ސިޔާސީ ޕާޓީތަކުގެ ގާނޫނަށް އިލެކްޝަންސް ކޮމިޝަނުން ހުށަހަޅާފައިވާ އިސްލާހުތަކާ މެދު ގިނަ ކަންބޮޑުވުންތަކެއް އެބަހުރި ކަަމަށް މޯލްޑިވިއަން ޑިމޮކްރެޓިކް ޕާޓީ އެމްޑީޕީ އާއި ޖުމްހޫރީ ޕާޓީ (ޖޭޕީ) އިން ބުނެފިއެވެ.
ހޯމަ ދުވަހު ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ސިޔާސީ ޕާޓީތަކުގެ ގާނޫނަށް އިލެކްޝަންސް ކޮމިޝަނުން ހުށަހަޅާފައިވާ އިސްލާހުތަކާ މެދު މަޝްވަރާ ކުރުމަށް އިލެކްޝަންސް ކޮމިޝަނާއި ސިޔާސީ ޕާޓީތަކުގެ އިތުރުން އެޓަރނީ ޖެނެރަލްގެ އޮފީހުގެ ބޭފުޅުން ވަނީ ހާޒުރުކޮށްފައެވެ. އެ ކޮމިޓީގައި ވާހަކަދައްކަވަމުން އެމްޑީޕީގެ ޑެޕިއުޓީ ޗެއާޕާސަން އަދި ކޮންގްރެސް ކޮމިޓީގެ މުގައްރިރު އިބްރާހިމް ވަހީދު (އިބުރޭ) ވިދާޅުވީ އިލެކްޝަންސް ކޮމިޝަނުން ބައެއް ގަވާއިދުތަކަށް ބަދަލު ގެންނަވަރުން ޕާޓީ ރަނގަޅަށް ހިންގަން ވެސް ބައެއް ފަހަރު އުނދަނގޫވާ ކަމަށެވެ. އެހެންކަމުން ސިޔާސީ ޕާޓީތަކުގެ ޤާނޫނުގައި ސިޔާސީ ޕާޓީތައް ހިންގާ ބެލެހެއްޓުމުގެ ބައިގައި ޕާޓީތަކުން އަމަލުކުރަން ވާނީ ގާނޫނާއި ގަވާއިދުތަކަށް ކަމަށް އޮތުމުގެ ބަދަލުގައި ގާނޫނަށް އަމަލުކުރަން ޖެހޭ ގޮތަށް އޮތުން އެންމެ ރަނގަޅުކަމަށް ފެންނަ ކަމަށް އޭނާ ވިދާޅުވިއެވެ. އެ ވާހަކަތަކާއި ގުޅިގެން އިލެކްޝަންސް ކޮމިޝަނުން ބުނީ ގަވާއިދުތަކަކީ ޤާނޫނުތަކުގައި ނެތް ކަންކަން އިތުރަށް ތަފްސީލްކޮށްދެ ކަމަކަށް ވާއިރު ޤަވާއިދުތަކަށް ތަބާ ނުވާގޮތަށް އޮތުމަކީ ގޮންޖެހުމަކަށް ވާނެ ކަމަށެވެ.
ސިޔާސީ ޕާޓީތަކުގެ ގާނޫނަށް އިލެކްޝަންސް ކޮމިޝަނުން ހުށަހަޅާފައިވާ އިސްލާހުތަކުގެ ތެރެއިން ޚިޔާލު ފާޅުކުރުމުގެ މިނިވަންކަން ހަނިވާގޮތަށް ހުރި ބައެއް ކަންކަން ވެސް އެމްޑީޕީ އިން ވަނީ ފާހަގަކޮށްފައެވެ. ސިޔާސީ ޕާޓީތައް ހިންގާ ބެލެހެއްޓުމުގެ ދަށުން ފާހަގަކޮށްފައިވާ ކަންކަމުގެ ތެރޭގައި ޚިޔާލު ފާޅުކުރެވޭނީ އިސްލާމް ދީނާއި ޚިލާފު ނުވާގޮތަށް ކަމަށް އޮތް އޮތުމަކީ ފުރިހަމަ އަށް ބަލައިގަންނަ ކަމެއް ކަަމަށް އެމްޑީޕީ އިން ބުނެއެވެ. އެހެންނަމަވެސް ޤާނޫނު އަސާސީ އާއި ޚިލާފު ނުވާގޮތަށް ޚިޔާލު ފާޅުކުރުން ބައްޓަންކުރަން ވާނެ ކަމަށް ބުނެފައިވާއިރު ސިޔާސީ ޕާޓީތަކުގެ މަގްސަދަކީ ވެސް ޤާނޫނުތަކުގައި ހުރި ނުރަނގަޅު ކަންކަން ފާހަގަކޮށް އެކަންކަން އިސްލާކުރަން ވާހަކަދެއްކުން ކަމަށް އިބްރާހިމް ވަހީދު ވިދާޅުވިއެވެ. އޭނާގެ އެ ވާހަކަ އަށް ޖޭޕީގެ ސެކްރެޓަރީ ޖެނެރަލް އަލީ އާރިފް ވަނީ ތާއީދުކުރައްވާފައެވެ. އޭނާ ވިދާޅުވީ ގާނޫނު އަސާސީގެ 27 ވަނަ މާއްދާއިން ލިބޭ ޚިޔާލުފާޅުކުރުމުގެ މިނިވަންކަން ހަނިކޮށްގެން ނުވާނެ ކަމަށާއި، އެ ހައްގު ގެއްލުވާ ނުލެވޭނެ ކަމަށެވެ. އަދި އެ ހައްގު ހަނިވާގޮތަށް އެއްވެސް ޤާނޫނެއް ނުވަތަ ގަވާއިދެއް ނުހެދޭނެ ކަމަށް ވެސް އޭނާ ވިދާޅުވިއެވެ.
ޕާޓީތަކުން މި މޭރުމުން ވާހަކަދެއްކެވުމުން އިލެކްޝަންސް ކޮމިޝަނުން ބުނީ އެފަދަ އިސްލާހެއް ހިމަނަން ނިންމީ ޤާނޫނާއި ޤަވާއިދުތަކާއި ޚިލާފުވުމުގެ ފުރުސަތު ޕާޓީތަކަށް ނުދިނުމަށް ކަމަށެވެ. އެގޮތުން ކޮވިޑް-19އިގެ ބަލިމަޑުކަން އޮތް ހާލަތުގައި ވެސް އެއްވެ މުޒާހަރާ ކޮށްފައިވާ ކަަމަށާއި އެއީ އެ ހާލަތުގައި ކުރެވޭނެ ކަމެއް ނޫން ކަމަށް އީސީ އިން ފާހަގަކުރިއެވެ. އެހެންކަމުން ގާނޫނާއި ގަވާއިދުތަކާއި ޚިލާފު ނުވާގޮތަށް ޚިޔާލު ފާޅުކުރެވިދާނެ ކަަމަށް ލިޔެފައި ވަނީ އެ މަގްސަދުގައި ކަަމަށް އީސީއިން ބުންޏެވެ.
އެކަމާއި ގުޅިގެން ޕާޓީތަކުން ވަނީ އެފަދަ ކަންކަމަށް ޚާއްސަކޮށް، ޚާއްސަ ހާލަތެއް ދިމާވެއްޖެ ނަމަ އަމަލުކުރާނެ ގަވާއިދެއް ނުވަތަ އުސޫލެއް އެކުލަވާލެވިދާނެ ކަމަށެވެ. މިނިވަން މުއައްސަސާތަކުގެ ކޮމިޓީގެ މުގައްރިރު ރޮޒޭނާ އާދަމް ވަނީ ޚިޔާލު ފާޅުކުރުމުގެ މިނިވަންކަން އޮތުމާއި، ގާނޫނާއި ގަވާއިދާއި ޚިލާފަށް އަމަލުކުރަން ޕާޓީތަކަށް ފުރުސަތު ލިބޭ ގޮތަށް އޮތުމާއި އެއީ ދެކަމެއް ކަަމަށެވެ. ސިޔާސީ ޕާޓީގެ ތެރެއިން ވާހަކަދެކެވި ޚިޔާލު ފާޅުކުރަން ފުރުސަތު ނުލިބޭ ގޮތަށް ޤާނޫނު އެކުލަވާ ނުލެވޭނެ ކަމަށް އޭނާ ފާހަގަކުރެއްވިއެވެ.
މީގެ އިތުރުން ސިޔާސީ ޕާޓީތަކުގެ ދަރަންޏަށް ވަކި ފަރުދަކު ޒިންމާވާ ގޮތަށް އިސްލާހު ގެނައުމަކީ އެމްޑީޕީ އިން ތާއީދުކުރާ ގޮތެއް ނޫން ކަމަށް އެ ޕާޓީ އިން ވަނީ ބުނެފައެވެ. އެއަށް ވުރެ ބޮޑަށް އިލެކްޝަންސް ކޮމިޝަނަށް ޕާޓީތައް ޒިންމާދާރުކުރެވޭނެ ގޮތެއް ހޯދުން މުހިންމު ކަމަށް އެ ޕާޓީ އިން ބުނެއެވެ. އެ ބަދަލުގެ ސަބަބުން ޕާޓީތަކަށް އޮންނަ ފުރުސަތު ހަނިވެގެންދާނެ ކަަމަށް ވެސް އޭނާ ފާހަގަކުރެއްވިއެވެ. ޖޭޕީ އިން ވެސް ވަނީ އެ އިސްލާހަށް ތާއީދު ނުކުރާކަން ފާހަގަކޮށްފައެވެ. އިލެކްޝަންސް ކޮމިޝަނުން ވަނީ ޕާޓީތައް ދަރަންޏަށް ޒިންމާކުރުވުމުގެ މަރުހަލާ ވަރަށް ދަތިކަން ފާހަގަކޮށްފައެވެ.
