ސާބާގެ ވިމެންސް ޗެމްޕިއަންޝިޕްގައި ވާދަކުރާ ގައުމީ ބާސްކެޓްބޯޅަ ޓީމާ ރައީސުލްޖުމްހޫރިއްޔާގެ އަނބިކަނބަލުން ބައްދަލުކުރައްވައި ހިތްވަރުދެއްވައިފި

"ސައުތު އޭޝިއަން ބާސްކެޓްބޯލް އެސޯސިއޭޝަން (ސާބާ)ގެ ވިމެންސް ޗެމްޕިއަންޝިޕް 2022"ގައި ވާދަކުރާ ގައުމީ ބާސްކެޓްބޯޅަ ޓީމާ، ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ބައްދަލުކުރައްވައި ޓީމަށް ހިތްވަރު ދެއްވައިފިއެވެ.

ރައީސުލްޖުމްހޫރިއްޔާގެ އަނބިކަނބަލުން، އަންހެނުންގެ ގައުމީ ބާސްކެޓް ބޯޅަ ޓީމާ ބައްދަލުކުރެއްވީ މިރޭ ސޯޝަލް ސެންޓަރުގައެވެ. މި ޓީމާ ބައްދަލުކުރައްވައި އެކަމަނާ ވަނީ، ކުޅިވަރުގެ މައިދާނުގައި އެކަމަނާގެ އަމިއްލަފުޅު ތަޖުރިބާއިން ބައެއް ވާހަކަފުޅުތައް ހިއްސާކުރައްވައި، ޓީމުގެ މެންބަރުން މުބާރާތުގައި ކާމިޔާބީއާ ހަމައަށް ވާސިލުވުމަށް ގަދައަޅައި މަސައްކަތްކުރުމަށް ހިތްވަރުދެއްވައި މުބާރާތުގައި ކާމިޔާބީއަށް އެދިވަޑައިގަންނަވާފައެވެ.

އަދި މި މުބާރާތަކީ ޓީމަށް ލިބިގެންދާނެ ރަނގަޅު ތަޖުރިބާއަކަށް ވާނެކަމަށް އުންމީދުކުރައްވާ ކަމަށްވެސް އެކަމަނާ ވިދާޅުވިއެވެ. މީގެ އިތުރުން އެކަމަނާ ވަނީ ޓީމުގެ ފަރިތަކުރުންތައް ސޯޝަލް ސެންޓަރުގައި ކުރިއަށްދިޔަގޮތް ބައްލަވާލައްވާފައެވެ.

މި ބައްދަލުކުރެއްވުމުގައި ޓީމުގެ ފަރާތުން ވަނީ، އެޓީމުން މި މުބާރާތުގައި ބޭނުންކުރާ ޖަރޒީއެއް ރައީސުލްޖުމްހޫރިއްޔާގެ އަނބިކަނބަލުންނަށް ވެދުމަށް އަރުވާފައެވެ. ސާބާގެ އަންހެނުންގެ ބާސްކެޓް ބޯޅަ މުބާރާތް 2022 ކުރިއަށްދާނީ ސެޕްޓެމްބަރު 25ން 30ށް ސޯސަލްސެންޓަރުގައެވެ. މިއީ ބައިނަލްއަގުވާމީ އަންހެނުންގެ ބާސްކެޓް ބޯޅަ މުބާރާތް ރާއްޖޭގައި ބާއްވާ ފުރަތަމަފަހަރެވެ.