މި ފެންނަނީ ފަތުރުވެރިކަމަށް ސަރުކާރުން ނުފޫޒު ނުފޯރުވާކަމުގެ ހެކި: ރައީސް
ސިނާއަތްތައް ތަރައްގީކުރުމަށް ޕްރައިވެޓް ސެކްޓަރާ އޮންނަންޖެހޭ ގުޅުމަކީ ފާހަގަކޮށްލެވޭ ގުޅުމެއް
ފަތުރުވެރިކަމުގެ ރަން އަހަރު: ގާލާ ނައިޓް
ޕްްރައިވެޓް ސެކްޓަރުން ތަރައްގީކުރާ ސިނާއަތްތަކަށް ސަރުކާރުން ނުވަދެ, އަދި ނުފޫޒު ނުފޯރުވުމުން ނުކުންނަ ހެޔޮ ނަތީޖާ މިއަދު ފެންނަމުންދާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ، ފަތުރުވެރިކަމުގެ ރަން އަހަރު ފާހަގަކުރުމުގެގޮތުން ކުރުނބާ މޯލްޑިވްސްގައި މިހާރު ކުރިއަށްދާ ގާލާ ނައިޓްގައި ވާހަކަފުޅުދައްކަވަމުންނެވެ.
ރައީސް ވިދާޅުވީ، ގައުމީ ތަރައްގީއާ ގުޅިފައިވާ ސިނާއަތްތައް ތަރައްގީކުރުމުގައި ސަރުކާރާއި ޕްރައިވެޓް ސެކްޓަރާ ދެމެދުގައި އޮންނަންޖެހޭ ގުޅުމަކީ ފާހަގަކޮށްލެވޭ ގުޅުމެއްކަމަށެވެ. ދުނިޔޭގެ ފެންވަރުގެ ވަރުގަދަ ސިނާއަތަކަށް ދިވެހި ފަތުރުވެރިކަން ވެގެން ދިޔައީ، ފުރިހަމަ މިނިވަންކަމާއެކު އެކަން ކުރުމުގެ އިޚްތިޔާރު ޕްރައިވެޓް ސެކްޓަރަށް ދޫކޮށްލާފައި އޮތުމުންކަމަށެވެ. އަދި ސަރުކާރުގެ ދައުރަކީ ގައުމީ ފެންވަރުގައި ސިޔާސަތުތައް ކަނޑައެޅުމާއި، ގާނޫނީ އޮނިގަނޑުގެތެރެއިން އެކަން ކުރުމަށް އެހީތެރިކަން ފޯރުކޮށްދިނުންކަން ރައީސް ފާހަގަކުރެއްވިއެވެ.
ރައީސް ވިދާޅުވީ، ބަޔަކު ދުވަހަކު ޚިޔާލަށްވެސް ނުގެންނަ، އަދި އެއްގޮތަކަށް މިރާއްޖޭގައި ނެތް ކަމެއްވެސް، އަޅުގަނޑުމެންގެ ތެރޭގައި ތަރައްގީކޮށް ކާމިޔާބު މަސައްކަތަކަށް ހެދިދާނެކަމީ މިއަދު ލިބޭ ފިލާވަޅެއްކަމަށެވެ.
ރައީސްގެ ވާހަކަފުޅުގައި ވަނީ، މި ސިނާއަތް އިތުރަށް ތަރައްގީކޮށްދެއްވައި މިހާތަނަށް އައިއިރު މި ސިނާއަތަށް އެކި ގޮތްގޮތުން ޚިދުމަތްކޮށްދެއްވާފައިވާ ފަރާތްތަކަށް ޝުކުރު އަދާކުރައްވާފައެވެ.
