މުފްތީ މެންކްގެ ދަރުސް މިރޭ ކާނިވާ ސަރަހައްދުގައި
ޓީވީއާއި ރޭޑިއޯ އަދި ސޯޝަލް މީޑިއާ މެދުވެރިކޮށް ދަރުސްތައް ބެލޭނެ
މުފްތީ މެންކް ރާއްޖެއަށް ވަޑައިގަތުމުން ވެލާނާ އިންޓަރނެޝަނަލް އެއަރޕޯޓުން އިސްލާމިކް މިނިސްޓަރު އޭނާއަށް މަރުހަބާ ވިދާޅުވަނީ
މިނިސްޓްރީ އޮފް އިސްލާމިކް އެފެއާޒްގެ ދަޢުވަތަކަށް މިހާރު ރާއްޖެ ވަޑައިގެން އުޅުއްވާ މުފްތީ މެންކްގެ ދަރުސް ހުކުރު ދުވަހުގެ ރޭ (28 އޮކްޓޯބަރު 2022) މާލޭގައި އޮންނާނެކަމަށް އިސްލާމިކް މިނިސްޓްރީން ބުނެފިއެވެ.
މިނިސްޓްރީން މައުލޫމާތު ދޭ ގޮތުގައި ކާނިވާ ސަރަހައްދުގައި އޮންނަ މި ދަރުސްގެ މައުޟޫއަކީ ޑިޕްރެޝަން، އެންޒައިޓީ އަދި ސްޓްރެސްއެވެ. އެގޮތުން އާންމުކޮށް ހުޅުވާލައިގެން ކުރިއަށް ގެންދާ މި ދަރުސް އޮންނާނީ ރޭގަނޑު 8.45 ގައިކަމަށް މިނިސްޓްރީން ބުނެއެވެ.
މިނިސްޓްރީން މައުލޫމާތުދޭ ގޮތުގައި މުފްތީ މެންކްގެ އިތުރު ދަރުސްތައް މި ހަފްތާ ބަންދުގައި ކުރިއަށް ދާނެއެވެ. އެގޮތުން ފުވައްމުލައް ސިޓީއާއި އައްޑޫ ސިޓީ އަދި ހުޅުމާލޭގައި މި ދަރުސްތައް ކުރިއަށް ގެންދިޔުމަށް ވަނީ ހަމަޖެހިފައެވެ.
މުފްތީ މެންކްގެ މި ދަތުރުފުޅުގައި ދަރުސް ދެއްވުމަށް ހަމަޖެހިފައިވާ ތަންތަނާއި ވަގުތުތައް ވެސް މިނިސްޓްރީން އާންމުކޮށްފައިވެއެވެ. އެގޮތުން ފުވައްމުލައް ސިޓީއަށް ބަލާއިރު، އޮކްޓޯބަރު 29 ވަނަ ދުވަހު ޙާފިޒް އަޙްމަދު ސްކޫލުގައި ދަރުސް ބޭއްވުމަށް ވަނީ ހަމަޖެހިފައެވެ.
މީގެ އިތުރުން، އައްޑޫ ސިޓީގައި އޮކްޓޯބަރު 30 ވަނަ ދުވަހު ދަރުސް ބޭއްވުމަށް ހަމަޖެހިފައިވާއިރު، މި ދަރުސް އޮންނާނީ ސިޓީ ސްކޮޔަރގައިކަމަށް މިނިސްޓްރީން ބުނެއެވެ.
އަދި ހުޅުމާލެއަށް ބަލާއިރު، އޮކްޓޯބަރު 31 ވަނަ ދުވަހު ސިންތެޓިކް ޓްރެކްގައި ދަރުސް އޮންނާނެކަން މިނިސްޓްރީން ފާހަގަ ކުރެއެވެ. މިއިން ކޮންމެ ތަނެއްގައި ވެސް ދަރުސް އޮންނާނީ އެ ދުވަހެއްގެ ރޭގަނޑު 8:45 ގައެވެ.
މި ދަރުސްތަކަށް ވަޑައިނުގެންނެވޭ ފަރާތްތަކަށް ޓީވީއާއި ރޭޑިއޯ އަދި ސޯޝަލް މީޑިއާ މެދުވެރިކޮށް ދަރުސްތައް ބައްލަވާ، އަޑުއެއްސެވޭނެ ފުރުސަތު ވެސް ލިބިގެންދާނެކަމަށް މިނިސްޓްރީން ބުނެއެވެ.
ތަފާތު މައުޟޫޢުތަކަށް މި ދަރުސްތައް ކުރިއަށް ގެންދިއުމަށް ހަމަޖެހިފައިވެއެވެ.
