ފެންބޮޑުވާ މަގުތަކަށް ފިލިޕީންސްގެ ސައިކަލް ޓެކްސީ ޑްރައިވަރުންގެ އިންޤިލާބީ ޙައްލު

މޫސުމީ ގޮތުން އަންނަ ނޭދެވޭ ބަދަލުތަކާ ގުޅިގެން ބޮޑެތި ގޮންޖެހުންތަކެއް ގިރާ ކުރަން ޖެހިފައިވާ އަދުގެ ދުނިޔޭގައި، ހިތްވަރު އެލުވާލުމެއް ނެތި، ހާލަތަށް އަހުލުވެރިވުމުގައި ލާމަސީލު މިސާލެއް ދައްކަމުންދާ އެއް ބަޔަކީ ފިލިޕީންސްގެ ސައިކަލް ޓެކްސީ ޑްރައިވަރުންނޭ ދެންނެވުމަކީ، އެހެން މީހުންނަށް ކުރެވޭ ބޭ އިންސާފެކޭ ނުދެންނެވޭނެއެވެ.

ގަދަވިއްސާރާގައި މަގުތަކުގައި ކޯރުހެދިފައިވާ ދަރަޖައަށް ފިލިޕީންސްގައި ފެންބޮޑުވެފައި ވާ އިރު، އުޅަނދަށް ގެއްލުމެއް ވެދާނެތީ ނުވަތަ އުޅަނދު ޗަކަ ވެދާނެތީ ޕާކު ކޮށްފައި ބޭއްވުމުގެ ބަދަލުގައި، ފިލިޕީންސްގެ ސައިކަލް ޓެކްސީ ޑްރައިވަރުން ހޯދީ އިންޤިލާބީ ހައްލެކެވެ. މަގުތަކުން ފެން ހިންދުމަކީ ވަކި ބައެއްގެ ޒިންމާއެކޭ ގޮވާ އަޑުގަދަކޮށް، އެހެން މީހެއްގެ ބޮލަށް ޒިންމާގެ ފޫޅުކަނޑައިގެން ތިބުމުގެ ބަދަލުގައި، އެ މީހުން ހޯދީ، ފެންގަނޑުގެ ތެރޭގައިވެސް މަސައްކަތް މެދުކަނޑާނުލާ ކުރިއަށް ގެންދެވޭނެ ގޮތެކެވެ. ޚިދުމަތް ހޯދާ މީހުންނަށްވެސް ތަކުލީފެއް ނުޖައްސާ ވޭތޯއެވެ.

ބޮޑުވި ފެންގަނޑާއެކު، ފިލިޕީންސްގެ ސައިކަލް ޓެކްސީ ޑްރައިވަރުން، އެމީހުންގެ ސައިކަލް ޓެކްސީތައް އުފުލާލީ ބިމުން މައްޗަށެވެ. އެކި ކަހަލަ ބާ ދަގަނޑުތައް ބޭނުންކޮށްގެންނެވެ.

ބައެއް ސަރަޙައްދުތަކުގައި ކަކޫތާ ފެން ހުރިއިރު އަނެއް ބައި ސަރަޙައްދުތަކުގައި އުނަގަނޑާ ހިސާބަށް ފެންގަނޑު ބޮޑުވެފައި އޮތުމުން، ސައިކަލް ޓެކްސީތައް އުފުލާލީ މީޓަރެއް ހާ އުހަށެވެ. ނުވަތަ 3 ފޫޓެއްހާތަން މައްޗަށެވެ. މޫސުމީ ގަދަ ވިއްސާރައިގެ ދުވަސްވަރު ފިލިޕީންސްއަށް ކުރިމަތިލާން ޖެހޭ ތޫފާންތަކުގައި ބޮޑުވާ ފެންގަނޑު، ބައެއް ފަހަރު 2 މީޓަރަށްވެސް އުފުލޭ ފަހަރު އާދެއެވެ.

ވެރިރަށް މެނީލާގެ 37 ކިލޯމީޓަރު އުތުރުން އޮންނަ ހެގޮނޯއީ އަވަށަކީ ފެންބޮޑުވުމުގެ މައްސަލަ އިންތިހާއަށް ކުރިމަތިވާ އަވަށެކެވެ. ކައިރީގައި އޮންނަ ކޯރާއި މެނީލާ ބޭ ފުރި ބަންޑުންވެގެން ގަދަވާ އޮއެވަރުގައި އެންމެ ގަދައަށް ޖެހޭ އެއް އަވަށަކީވެސް ހެގޮނޯއީއެވެ. ފެންގަނޑު ބޮޑުވެފައި ވާ ދުވަސްވަރެއް ނަމަ، ކުދި އުޅަނދުފަހަރުގައި އެ އަވަށުގެ މަގުތަކުން ދުއްވުމަކީ ކުރެވޭ ވަރުގެ ކަމެއް ނޫނެވެ.

ފާއިތުވީ 10 ވަރަކަށް އަހަރު، ސައިކަލް ޓެކްސީ ޑްރައިވަރެއްގެ ގޮތުގައި މަސައްކަތް ކޮށްފައި ވާ، އަދި މިހާރުވެސް އެ މަސައްކަތުގައި ދެމި ހުރި ރަސަލް ލޯޕޭޒް ބުނި ގޮތުގައި ހެގޮނޯއީގައި ފެންބޮޑުވެފައިވާ ސަރަޙައްދުތަކަށް ބަލައިގެން ރާވާފައިވާ ހާއްސަ ރޫޓުތަކުން ކުރާ ދަތުރުތަކަށް، ކޮންމެ ފަސެންޖަރެއްގެ އަތުން، ކޮންމެ ދަތުރަކަށް 40 ޕޭސޯސް ނުވަތަ 0.68 ޑޮލަރުގެ ފީއެއް ނަގައެވެ. އެ މޭރުމުން ކުރާ ދަތުރުތަކުން އޭނާއަށް ދުވާލެއްގެ މައްޗަށް 500 ޕޭސޯސް ނުވަތަ 8.47 އެއްހާ ޑޮލަރު ޖެހެއެވެ.

ޚިދުމަތް ދޭ ފަރާތާއި، ލިބިގަންނަ ފަރާތުގައިވެސް އޮތީ ހިތް ހަމަ ޖެހުމެވެ.

ބޮޑުވެފައިވާ ފެންގަނޑަށް އަހުލުވެރިނުކޮށް ދުއްވާ ޓެކްސީތަކަށްވުރެ، ބަދަލު ގެނެސްފައި ވާ ސައިކަލް ޓެކްސީތަކަށް ލިބޭ އާމްދަނީވެސް ބޮޑެވެ. ނަމަވެސް، ލޮނުފެނުގެ ސަބަބުން އުޅަނދަށް ލިބޭ ގެއްލުންތަކާއި އުޅަނދުގެ މެއިންޓަނަންސްއަށް ކުރަންޖެހޭ ޚަރަދު ބޮޑުވުމުގެ ނަތީޖާއެއްގެ ގޮތުން، އިތުރުވާ ފައިދާގެ މާ ބޮޑު މަންފާއެއް ނުކުރެއެވެ.  

ވިލެޖް ލީޑަރެއްގެ ގޮތުގައި ހުންނެވި އަވެލީނޯ ސާން ހުއާން ވިދާޅުވި ގޮތުގައި، ފެންބޮޑުވުމަކީ އެ އަވަށަށް އާންމު ކަމެކެވެ. ނަމަވެސް އެކަށީގެންވާ ގޮތެއްގައި ކުނި ނައްތާލުމުގެ ކަންކަން ކުރިއަށް ނުގެންދެވި އޮތުމާއި، އިޤްތިޞާދީ ތަރައްޤީގެ މަޝްރޫއުތަކުގެ ސަބަބުން ފެންބޮޑުވުމުގެ ކާރިޘީ ހާލަތު ގޯސްވަމުން ދާ ކަން އޭނާ ފާހަގަ ކުރިއެވެ. އެފަދަ ކަންކަމުގެ ސަބަބުން ކޯރުގައި ވެލީގެ ފަށަލަ ބޯވެ، ފެންގަނޑަށް އޮންނަ ޖާގަ ތިލަވެއެވެ.

މި މައްސަލައަށް ހައްލެއް ހޯދުމަށް، ކޯރު ފުންކުރުމުގެ މަސައްކަތް ކުރަމުން ދާ ކަމަށް ބުލާކަންގެ ލޯކަން ގަވަމަންޓުން ވަނީ ބުނެފައެވެ. އެކަމުގައި އަމަލީ ސިފަ ޖެހި، ދާއިމީ ޙައްލެއް ލިބެންދެން، ހެގޮނޯއީގެ ރަށްވެހިންނަށް އޮތީ، އުފުލި ސައިކަލް ޓެކްސީތަކުގައި ދަތުރުތައް ފަރުޖައްސާލުމެވެ. ފެންބޮޑުވާ މަގުތަކަށް ފިލިޕީންސްގެ ސައިކަލް ޓެކްސީ ޑްރައިވަރުންގެ ހޯދައިދިން އިންޤިލާބީ ޙައްލު، ކިތަންމެ ހާވެސް ފުރިހަމައެވެ.