ހުޅުމާލެ ޖަލުގެ މަސައްކަތް ނިމުމުން ރާއްޖޭގެ ޖަލުތަކުގެ ނިޒާމަށް ބަދަލު ގެނެވޭ ކަމަށް ވިދާޅުވި
ހޯމް މިނިސްޓަރު އިމްރާން އަބްދުﷲ
މާލެ ޖަލު ހުޅުމާލެއަށް ބަދަލު ކުރުމުގެ މަސައްކަތް އެންމެ ލަސްވެގެން މި އަހަރުގެ ފަހުކޮޅު ނުވަތަ އަންނަ އަހަރު ފަށާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ގައި ވާހަކަފުޅު ދައްކަވަމުން މިނިސްޓަރު އިމްރާން ވިދާޅުވީ ޖަލުތަކުގެ ހާލަތަށް ރަނގަޅު ބަދަލެއް ގެނެވޭނީ އޮޑިޓް ރިޕޯޓުތަކުގައި ވެސް ފާހަގަކޮށްފައިވާ ގޮތަށް، ޖަލުތަކުގެ އިންފްރާސްޓްރަކްޗަރަށް ފުދޭވަރެއްގެ ބޮޑު ބަދަލެއް ގެނެވިގެން ކަމަށެވެ. މި މައްސަލަ ހައްލު ކުރުމަށް މި ސަރުކާރުން މަސައްކަތް ކުރަމުން އަންނަ ކަމަށާއި ނަމަވެސް ކޮވިޑާއި ގުޅިގެން ރާއްޖޭގެ އިގްތިސާދަށް ކުރި އަސަރުގެ ސަބަބުން އެފަދަ ބޮޑެތި ޕްރޮޖެކްޓުތައް ކުރިއަށްގެންދިއުމުގައި ދަތިތައް ހުރުމުން އެ މަސައްކަތް މަޑުޖެހުނުކަން ވެސް އިމްރާން ފާހަގަކުރެއްވިއެވެ.
އިމްރާން ވިދާޅުވީ ޖަލުތަކުގެ އިންފްރާސްޓްރަކްޗަރަށް ބޮޑު ބަދަލެއް ނުގެނެވުނު ނަމަވެސް ވަގުތީ ހައްލެއްގެ ގޮތުން މާލެ ޖަލުގައި 50 މީހުންގެ ޖާގަ އިތުރު ކޮށްފައިވާ ކަމަށާއި މާފުށީގައި 100 މީހުންގެ ޖާގަ އާއި ހިންމަފުށީ ޖަލުގައި 60 މީހުންގެ ޖާގަ އަދި ހުޅުމާލެ ޑިޓެންޝަން ފެސިލިޓީގައި 60 ޖާގަ އިތުރުކޮށްފައިވާ ކަމަށެވެ. މި އިތުރު ކުރެވުނު ޖާގަތަކަކީ މިހާރުގެ ސްޓޭންޑަޑަށް ފެތޭ ޖާގަތަކަށްވިޔަސް އިތުރަށް ހުރި 1300 އެއްހާ ޖާގައަކީ މުހިންމު ބަދަލުތަކެއް ގެންނަ ޖެހޭ ތަންތަން ކަން އިމްރާން ފާހަގަކުރެއްވިއެވެ.
ޖަލުތަކުގެ ހާލަތު ރަނގަޅު ކުރުމަށް ކުރަމުން އަންނަ މަސައްކަތުގެ ދަށުން މާލޭގައި ހުންނަ ޖަލު ހުޅުމާލެއަށް ބަދަލު ކުރުމުގެ މަސައްކަތް ސަރުކާރުން ދަނީ ކުރަމުންނެވެ. މި ޖަލަކީ ގަތްގަޑަކަށް 420-500 އާ ދެމެދުގެ އަދަދެއްގެ ގައިދީންގެ ޖާގައިގެ ޖަލަކަށްވާއިރު ޖަލުގެ އަމަލީ މަސައްކަތް މިއަހަރުގެ ފަހުކޮޅު ނުވަތަ އަންނަ އަހަރުގެ ކުރީ ކޮޅު ފެށިގެންދާނެ ކަމަށް އިމްރާން ވިދާޅުވިއެވެ.
އޭނާ ވިދާޅުވީ މާލެ ޖަލު ހުޅުމާލެއަށް ބަދަލު ކުރުމަށް ގިނަ ދިރާސާތަކެއް ކޮށްފައިވާ ކަމަށާއި އެ ޖަލުގެ ކޮންސެޕްޓާއި ޑިޒައިނިންގެ ހުރިހާ މަސައްކަތެއް މިހާރު ނިމިފައިވާ ކަމަށެވެ. މި މަސައްކަތަށް މިހާރު ބޭނުންވަނީ ބަޖެޓުކަމަށާއި ބަޖެޓު ހަމަޖެއްސުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މަސައްކަތް ކުރައްވަމުން ގެންދަވާކަމަށް އިމްރާން ފާހަގަކުރެއްވިއެވެ.
މިނިސްޓަރު އިމްރާން ވިދާޅުވި ގޮތުގައި މާފުށީގައި ގާއިމް ކުރާ ހައި ސެކިއުރިޓީ ޖަލާއި ހުޅުމާލޭގައި ތަރައްގީ ކުރާ ޖަލުގެ މަސައްކަތް ނިމުމުން ރާއްޖޭގައި ކުރިއަށް އޮތް 30-40 އަހަރަށް ޖަލުތަކުގެ ޖާގައިގެ މައްސަލަ ހައްލުވެގެންދާނެއެވެ. މިއާއެކު އޯޕަން ނުވަތަ އިންޑަސްޓްރިއަލް ޖަލެއް ވެސް ރާއްޖޭގައި ތަރައްގީ ކުރަން ޖެހޭކަން ވެސް އޭނާ ފާހަގަކުރެއްވިއެވެ.
މި ޖަލުގެ މަސައްކަތައް ބޭނުންވާ 21 ހެކްޓަރުގެ ޖާގަ ހދ. ނޭކުރެންދޫ އިން ކަަނޑައެޅިފައިވާ ކަމަށް ވެސް އިމްރާން ވިދާޅުވިއެވެ.
