ގްރީން ޓެކްސްގެ މައްސަލަ ހައްލުކުރުމަށް ހުށަހެޅި ބިލު ފާސްކޮށްފި
ޖުލައިން ފެށިގެން ގްރީން ޓެކްސް ނަގާފައިވާނަމަ، އެ ޓެކްސް ދައުލަތަށް ދައްކަންޖެހޭނެކަމަށް ބުނެފައިވޭ
ރައްޔިތުންގެ މަޖިލިސް
ޓުއަރިޒަމް ގާނޫނަށް ގެނައި 11 ވަނަ އިސްލާހުގެ ދަށުން ގްރީން ޓެކްސް ނެގުން މަޑުޖެހިފައިވާތީ، އެކަން ހައްލުކުރުމަށް އަލުން އެގާނޫނަށް ހުށަހެޅި އިސްލާހު ސަރުކާރުން ހުށަހެޅި ގޮތަށް އިތުރުބަދަލެއް ނުގެނެސް ފާސްކޮށްފިއެވެ.
ރައްޔިތުންގެ މަޖިލީހުގެ ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފު ހުށަހެޅުއްވި އެ އިސްލާހު ފާސްކޮށްފައި ވަނީ ބުދަ ދުވަހުގެ ޖަލްސާގައި، ވޯޓުގައި ބައިވެރިވެވަަޑައިގެންނެވި 50 މެމްބަރުންގެ އިއްތިފާގުންނެވެ. މުޅި މަޖިލީހުގެ ކޮމިޓީން ބިލު ފާސްކޮށްފައި ވަނީ 12 ސެޕްޓެމްބަރު 2022ގައެވެ.
ގްރީން ޓެކްސް ނެގުން ހުއްްޓޭ ގޮތް މެދުވެރިވީ ޓޫރިޒަމް ގާނޫނަށް 11 ވަނަ އިސްލާހު ގެނައި އިރު، ގްރީން ޓެކްސް ނަގަން ފަށާ ތާރީހެއްގެ ގޮތުގައި އޮތީ އަންނަ އަހަރުގެ ޖެނުއަރީ މަހުގެ ފުރަތަމަ ދުވަސް އޮތުމުންނެވެ.
މަޖިލީހަށް އިސްލާހެއް ހުށަހަޅާފައިވަނީ ޓުއަރިޒަމާބެހޭ ގާނޫނުގެ 35 ވަނަ މާއްދާގެ ދަށުން ގްރީންޓެކްސް ނެގުމަށް ކަނޑައެޅިފައިވާ އުސޫލު އިތުރަށް ސާފުކޮށްދިނުމަށްޓަކައި މި ގާނޫނަށް ގެންނަންޖެހޭ އިސްލާހުތައް ގެނައުމަށާއި، އެ ގާނޫނުގެ ދަށުން 1 ޖެނުއަރީ 2023ން ފެށިގެން ނެގުމަށް ކަނޑައެޅިފައިވާ ގްރީން ޓެކްސް ނަގަން ފަށަންދެން، 3 ޖުލައި 2022ގެ ކުރިން އެ ގާނޫނުގެ ދަށުން ނަގަމުންދިޔަ ގްރީން ޓެކްސް ނެގެމުންދާނެކަން ގާނޫނުގައި ކަނޑައެޅިގެން ބަޔާންކުރުމަށާއި، އެނޫންވެސް ކަމާގުޅޭ އުސޫލުތައް ގާނޫނުގައި ކަނޑައެޅުމަށްޓަކައި މި ގާނޫނަށް ގެންނަން ޖެހޭ އިސްލާހު ގެނައުމެވެ.
ގްރީން ޓެކްސް ނުނެގޭ ގޮތަށް ކުރިން ގެނައި ބަދަލުގެ ފަހުން ވެސް ބައެއް ތަންތަނުން ގްރީން ޓެކްސްގެ ގޮތުގައި ޓޫރިސްޓުންގެ އަތުން ނަގާފައިވާ ފައިސާ ދައުލަތަށް ދައްކަން ލާޒިމުކުރުމަކީ ވެސް މިއަދު ފާސްކުރި ބިލުން ކުރާ ކަމެކެވެ. ޓޫރިޒަމް ގާނޫނަށް ގެނައި 11 ވަނަ އިސްލާހުގައިވާ ގޮތުން، އަންނަ އަހަރުން ފެށިގެން ގްރީން ޓެކްސް ނަގާނީ 50 ކޮޓަރިއަށް ވުރެ ގިނަ ތަންތަނުން އެއިން ތަނެއްގައި ހޭދަކުރާ ކޮންމެ ދުވަހަކަށް، މީހަކަށް ހަ އެމެރިކާ ޑޮލަރުގެ ރޭޓުން އަދި 50 ކޮޓަރިއަށް ވުރެ މަދު ތަންތަނުން ހޭދަކުރާ ކޮންމެ ދުވަހަކަށް، މީހަކަށް ތިން އެމެރިކާ ޑޮލަރު ރޭޓުގައެވެ.
