިފެހެއްޓުމާއި ގާނޫނާއި ގަވާއިދުތަކާއި ޚިލާފަށް ގިނަ ކަންތައްތަކެއް ކުރުން ހިމެނެއެވެ.
