ފުޓުބޯޅަ އިން ރިޓަޔާވާން ބޭނުންވަނީ ރެއާލް މެޑްރިޑުގައި ހުރެ ކަމަށް ޓޯނީ ކްރޫސް ބުނެފިއެވެ.
ޖަރުމަނުގެ މިޑްފީލްޑަރު މިހެން ބުނީ އޭނާގެ ކުރިމަގާ ގުޅޭ ގޮތުން ވާހަކަ ދައްކަމުންނެވެ. ރެއާލްގައި މިހާރު ވެސް މުހިންމު ރޯލެއް އަދާކުރަމުން އަންނަ ކްރޫސް ބުނީ، ކުޅުމުން އޭނާ ރިޓަޔާވާނީ ކޮން ދުވަހަކު ކަމެއް ބުނަން ނޭންގޭ ކަމަށާއި، ނަމަވެސް ރިޓަވާނީ ރެއާލްގައި ހުރެ ކަމަށެވެ. މީގެ އިތުރުން އޭނާ ބުނީ ރެއާލް ނޫން އެހެން ކުލަބަކަށް ކުޅެން އޭނާ ބޭނުންނުވާ ކަމަށެވެ.
ރެއާލާ އެކު ކްރޫސް ހަދާފައިވާ އެއްބަސްވުމުގެ މުއްދަތު ހަމަވާނީ 2023 ވަނަ އަހަރުއެވެ. އެންމެ ފަހުން ކްރޫސް އޭނާގެ އެއްބަސްވުން އައު ކުރީ 2019 ވަނަ އަހަރުއެވެ. އޭނާ ބުނީ ކުރިމަގާ ގުޅޭ ގޮތުން އަންނަ އަހަރު ކުލަބާ ވާހަކަ ދެއްކުމަށް ރާވާފައިވާނެ ކަމަށެވެ. އެހެންކަމުން މުސްތަޤުބަލާ މެދު ގޮތެއް ނިންމާނީ އަންނަ އަހަރު ކަމަށް ކްރޫސް ވަނީ ބުނެފައެވެ.
ޖަރުމަނުގެ ބަޔާން މިއުނިކް ދޫކޮށް ކްރުސް ރެއާލަށް ބަދަލުވީ 2014 ވަނަ އަހަރުއެވެ. އުމުރުން މިހާރު 32 އަހަރުވެފައިވާ ކްރޫސް ވަނީ މިހާތަނަށް ރެއާލަށް 381 މެޗު ކުޅެދީ 25 ލަނޑު ޖަހާފައެވެ. ރެއާލާ އެކު އޭނާ ވަނީ ގިނަ ކާމިޔާބީތަކެއް ވެސް ހޯދާފައެވެ. ޔޫރަޕުގެ ބޮޑެތި މުބާރާތްތައް ހިމެނޭ ގޮތުން އޭނާ ވަނީ ޖުމުލަ 17 ތައްޓެއް ކާމިޔާބުކޮށްފައެވެ. އޭގެ ތެރޭގައި ޔުއެފާ ޗެމްޕިއަންސް ލީގު ހަތަރު ފަހަރު ކާމިޔާބުކުރުން ހިމެނެއެވެ.
ކްރޫސް އާ ގުޅޭ ގޮތުން ރެއާލްގެ ކޯޗު ކާލޯ އަންޗެލޮޓީ ދާދި ފަހުން ބުނީ އޭނާ ކުލަބުގައި މަޑުކުރަން އެދޭ ކަމަށެވެ. އަންޗެލޮޓީ ވަނީ ރެއާލްގައި ކްރޫސް ދައްކަމުން އަންނަ ކުޅުމާއި، އޭނާގެ މަސައްކަތަށް ތައުރީފުކޮށްފައެވެ.
