މޮންޒާގެ ޑިފެންޑަރު ޕަބްލޯއަށް ވަޅިން ހަމަލާދީފި!
އަނިޔާއިން ރަނގަޅުވުމަށް ޕަބްލޯ ވަނީ ހުކުރު ދުވަހު އޮޕަރޭޝަނެއް ކޮށްފައި
ޕަބްލޯ މާރީ
އިޓާލިއަން ލީގުގައި ވާދަކުރާ މޮންޒާގެ ޑިފެންޑަރު ޕަބްލޯ މާރީއަށް ވަޅިން ހަމަލާދީފިއެވެ.
މިލާންގެ ސުޕަމާކެޓެއްގައި ޕަބްލޯ ހުއްޓާ އޭނާއާއި އެތަނުގައި ތިބި އެހެން ހަތަރު މީހަކަށް ވަނީ ވަޅިން ހަމަލާ ދީފައެވެ. މި ހަމަލާގައި އަނިޔާވި ސުޕަމާކެޓުގެ އެއް މުވައްޒަފަކު ވަނީ މަރުވެފައެވެ. މީގެ އިތުރުން އަނިޔާވީ ސުޕަމާކެޓުގައި ވިޔަފާރިކުރަން ތިބި ކަސްޓަމަރުންތަކެކެވެ.
މި ހަމަލާގައި ލިބުނު އަނިޔާއިން ރަނގަޅުވުމަށް ޕަބްލޯ ވަނީ ހުކުރު ދުވަހު އޮޕަރޭޝަނެއް ކޮށްފައެވެ. އޮޕަރޭޝަން ކުރީ މިލާންގެ ނިގުއާޑާ ހޮސްޕިޓަލުގައެވެ. ޕަބްލޯގެ އޮޕަރޭޝަނަށް ފަހު އަލުން ދަނޑަށް ނުކުތުމަށް ދެމަސް ނަގާނެކަމަށް ރިޕޯޓުތައް ބުނެއެވެ.
2020 ވަނަ އަހަރު އާސެނަލްއާއި ގުޅުނު ޕަބްލޯ މިހާރު މޮންޒާއަށް ކުޅެނީ ލޯނު އުސޫލުންނެވެ. އޭނާ ވަނީ މިހާތަނަށް މޮންޒާގައި އަށް މެޗު ކުޅެ އެއް ލަނޑު ޖަހާފައެވެ.
