ޑްރަގް ޓްރެފިކްކޮށްގެން މަނީ ލައުންޑަރގެ ދައުވާ ކުރާ ފުރަތަމަ މައްސަލަ - ޑީއެންއޭ އެނޭލިސިސް އާއި މެދު ދިފާއުގެ އުނދަނގޫ ސުވާލުތަކެއް
އެއްމިލިއަން ފަސްލައްކައަށް ވުރެ ގިނަ ފައިސާ ފުލުހުން ހޯދާފައި ވަނީ 12 ޖަނަވަރީ 2021 ވަނަ ދުވަހު
ކްރިމިނަލް ކޯޓު
މަސްތުވާތަކެތި ޓްރެފިކް ކުރުމުގެ މައްސަލައެއްގައި މަނީ ލޯންޑަރިންގެ ކުށުގެ ދައުވާކުރާ ފުރަތަމަ މައްސަލައިގެ ޑީއެންއޭ އެނަލިސިސް ހެދި ފަރާތާއި ދިފާއީ ވަކީލުން އުނދަނގޫ ސުވާލުތަކެއް ކުރިމަތި ކުރުވައިފިއެވެ.
މަސްތުވާތަކެތި އެތެރެކޮށް އެތަކެތި ޓްރެފިކްކުރާކަމަށް ތުހުމަތުކުރެވުނު މައްސަލާއާއި ގުޅިގެން މޯލްޑިވްސް ޕޮލިސް ސަރވިސްއިން މާލޭގެ 04 ގެއެއް ބަލައިފާސްކޮށް ހިންގި އޮޕަރޭޝަންގައި އެއްމިލިއަން ފަސްލައްކައަށް ވުރެ ގިނަ ފައިސާ ފުލުހުން ހޯދާފައި ވަނީ 12 ޖަނަވަރީ 2021 ވަނަ ދުވަހުއެވެ. މި ފައިސާތަކަކީ ގދ. ތިނަދޫ، ރަންގަލް، ހަސަން ލޫތުއާއި، ހުޅުމާލެ ފްލެޓް ނަންބަރު 01-ޖީ-45، ހަސަން ރަޝީދުގެ އަދި ތ. ތިމަރަފުށި، ވައިޓްރޯސް، އިސްމާއީލް ޝަރީފްއާއި، މއ. ހަސްލަތު، ޝަނިޔާ އިބްރާހީމްގެ އަތުން ހޯދާފައިވާ ފައިސާތަކެކެވެ.
މޯލްޑިވްސް ޕޮލިސް ސަރވިސްއިން އެފަދަ އޮޕަރޭޝަނެއް ހިންގާފައި ވަނީ، މި މައްސަލައިގައި ތުހުމަތުކުރެވޭ މީހުން އިތުރު ބައެއްގެ ބައިވެރިވުމާއި އެކު ދިވެހިރާއްޖެއަށް މަސްތުވާތަކެތި އެތެރެކޮށް އެތަކެތި ބޭނުންކުރުމާއި، އެތަކެތި ގެންގުޅެ އެތަކެތި ޓްރެފިކްކުރާކަމަށް ތުހުމަތުކުރެވޭތީއެވެ. އެ އޮޕަރޭޝަންގައި ފުލުހުން ވަނީ ގިނަ އަދަދެއްގެ މަސްތުވާތަކެތި އަތުލައިގަނެފައެވެ.
މި މައްސަލައިގައި ތުހުމަތު ކުރެވޭ މީހުންގެމައްޗަށް ދައުވާތައް ކުރުމަށް 18 މާރޗު 2021 ދުވަހު ކްރިމިނަލް ކޯޓަށް ވަނީ ހުށަހަޅާފައެވެ. ޕީޖީ އިން ވިދާޅުވީ މި މައްސަލާގައި ފުލުހުން ބަލައިފާސްކުރި ތަންތަނުން ޖުމްލަ 1،542،675ރ (އެއްމިލިއަން ފަސްލައްކަ ސާޅީސް ދެހާސް ހަސަތޭކަ ހަތްދިހަ ފަހެއް) ރުފިޔާ ފެނިފައިވާ ކަމަށެވެ. އަދި މި މައްސަލައިގެ ތަހުގީގުގައި ކުށްކޮށްގެން ހޯދާފައިވާކަމަށް ބެލެވޭ ގިނައަދަދެއްގެ ފައިސާ، މި މައްސަލާގައި ދައުވާލިބޭ މީހުންގެ އެކައުންޓްތަކާއި، އެމީހުންނާ ގުޅުންހުރި އެކައުންޓްތަކުގައި ދައުރުކޮށްފައިވާކަން ހޯދިފައިވާ ކަަމަށް ޕީޖީން ބުނެއެވެ.
އާދިއްތަ ދުވަހު ބޭއްވި އަޑު އެހުމުގައި ޑީއެންއޭ އެނަލިސިސް އާއި މެދު ސުވާލު ކުރުމަށް ދެ ފަރާތެއް ހާޒިރުކުރުމަށް ހަމަޖެހިފައި އޮތް ނަމަވެސް ހާޒިރުވެފައި ވަނީ އެންމެ ފަރާތަކުންނެވެ. އޭނާ އާއި ސުވާލުކުރަން މި މައްސަލައިގައި ތުހުމަތު ކުރެވޭ މީހުންގެ ދިފާއީ ވަކީލުންނަށް ފުރުސަތު ދިނުމުން ވަކީލުން ވަނީ މި މައްސަލައިގައި ޑީއެންއޭ ނެގި ގޮތާއި، އެހެން ހެކި އެއްކުރުމާއި، ތަހުލީލު ކުރުމުގެ މަރުހަލާ ކުރިއަށް ދިޔަ ގޮތާއި މެދު ގިނަ ސުވާލުތަކެއް ކުރިމަތިކުރުވާފައެވެ. އެގޮތުން ލެބޯޓްރީ ކޮލިޓީ ކޮންޓްރޯލް ކުރޭތޯ ދިފާއީ ވަކީލް ވަނީ ސުވާލު އުފައްދަވާފައެވެ. އަދި ޑީއެންއޭ ނެގުމުގެ މަރުހަލާގައި އެހެން މީހަކު ހެކި އެއްކޮށްފައިވާނެތޯ ވެސް ސުވާލު ކުރައްވާފައިވެއެވެ. އެ ސުވާލުތަކަށް ޖަވާބުދެއްވަމުން ޑީއެންއޭ އެނަލިސިސް ހެއްދެވި ފަރާތުން ވަނީ މައްސަލައިގެ ހެކި ނަންގަވާފައި ވަނީ އޭނާ ކަމަށާއި އެ މަސައްކަތް އެހެން މީހަކު ކޮށްފައި ނުވާނެ ކަމަށް ވިދާޅުވެފައެވެ. އަދި ލެބޯޓްރީގެ ކޮލިޓީ ކޮންޓްރޯލް މަސައްކަތްކުރާ ކަމަށް ވެސް އޭނާ ވިދާޅުވިއެވެ.
މި މައްސަލައިގައި ތ. ތިމަރަފުށި، ވައިޓްރޯސް، އިސްމާއީލް ޝަރީފްގެ މައްޗަށް ޑައިމޯފިން ޓްރެފިކްކުރުމާއި ކެނެބިސް ޓްރެފިކް ކުރުމުގެ އިތުރުށް މަނީ ލޯންޑަރިންގ އަދި ޑައިމޯފިން ބޭނުންކުރުމާއި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދައުވާ ވަނީ އުފުލާފައެވެ. އަދި ކ. މާލެ، މއ. ހަސްލަތު، ޝާނިޔާ އިބްރާހީމްގެ މައްޗަށް އުފުލާފައިވަނީ ޑައިމޯފިން ޓްރެފިކްކުރުމާއި މަނީ ލޯންޑްރިންގ އަދި ޑައިމޯފިން ބޭނުންކުރުމުގެ ދައުވާއެވެ. މި މައްސަލައިގައި ދައުވާކޮށްފައިވާ، ހުޅުމާލެ ފްލެޓް ނަންބަރު 01-ޖީ-45 ހުޅުމާލެ، ހަސަން ރަޝީދުގެ މައްޗަށް ޕީޖީން ދައުވާ އުފުލާފައިވަނީ ޑައިމޯފިން ޓްރެފިކްކުރުމާއި ކެނެބިސް ޓްރެފިކް ކުރުމާއި މަނީ ލޯންޑަރިންގ އާއި މަސްތުވާއެއްޗެއް ބޭނުންކުރުމުގެ ދައުވާއެވެ. ގދ. ތިނަދޫ، ރަންގަލް، ހަސަން ލޫތުގެ މައްޗަށް އުފުލާފައިވާ ދައުވާތަކުގެތެރޭގައި ޑައިމޯފިން ޓްރެފިކްކުރުމާއި ކެނެބިސް ޓްރެފިކް ކުރުން، މަނީ ލޯންޑަރިންގ އަދި ޑައިމޯފިން ބޭނުންކުރުން ހިމެނޭ އިރު ޅ. ހިންނަވަރު، ސުވާސާގެ، މުހައްމަދު އަފްލާހް އަބްދުﷲގެ މައްޗަށް ޕީޖީން އުފުލާފައިވަނީ ޑައިމޯފިން ޓްރެފިކްކުރުމުގައި ބައިވެރިވުމުގެ ކުށުގެ ދައުވާއެވެ.
