ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ ސެލްފް އެލެވޭޓިންގ ޕްލެޓްފޯމް (އެސްއީޕީ) ވިލިމާލޭ ފަރަށް އެރި މައްސަލައިގައި ބްރިޖުގެ މަސައްކަތް ކުރަމުންދާ އެފްކޮންސް ކުންފުންޏާމެދު ވަކި ގޮތަކަށް އަމަލުކުރުމަށް ފިއްތުމެއް ނެތްކަމަށް އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އިން ބުނެފިއެވެ.
އީޕީއޭގެ ޑިރެކްޓަރ ޖެނަރަލް އިބްރާހީމް ނައީމް ރާއްޖެއެމްވީއަށް މައުލޫމާތުދެއްވަމުން ވިދާޅުވީ، އެފްކޮންސްއާމެދު ފިޔަވަޅުއެޅުމަށް ގޮންޖެހުމެއް ނެތްކަަމަށާއި، އެ މައްސަލައިގައި އަޅަންޖެހޭ ފިޔަވަޅެއް އަޅާނެކަމަށެވެ. އެފްކޮންސްއަކީ އިންޑިއާގެ ކުންފުންޏަކަށްވުމުން ސަރުކާރުން އެފްކޮންސްއަށް ފިޔަވަޅުއަޅަން ޖެހިލުންވާކަމަށް ބުނެ، ސަރުކާރާއި ކަމާބެހޭ ފަރާތްތަކަށް އިދިކޮޅު ފަރާތްތަކުން ދަނީ ފާޑު ކިޔަމުންނެވެ.
އެހެންނަމަވެސް ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވަނީ، ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ ސެލްފް އެލެވޭޓިންގ ޕްލެޓްފޯމް (އެސްއީޕީ) ވިލިމާލޭ ފަރަށް އެރި މައްސަލައިގައި ބްރިޖުގެ މަސައްކަތް ކުރަމުންދާ އެފްކޮންސް ކުންފުންޏާމެދު ވަކި ޚާއްސަ އުސޫލަކުން އަމަލުކޮށްފައި ނުވާނެކަމަށެވެ. ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި، މި މައްސަލައިގައި ބޮޑެތި ގެއްލުންތަކެއް ވެފައިވާއިރު، އެފްކޮންސްއާމެދު ފިޔަވަޅު ނާޅައި ލަސްވަނީ ކީއްވެތޯ ނޫސްވެރިއަކު ވަނީ ސުވާލު ދަންނަވާފައެވެ. އަދި އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އިން މި މައްސަލައިގައި އެކުލަވާލި ރިޕޯޓު ބަލައިނުގަނެ، އެފްކޮންސްއިން ވަނީ އަމިއްލައަށް ދިރާސާއެއް ކުރުމަށް އެދިފައެވެ. އެ ދިރާސާއަށް ދިން މުއްދަތު މިހާރު ހަމަވެފައިވާތީ، އެފްކޮންސްއަށް އެހާ ގިނަ ފުރުސަތުތަކެއް ލިބެނީ ކީއްވެތޯ އެ ނޫސްވެރިޔާ ވަނީ ސުވާލުދަންނަވާފައެވެ.
އެކަމާގުޅިގެން މިއުވާން ވިދާޅުވީ، އެފްކޮންސްއާމެދު ތަފާތުކުރުމެއް ސަރުކާރުން ނުގެންގުޅޭކަަމަށެވެ. އަދި އެ މައްސަލައިގައި އީޕީއޭއިން ބަލަންޖެހޭ ކަންކަން ބެލުމަށްފަހު ފިޔަވަޅުއެޅުމުގެ ފުރިހަަމަ އިޚްތިޔާރު އެ އިދާރާއަށް އޮންނާނެކަމަށް މިއުވާން ވިދާޅުވިއެވެ.
ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ ސެލްފް އެލެވޭޓިންގ ޕްލެޓްފޯމް (އެސްއީޕީ) ފަރަށް އެރީ އޮގަސްޓްމަހުގެ ތެރޭގައެވެ. އެ މައްސަލައިގައި އީޕީއޭއިން އެކުލަވާލި ދިރާސާ ބަލައިނުގަނެ، އަމިއްލަ ދިރާސާއެއް ކުރަން އެފްކޮންސްއިން ފުރުސަތަކަށް އެދުމުން އީޕީއޭއިން ވަނީ އެކަަމަށް ފުރުސަތު ދީފައެވެ. އެފްކޮންސްއަށް ދިރާސާކުރަން ދިން މުއްދަތުގައި އެ މަސައްކަތް ކުރިއަށްނުގޮސް އޮތީ މޫސުން ގޯސްވުމުންކަމަށް އެ ކުންފުނިން ބުނެއެވެ.
