ޓެކްސް ނަގަން ފެށުމުގެ ކުރިން އަހަރު ދުވަހުގެ މުއްދަތެއް ދިނުމަށް ގެސްޓް ހައުސް އެސޯސިއޭޝަނުން އެދިއްޖެ
އަހަރު ދުވަހުގެ މުއްދަތެއް ދިނުމަށް ގެސްޓްހައުސް ތަކުން ވަނީ އެދިފައި
ހުޅުމާލެ ގެސްޓްހައުސް
ޓެކްސް ނެގުން ލަސްކޮށްދިނުމަށް ގެސްޓްހައުސް އެސޯސިއޭޝަނުން އެދިއްޖެއެވެ.
ފަތުރުވެރިކަމުގެ މުދަލާއި ހިދުމަތުގެ އަގުން ޓެކްސް ނެގުމާއި ގުޅޭގޮތުން މުޅި މަޖިލީހުގެ ކޮމިޓީއަށް ބުދަ ދުވަހު ވަނީ ގެސްޓް ހައުސް އެސޯސިއޭޝަންގެ ފަރާތުން ފައިނޭންސްޝަލް ކޮންޓްރޯލަރ ހަސަން އަލިމަނިކު އަދި އެކްސްކޯ މެންބަރ އަހުމަދު ވަހީދު ހާޒިރުކޮށްފައެވެ.
ސަރުކާރުގެ ފަރާތުން ޓެކްސް ބޮޑުކުރުމަށް ހުށަހަޅާފައިވާ ބިލާއިގުޅޭގޮތުން މެންބަރުން ކުރެއްވި ސުވާލުގެ ޖަވާބުގައި ގެސްޓްހައުސް އެސޯސިއޭޝަންގެ ބޭފުޅުންވަނީ ޓެކްސް ބޮޑުކުރަން އޮތް ތާރީހާއި ގުޅޭގޮތުން ކަންބޮޑުވުން ފާޅުކުރައްވާފައެވެ. އެގޮތުން މިހާރު ގިނަ ތަންތަން ވިއްކާ ނިމިފައިވާ ކަމަށާއި، މީގެ ތެރޭގައި ގެސްޓްހައުސްއާއި ރިސޯޓްތައް ވެސް ހިމެނޭ ކަމަށް ވިދާޅުވިއެވެ. އަދި ޖެނުއަރީން ފެށިގެން ވިއްކާފައި ހުރި މުއްދަތާއި އެދޭތެރެއަށް ޓެކްސް ނެގޭއިރު، ވަރަށް ބޮޑު އުނދަގޫތަކެއް ޓުއަރ އޮޕަރޭޓަރުންނަށް ދިމާވަނެކަން ވަނީ ފާހަގަކުރައްވާފައެވެ. އަދި ބައެއް ބޭފުޅުން ބުކިންތައް އެއްކޮށް ވިއްކާފައިވާ ކަމަށާއި، އެދޭތެރެއިން ޓެކްސް ނެގުން އެއީ އެންމެ ރަނގަޅުގޮތްތޯ ވަނީ ސުވާލު އުފައްދަވާފައެވެ.އެއާއެކު ގެސްޓްހައުސް އެސޯސިއޭޝަނުން ވަނީ ޓެކްސް ނެގުން ކުޑަކޮށް ލަސްކޮށްލަން އެދިވަޑައިގަންނަވާފައެވެ.
މީގެ އިތުރުން ގެސްޓްހައުސްތަކާއި ރިސޯޓްތަކުން ނަގާ ޓެކްސްގެ މިންވަރު ތަފާތުކޮށްލުން އެދިވަޑައިގެންފައިވެއެވެ.
ގެސްޓްހައުސް އެސޯސިއޭޝަންގެ ބޭފުޅުން ވިދާޅުވީ ޓެކްސް ނެގުމުގެ މައްސަލައެއް ނެތް ކަމަށެވެ. އަދި ސަރުކާރުގެ ހަރަދު ރަނގަޅު ކުރުމަށްޓަކައި އެކަންކުރައްވަން ޖެހޭނެކަމަށް ގަބޫލުކުރައްވާ ކަމަށާއި، އެހެންނަމަވެސް މިއީ އެންމެ ރަނގަޅު ވަގުތުތޯ އެއީ ކުރަންޖެހޭ ސުވާލު ކަމަށެވެ. ޓެކްސް ނަގަންޖެހޭ ކަމަށާއި، ރައްޔިތުންނަށް ހިދުމަތް ދެވޭނީ ޓެކްސް ނަގައިގެން ކަމަށް ވެސް ގަބޫލުކުރައްވާ ކަމަށް ގެސްޓްހައުސް އެސޯސިއޭޝަންގެ ބޭފުޅުން ވިދާޅުވިއެވެ.
ގެސްޓްހައުސް އެސޯސިއޭޝަންގެ ބޭފުޅުން ވިދާޅުވެފައިވަނި ޓީޖީއެސްޓީގެ ބަދަލުގައި ބިޒްނަސް ޕްރޮފިޓް ޓެކްސްއެއް ނަގައިފިއްޔާ ރަނގަޅުވާނެ ކަމަށެވެ. އެހެންނަމަވެސް މިވަގުތަކީ ޓެކްސް ނަގަން އެންމެ ރަނގަޅު ވަގުތުތޯ، އަދި އެކަމާ ވިސްނާލުމަށްފަހު އަހަރު ދުވަހުގެ މުއްދަތެއް ދިނުމަށް ގެސްޓްހައުސް އެސޯސިއޭޝަނުން ވަނީ އެދިވަޑައިގެންފައެވެ.
