ސަލްމާން މިސްކިތުގައި ހުރި ބައެއް މައްސަލަތައް ހައްލުކުރުމަށް ތުރުކީ އިން ޓީމެއް ރާއްޖެ އަންނަނީ
30 އޮކްޓޯބަރު 2022 | އާދީއްތަ 09:43މިސްކިތުގެ ސައުންޑާއި އޭސީއަށް ވަނީ މައްސަލަ ދިމާވެފައި
ސަލްމާން މިސްކިތް ކައިރީގައި ގިނަ އަދަދެއްގެ ސައިކަލު ޕާކު ކޮށްފައި
ކިންގް ސަލްމާން މިސްކިތުގައި ހުރި ބައެއް މައްސަލަތައް ހައްލުކުރުމަށް ހޯމަ ދުވަހު ޓީމެއް ރާއްޖެ އައުމަށް ހަމަޖެހިއްޖެއެވެ.
ސަލްމާން މިސްކިތުގައި ތާޅަފިލިތަކުގެ އަޑު މަޑު ކަމުންނާއި ކަރަންޓުގެ ބައެއް މައްސަލަ ދިމާވެގެން އާންމުން ވަނީ އެކަމާއި ޝަކުވާކޮށްފައެވެ. އެގޮތުން ސަލްމާން މިސްކިތަށް އެތައްހާސް ބަޔަކު ހުކުރު ނަމާދަށް ދިޔައިރު ވެސް އެ މިސްކިތުގައި އޭސީ ނިއްވާފައި ހުރުމުން އެކަމުގެ ޝަކުވާ ވަނީ ކޮށްފައެވެ.
މިކަމާއި ގުޅިގެން ރާއްޖެއެމްވީއަށް މައުލޫމާތު ދެއްވަމުން އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވީ އޭސީގައި މައްސަލަ ޖެހިގެން ތުރުކީވިލާތުން އޭސީ ހެދި މީހުންގެ ޓީމު ހޯމަ ދުވަހު ރާއްޖެ އަންނާނެ ކަމަށެވެ. އަދި އޭސީ އާއި ސައުންޑު އެޅުވުމަށް އެމީހުންނާއި ވާހަކަ ދައްކައިގެން މައްސަލައަށް ވަގުތީ ހައްލެއް ވެސް ހޯއްދަވާނެ ކަމަށެވެ.
މީގެއިތުރުން މިނިސްޓަރު ވިދާޅުވީ ސައުންޑު ސިސްޓަމަށާއި އޭސީއަށް ދައުލަތުން ވަރަށް ބޮޑު ޚަރަދެއް ކޮށްފައިވާ ކަމަށާއި ދާއިމީ ހައްލަކަށް ދިޔުމަށް އެޓީމާ އެކު މަސައްކަތް ކުރައްވާނެ ކަމަށެވެ.
ކިންގް ސަލްމާން މިސްކިތް ހުޅުވައި ނަމާދު ކުރަން ފަށާފައިވަނީ 1 އޭޕްރިލް 2022 ގައެވެ. އެއީ ސައޫދީ އަރަބިއްޔާގެ އެހީގައި އަޅާފައިވާ މިސްކިތަކަށްވުމުން، މިސްކިތް ރަސްމީކޮށް ހުޅުވަން ނިންމާފައިވަނީ އެ ގައުމުގެ ވަފުދެއް ރާއްޖެ އައުމުންނެވެ. އެ ވަފުދު ރާއްޖެ ނައިސް ގިނަ ދުވަސްވުމުގެ ސަބަބުން މިސްކިތުގެ މަސައްކަތް ނިމުމަށްފަހު ވެސް ގިނަ ދުވަސްތަކެއް ވަންދެން އެތަން ނުހުޅުވި ހުއްޓެވެ.
ކިންގް ސަލްމާން މިސްކިތަކީ ސައޫދީ ސަރުކާރުން ބޮޑު ހޭދައެއް ކޮށްގެން ބިނާކޮށްފައިވާ މިސްކިތަކަށްވާއިރު, އެ މިސްކިތް ރަސްމީކޮށް ހުޅުވުމުގެ ރަސްމިއްޔާތުގައި ބައިވެރިވުމުގެ ޝައުގުވެރިކަން ސައޫދީ ސަރުކާރުން ވަނީ ފާޅުކޮށްފައެވެ.
ސަލްމާން މިސްކިތް ހުޅުވިތާ ހަތް މަސް ދުވަސްވެފައިވާއިރު އިސްލާމިކް މިނިސްޓަރު ވިދާޅުވީ ސައުދީ ސަރުކާރުގެ ވަފްދު އެތަން ރަސްމީކޮށް ހުޅުވުމަށްޓަކައި ރާއްޖެ އަންނާނެ ދުވަހެއް އެނގިވަޑައިނުގަންނަވާ ކަމަށެވެ.
ސަލްމާން މިސްކިތުގެ ފުރަތަމަ ފަންގިފިލާ އާއި ދެވަނަ ފަންގިފިލާގައި ޖުމުލަ 4000 މީހުންނަށް ނަމާދު ކުރެވޭއިރު, ތިންވަނަ ފަންގިފިލާގައި 40 ޖާގައިގެ 4 ކްލާސްރޫމާއި، 5 ސެމިނަރ ރޫމް ހުންނާނެއެވެ. ހަތަރުވަނަ ފަންގިފިލާގައި ލައިބްރަރީއަކާއި، 350 މީހުންގެ ޖާގައިގެ އޮޑިޓޯރިއަމެއް ހުރެއެވެ.
