އަންނަ އަހަރު ކުނި ނައްތާލުމުގެ ނިޒާމުތައް ގާއިމުކުރުމަށް 630.2 މިލިއަން ރުފިޔާ
މޯލްޑިވްސް ކްލީން އެންވަޔަރަމަންޓް ޕްރޮޖެކްޓާއި ގްރޭޓަރ މާލެ ވޭސްޓް ޓު އެނާރޖީ ޕްރޮޖެކްޓަށް އަންނަ އަހަރުގެ ބަޖެޓްގައި 399.2 މިލިއަން ރުފިޔާ ހިމަނައިފައިވޭ
ތިލަފުށީގައި ހިނގަމުންދާ ވޭސްޓް މެނޭޖްމަންޓް ޕްރޮޖެކްޓްގެ މަސައްކަތް
ރާއްޖޭގެ އެކި ކަންކޮޅުތަކުގައި ކުނި ނައްތާލުމުގެ ނިޒާމުތައް ގާއިމްކުރުމަށް އަންނަ އަހަރުގެ ބަޖެޓްގައި 630.2 މިލިއަން ރުފިޔާ ހިމަނާފައިވާނެކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހަޅުއްވަމުން ފިނޭންސް މިނިސްޓަރު ވިދާޅުވީ މީގެ ތިރީހަކަށް އަހަރު ކުރިން ފެށިގެން ކުނި އަންދަމުން އަންނަ ތިލަފުށީގައި ކުނި އެންދުން މިސަރުކާރުން މިވަނީ ނިމުމަކަށް ގެނެސްފައިކަމަށެވެ. އަދި މި ނިޒާމާއި އެއްގޮތަށް އައްޑޫ ސިޓީގައި ކުނި ނައްތާލުމުގެ ނިޒާމް ގާއިމްކުރުމުގެ މަޝްރޫއު ދަނީ ހިނގަމުން ކަމަށް މިނިސްޓަރު ވިދާޅުވިއެވެ. ތިމާވެށި ހިމާޔަތްކުރުމަށް، ރައްކާތެރިކަމާއެކު ކުނި ނެއްތޭނެ ނިޒާމު ގިނަ ރަށްތަކެއްގައި ގާއިމްކުރުމުގެ މަސައްކަތަށް މެދުނުކެނޑި ކުރިޔަށްދާކަމަށް މިނިސްޓަރު ވިދާޅުވިއެވެ.
ރައްކާތެރިކަމާއެކު ކުނިނައްތާލުމަށް އެންމެ ބޮޑު ހޭދައެއް ކުރެވެނީ ގްރޭޓަރ މާލެ އެންވަޔަރަމަންޓަލް އިމްޕްރޫވްމަންޓް އެންޑް ވޭސްޓް މެނޭޖްމަންޓް ޕްރޮޖެކްޓަށެވެ. އަދި އެކި ފަންޑުތަކުން ޚަރަދުކޮށްގެން އަތޮޅުތަކުގައި ކުރިއަށްދާ މޯލްޑިވްސް ކްލީން އެންވަޔަރަމަންޓް ޕްރޮޖެކްޓާއި ގްރޭޓަރ މާލެ ވޭސްޓް ޓު އެނާރޖީ ޕްރޮޖެކްޓަށް އަންނަ އަހަރުގެ ބަޖެޓްގައި 399.2 މިލިއަން ރުފިޔާ ހިމަނައިފައިވެއެވެ.
މީގެ އިތުރުން، ހިނގަމުންދާ މަޝްރޫއުތަކަށާއި އެކި އަތޮޅުތަކުގައި ހިންގުމަށްރާވާފައިވާ ސްމޯލް ސްކޭލް ވޭސްޓް ޓު އެނާރޖީ ޕްރޮޖެކްޓް ފޭސް 2 އަށް ކަނޑައަޅާފައިވާ 59.3 މިލިއަން ރުފިޔާ ހިމަނައިފައިވެއެވެ. އަދި ގްރީން ފަންޑުން 168.5 މިލިއަން ރުފިޔާ ޚަރަދުކޮށްގެން އެކި ރަށްރަށުގައި ކުނި މެނޭޖްކުރާނެ ފެސިލިޓީތައް ގާއިމުކުރުމުގެ މަސައްކަތްތައް މިހާރުވެސް ދަނީ ހިނގަމުންނެވެ.
އަންނަ އަހަރު ތިމާވެށި ރައްކާތެރިކުރުމަށް އަންނަ އަހަރުގެ ބަޖެޓްގައި ތިމާވެށި ރައްކާތެރިކުރުމަށް 2 ބިލިއަން ރުފިޔާ ވަނީ ކަނޑައަޅާފައެވެ.
ތިމާވެށި ރައްކާތެރިކުރުމުގެ ދާއިރާއިން ކުނި ނައްތާލުމުގެ އިތުރުން ދެން އެންމެ ބޮޑު ޚަރަދެއް ހިނގާނެކަމަށް ލަފާކޮށްފައިވަނީ ގޮނޑުދޮށް ހިމާޔަތްކުރުމުގެ މަޝްރޫޢުތަކަށެވެ. މިހާރު ހިނގަމުންދާ، ގޮނޑުދޮށް ހިމާޔަތްކުރުމުގެ މަޝްރޫއުތަކަށް 304.6 މިލިއަންއާއި އަލަށް ފަށާ މަޝްރޫއުތަކަށް 8.3 މިލިއަން ރުފިޔާ ވަނީ ކަނޑައަޅާފައެވެ. ގޮނޑުދޮށް ހިމާޔަތްކުރުމަށް 412.9 މިލިއަން ރުފިޔާ ވަނީ ކަނޑައަޅާފައެވެ.
ހިނގަމުންދާ އިއާދަކުރަނިވި ހަކަތައިގެ މަޝްރޫއުތަކަށް އޭޝިއަން ޑިވެލޮޕްމަންޓް ބޭންކުންނާއި ވޯލްޑް ބޭންކުން ހިލޭ އެހީގެ ގޮތުގައި 82.7 މިލިއަން ރުފިޔާ ކަނޑައެޅިފައިވެއެވެ. އަދި ހިނގަމުންދާ އެކްސެލަރޭޓިންގ ރިނިއުބަލް އެނާރޖީ އިންޓަގްރޭޝަން އެންޑް ސަސްޓެއިނަބަލް އެނަރޖީ ޕްރޮޖެކްޓާއި ޕްރިޕައިރިންގ އައުޓަރ އައިލެންޑް ފޯރ ސަސްޓެއިނަބަލް އެނަރޖީ ޑިވެލޮޕްމަންޓް ޕްރޮޖެކްޓަށް ލޯނުން ޚަރަދުކުރާގޮތަށް 282.7 މިލިއަން ރުފިޔާ ހިމަނައިފައިވެއެވެ.
މީގެއިތުރުން ސަރުކާރުން ހާއްސަ އަހައްމިޔަތުކަމެއް ދީގެން ރާއްޖޭގެ ހުރިހާ ރަށެއްގައިވެސް ފެނާއި ނަރުދަމާގެ ނިޒާމު ޤާއިމުކުރުމުގެ މަޝްރޫޢޫތައް ދަނީ ކުރިއަށް ގެންދަމުންނެވެ. މިއަހަރުގެ ބަޖެޓުގައި މިހާރު ހިނގަމުންދާ އަދި އަލަށް ފަށާ ފެނާއި ނަރުދަމާގެ މަޝްރޫއުތަކަށް 567.2 މިލިއަން ރުފިޔާ ކަނޑައެޅިފައިވެއެވެ. މީގެ ތެރޭގައި، އިންޑިއާ ސަރުކާރުގެ ލައިން އޮފް ކްރެޑިޓް ފެސިލިޓީން 34 ރަށެއްގައި މިހާރު ހިނގަމުންދާ ފެނާއި ނަރުދަމާގެ މަޝްރޫއުތަކަށް 191.3 މިލިއަން ރުފިޔާ އާއި، އޮފިޑާއި، ކުވައިތު ފަންޑާއި އައިޑީބީގެ ލޯނުން ކުރިއަށް ގެންދާ މަޝްރޫއުތަކަށް 112.9 މިލިއަން ރުފިޔާ ހަމަޖެހިފައިވެއެވެ.
ޑޮމެސްޓިކް ބަޖެޓުންނާއި މޯލްޑިވްސް ގްރީން ފަންޑުން ޚަރަދުކޮށްގެން އެކި ރަށްރަށުގެ ފެނާއި ނަރުދަމާގެ ނިޒާމު ގާއިމުކުރުމުގެ އެކި މަޝްރޫއުތަކަށް 305.8 މިލިއަން ރުފިޔާ ކަނޑައެޅިފައިވެއެވެ. މީގެ ތެރޭގައި އެކި ރަށްރަށުގައި އަލަށްފަށާ މަޝްރޫއުތައް ހިމެނެއެވެ.
ބަޖެޓް ހުށަހަޅުއްވަމުން މިނިސްޓަރު ވިދާޅުވީ ރާއްޖޭގެ 158 ރަށެއްގައި ފެނާއި ނަރުދަމާގެ މަޝްރޫއުތައް ހިންގުމަށް ބަޖެޓުގައި ޖުމްލަ 643.8 މިލިއަން ރުފިޔާ ހިމެނިފައިވާނެކަމަށެވެ. ފެނާއި ނަރުދަމާގެ އަމަލީ މަސައްކަތްތައް ހިނގަމުންނުދާ އެއްވެސް ރަށެއް 2023 ގައި ނޯންނާނެކަމަށްވެސް މިނިސްޓަރު ވިދާޅުވިއެވެ.
