ކ. މާލެ
|
4 ސެޕްޓެންބަރ 2022 | އާދީއްތަ 10:58
ހައްސީ މިނީބަސް ދަތުރުކޮށްދެނީ 200 އެއްހާ ސޫރިއަން ޕައުންޑަށް، އެއީ އެމެރިކާގެ 5 ސެންޓަށްވުރެވެސް ހެޔޮ އަގެއް
ސޫރިޔާގެ ޑްރައިވަރުންގެ އާމްދަނީ ހުއްޓުން
ސޫރިޔާގެ މިނީބަސް ޑްރައިވަރުންނަށް އާމްދަނީއެއް ލިބެން ނެތްއިރު ޓެކްސީއަށް އަރާނެ ފަސެންޖަރަކުވެސް ނެތް!
 
ބާޒާރުގައި ތެލުގެ އަގުތައް އުފުލުމާއި ސޫރިޔާ ފައިސާގެ އަގު ދަށްވުމުގެ ސަބަބުން މަސައްކަތު ދުވަސް ނިމޭއިރު އަތުގައި އޮންނަނީ އެންމެ ދެތިން ޑޮލަރު
 
ޓެކްސީއާއި މިނީބަސްތަކަށް، ސަބްސިޑީ އުސޫލުން ދުވާލެއްގެ މައްޗަށް ލިބެނީ 30 ލީޓަރުގެ ޕެޓްރޯލް ނުވަތަ ޑީސަލް
 
މީގެ ކުރިން ޑޮލަރަކަށް 47 ސޫރިއަން ޕައުންޑް ޖެހުނު ނަމަވެސް، މިއަދު އެ އަދަދު ހުރީ 4300 ސޫރިއަން ޕައުންޑްގައި

ރަށުގެ އެއްކޮޅުން އަނެއް ކޮޅަށް ފަސެންޖަރުން އުފުލަން ހޭދަވާ ތެލަށް ޚަރަދު ކެނޑުމަށްފަހު، އަރާމު ދިރިއުޅުމެއްގައި މީރު ކާބޯތަކެތި ކައިބޮއި ހަދާނެ ވަރަށް ފައިސާ ބާކީކޮށްގެން ގެއަށް ގެންދެވުނު ދުވަސްތަކަކީ، ސޫރިޔާގެ ވެރިރަށް ދިމިޝްކުގައި މިނިބަސް ދުއްވަން އުޅޭ ޚާލިދު އަލް-ހައްސީގެ ހަނދާންތަކާ ގުޅިފައިވާ ދުވަސްތަކެކެވެ.

މިއަދު ހުރިހާ ކަމެއް ވަނީ ބަދަލު ވެފައެވެ. ބާޒާރުގައި ތެލުގެ އަގުތައް އުފުލުމާއި ސޫރިޔާ ފައިސާގެ އަގު ދަށްވަމުން ދިއުމުގެ ނަތީޖާއެއްގެ ގޮތުން، މަސައްކަތު ދުވަސް ނިމޭއިރު އަތުގައި އޮންނަނީ އެންމެ ދެތިން ޑޮލަރެވެ. އެއީވެސް، މަސައްކަތް ކުރެވޭ ވަރަށް ޓޭންކުގައި ތެޔޮ ހުރި ކަމަށް ބަލައިގެންނެވެ.

5 ސޫރިއަން ޕައުންޑްގެ ދުވަސްތައް އެއީ ހިތްގައިމު ދުވަސްތަކެއް. 5 ސޫރިއަން ޕައުންޑްގެ ދުވަސްތައް އަލުން އަންނާނެ ނަމަ ކޮންފަދަ. ޓޭންކު ފުރާ، ކައިބޮއި ހެދޭ. ފަސެންޖަރުންގެ އަތުން ފީއެއްގެ ގޮތުގައި ނަގަނީ 5 ޕައުންޑް. އޭރު ޓޭންކު ފުރާލަން އަހަރަމެން. ކާޑެއް ނޯވޭ. ކޮންމެ ސްޓޭޝަނަކުންވެސް ތެޔޮ ލިބޭ، އަހަރަމެން ބޭނުން ވަރަކަށް.
ޚާލިދު އަލް-ހައްސީ، ސޫރިޔާގެ މިނީބަސް ޑްރައިވަރެއް

ހައްސީ މިނީބަސް ދަތުރުކޮށްދެނީ 200 އެއްހާ ސޫރިއަން ޕައުންޑަށެވެ. އެއީ އެމެރިކާގެ 5 ސެންޓަށްވުރެވެސް ހެޔޮ އަގެކެވެ. އެ ފައިސާއިން އޭނާގެ އާމްދަނީއަށް ވަންނަނީ އެންމެ 30 ޕަސެންޓްއެވެ.

ސޫރިޔާގެ ހަނގުރާމައަށް 11 އަހަރުވެފައި ވާ އިރު، ސޫރިޔާގެ ފައިސާގެ އަގު ވަނީ އެމެރިކާ ޑޮލަރާ އަޅާ ބަލާއިރު އިންތިހާއަށް ދަށަށް ގޮސްފައެވެ. މީގެ ކުރިން ޑޮލަރަކަށް 47 ސޫރިއަން ޕައުންޑް ޖެހުނު ނަމަވެސް، މިއަދު އެ އަދަދު ހުރީ 4300 ސޫރިއަން ޕައުންޑްގައެވެ.

އެތައް އަހަރަކަށް ދިގުލާ ދިޔަ ސޫރިޔާ ހަނގުރާމައަށްފަހު، ހައްސީ ފަދަ ޓެކްސީއާއި މިނީބަސް ދުއްވާ މީހުންނަށް އާމްދަނީ ހޯދުން ވެފައި ވަނީ އިންތިހާއަށް ދަތި ކަމަކަށެވެ. އަހަރުން އަހަރަށް، އެ ތަކުލީފުތައް ބޮޑުވާ ކަމަށް ހައްސީ ފާހަގަ ކުރެއެވެ. ރަޝިއާއިން ޔޫކްރައިންގައި ފެށި ހަނގުރާމައާއެކު ދުނިޔޭގެ ބާޒާރުގައި އުފުލެން ފެށި ތެލުގެ އަގުތަކާއެކު، ހާލަތުން ދިޔައީ ގޯހުން ގޯހަށް ކަމަށް ހައްސީ ބުނެއެވެ.

ޑްރައިވަރުންނަށް ޖިސްމާނީ ގޮތުން އުފުލަންޖެހިފައިވާ ތަކުލީފުތައްވެސް އިންތިހާއެވެ.

ހާލަތު ވަރަށްވެސް ނުތަނަވަސް. މަށަކީ ލޭމައްޗަށް ދާ މީހެއް. ލޭ ހޮޅިތަކަށް މައްސަލަ ދިމާވޭ. 2 ސްޓްރޯކެއް ޖެހިފަ ހުރި މީހެއް. އެކަމަކު އަހަރެން ބޭނުން ދިރިއުޅެން. ސަލާން ޖަހާކަށް ބޭނުމެއް ނޫން. ސަލާން ޖަހާ މީހުންނަށް ލިބޭ އެއްޗެއް ގިނަވިއަސް، ސަލާން ޖެހުމަކީ ވަރަށް އުނދަގޫ ކަމެއް މަށަށް. މި ދުވަސްވަރު، މިނީބަސް ދުއްވުމަށްވުރެ ސަލާން ޖެހުމުގެ ފައިދާ ބޮޑުވެފަ މި އޮންނަނީ.
ހަސަން ނައްޖާރު؛ ސޫރިޔާގެ މިނީބަސް ޑްރައިވަރެއް

ސޫރިޔާގެ ސަރުކާރުން ތެލުގެ އަގުތަކަށް ބަދަލު ގެނައީ އޯގަސްޓް މަހުގެ ކުރީކޮޅުގައެވެ. ސަބްސިޑީ ދީގެން ވިއްކާ ތެލުގެ އަގުތައްވެސް 2 ގުނަ އުފުލާލިއެވެ. ޓެކްސީއާއި މިނީބަސްތަކަށް، ސަބްސިޑީ އުސޫލުން ދުވާލެއްގެ މައްޗަށް ލިބެނީ 30 ލީޓަރުގެ ޕެޓްރޯލް ނުވަތަ ޑީސަލްއެވެ. ވެރިރަށް ދިމިޝްކުގައި އޮޕަރޭޓް ކުރާ މިނީބަސްތަކަށް ޑީސަލް ދޫކުރަނީ ހަފުތާ ބަންދު ދުވަސްތަކުގައި އެކަންޏެވެ.

ޑްރައިވަރުންގެ ދިރިއުޅުމުގެ ޚަރަދުތައް ދެކޮޅު ޖެއްސުމަށް އެމީހުން ތަކުލީފުތަކެއް އުފުލަމުން ދާ އިރު، ޓެކްސީ ދަތުރެއް ކުރުމަށް އަތުގައި ތަނަވަސްކަން ހުރި އާންމުންގެ އަދަދުވެސް މިއަދު އިންތިހާއަށް މަދެވެ.

ގުޑުގުޑާ ބޯ މީހުންނަށް ބޯޓުދެލިބުރި ވިއްކައިގެން ދިރިއުޅުމުގެ ޚަރަދުތަކަށް ހޭދަ ކުރަމުން ދާ އުއްމު މުޙައްމަދު، ފައިސާ ރައްކާ ކުރުމުގެ ގޮތުން އޭނާގެ ދިގު ދަތުރުތައް، ރަށުގެ އެއްކޮޅުން އަނެއް ކޮޅަށް ކުރަނީ ފައިމަގުގައެވެ.

އުއްމު މުޙައްމަދުގެ 17 އަހަރުގެ އަންހެން ދަރިފުޅު، ސިދުރާގެ ސްކޫލް ދަތުރުތައްވެސް އޮންނަނީ ފައިމަގުގައެވެ. އެ ޓެކްސީ ދަތުރަށް 25000 ޕައުންޑް ޚަރަދު ކުރަން ޖެހޭ އިރު، އެއީ އުއްމު މުޙައްމަދަށް ދުވާލެއްގެ މައްޗަށް ލިބޭ އާމްދަނީގެ 2 ގުނަ ކަމަށް އޭނާ ބުނެއެވެ. ދުވާލަކު ދެ ދަޅައަށް ދުރު ރާސްތާތަކަށް ހިނގަން މަޖުބޫރުވުމުގެ ސަބަބުން އިންތިހާ ވަރުބަލިކަން އިހުސާސް ކުރަން ޖެހި، އެކަމުގެ ނޭދެވޭ އަސަރު، ސިދުރާގެ ތައިލީމީ ހަޔާތަށްވެސް ވަނީ ފޯރާފައެވެ. ސިދުރާ ފެއިލް ވުމުގެ އެންމެ ބޮޑު އަސްލަކީ ދަތުރުފަތުރުގެ ދަތިކަން ކަމަށް އުއްމު މުޙައްމަދު ބުނެއެވެ.

އަހަރެންގެ ހުންނާނެ ހައި ސްކޫލް ސަނަދަށް ކިޔަވާ އަންހެން ދަރިއެއް. ޤައުމު އޮތް ހާލަތުން، އެ ދަރިއަށް ނުއުފުލޭ ވަރުގެ ބުރައެއް އަހަރަމެންނަށް އޭނާއަށް ޖެއްސުނީ. އެ ދަރިފުޅުގެ ފެއިލްވުމުގެ އެންމެ ބޮޑު އެއް އަސްލަކީވެސް ދަތުރުފަތުރުގެ ނިޒާމް. ސްކޫލެއްގެ ދަފުތަރުވެގެން އޭނަ އުޅޭނީ. ޕަބްލިކް ޓްރާންސްޕޯރޓް އަތު ނުޖެހުނީވިއްޔާ ހިނގާފަ އޭނަ އުޅޭނީ. ޓެކްސީގަ ދަތުރުކުރާކަށް އަހަރަމެންނަކަށް ޚަރަދެއް ނުކޮށްދެވޭ. 4 ދަރިން އެބަތިބި. ބައެއް ކުދިން ސްކޫލްގަ. ކުލި ދައްކާފަ، ޓެކްސީގަ ދެކޮޅަށް ދުއްވާކަށް އަތަކު އެއްޗެއް ނޯވޭ. އެ އަދި އޭނަގެ ކެއިންބުއިމުގެ ޚަރަދުތައް ނުލާ."
އުއްމު މުޙައްމަދު؛ ސޫރިޔާގައި ބޯޓުދެލި ވިއްކާ މީހެއް

ކޮވިޑް-19އާއި ޔޫކްރައިން ހަނގުރާމައިގެ ސަބަބުން ޤައުމުތަކުގެ އިޤްތިޞާދުތަކަށް ކުރިމަތިލާން ޖެހިފައި ވާ ހީނަރުކަމުގެ ތަކުލީފުން ސަރުކާރުތަކަށް ލުއި ހޯދުމުގެ ގޮތުން، އެކި ފިޔަވަޅުތައް ތަންފީޒު ކުރެއެވެ. އެގޮތުން ސޫރިޔާގެ ސަރުކާރުން ވަނީ ހަކަތައިގެ އިތުރުން، ސަބްސިޑީ އުސޫލުން ކާބޯތަކެތީ ދޫކުރަމުން ދިޔަ ދިއުމަށްވެސް ބަދަލުތަކެއް ގެނެސްފައެވެ.

އެންމެ ފަހުން އަޕްޑޭޓް ކުރީ: 2 މަސް ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
100%
0%
0%
0%
ކޮމެންޓް
4 ސެޕްޓެންބަރ 2022 | އާދީއްތަ 22:04
ޙަބީބު.
އެމެރިކާގެ ބޭނުމަކީ ގައުމުތައް އިނދަޖެއްސުން ސައުދީވެސް އެއޮތީނު ކުޅިބަލަން ގައިމު މުސްލިމުންނައް ތެލުގެ ލުއިކަން ދިނިއްޔާ ކީއްތަވާނީ