އެއްގަމު އުޅަނދުތަކުގެ ނަންބަރު ބޯޑު ރަނގަޅު ނުކުރާނަމަ ފިޔަވަޅު އަޅާނަން: ފުލުހުން
ޓްރާންސްޕޯޓް މިނިސްޓްރީން ވެސް ވަނީ ގަވާއިދާ އެއްގޮތަށް ނަންބަރު ބޯޑުތައް ބަހައްޓަން އަންގާފައި
މާލޭގެ މަގުމަތި
އެއްގަމުގައި ދުއްވާ އިންޖީނުލީ އުޅަނދުތަކުގެ ނަންބަރު ބޯޑު ޤަވާއިދާ އެއްގޮތަށް ރަނގަޅު ނުކުރާ ފަރާތްތަކާމެދު ފުލުހުން ފިޔަވަޅު އަޅަމުންދާނެ ކަމަށް ފުލުހުން ބުނެފިއެވެ.
ފުލުހުން މިގޮތަށް ބުނެފައިވަނީ އެއްގަމު އުޅަނދުތަކުގެ ނަންބަރު ބޯޑު ގަވާއިދާ އެއްގޮތަށް ބަހައްޓަން ޓްރާންސްޕޯޓް މިނިސްޓްރީން ނިންމާފައިވަނިކޮށެވެ. އެ މިނިސްޓްރީން ހޯމަ ދުވަހު ނެރުނު އިއުލާނުގައި ބުނެފައިވަނީ އެއްގަމުގައި ދުއްވާ އިންޖީނުލީ ބައެއް އުޅަނދުތަކުގައި ހަރުކޮށްފައި ހުންނަ ނަންބަރު ބޯޑު ހަދާފައި ހުންނަނީ “އެއްގަމު ދަތުރު ފަތުރު ގާނޫނު” ގެ 3 ވަނަ މާއްދާގެ (ހ) އިން ބާރުލިބިގެން އެކުލަވާލެވިފައިވާ ގަވާއިދު “އެއްގަމުގައި ދުއްވާ އިންޖީނުލީ އުޅަނދު ރަޖިސްޓްރީ ކުރުމުގެ ގަވާއިދު” ގައި ބުނެފައިވާ ގޮތަށް ނޫން ކަމަށް ފާހަގަ ކުރެވިފައިވާ ކަމަށެވެ. އެހެންވެ އެ އުޅަނދުތަކުގެ ނަންބަރު ބޯޑު އެ ގަވާއިދުގައި ބަޔާންކޮށްފައިވާ މިންގަނޑާ އެއްގޮތަށް ބޭނުން ކުރުމަށް ވަނީ އަންގާފައެވެ.
“އެއްގަމުގައި ދުއްވާ އިންޖީނުލީ އުޅަނދު ރަޖިސްޓްރީ ކުރުމުގެ ގަވާއިދު”ގައި ބުނެފައިވާ ގޮތުގައި ނަންބަރު ބޯޑުގެ އަކުރުތައް ހުންނަން ޖެހޭނީ “އޭރިއަލް ބޯލްޑް” ފޮންޓުން ކަމަށެވެ. އަދި އަކުރުތަކުގެ ސައިޒު ހުންނަންވާނީ ގަވާއިދުގައި ބުނެފައިވާ ގޮތަށް ކަމަށާއި މިއާއި ޚިލާފަށް ނަންބަރު ބޯޑުގެ އަކުރުތައް ހަދައިގެން ބޭނުން ކުރުމަކީ މަނާކަމެއް ކަމަށް ވެސް ވަނީ ބުނެފައެވެ.
މީގެ އިތުރުން ނަންބަރު ބޯޑުގައި ހުންނަ އަކުރުތައް ވަކިން ކަނޑާ ނަގައިގެން ބޭނުންކުރުމާއި އަކުރުތައް އެއް މިލިމީޓަރަށް ވުރެ އުސްކޮށް އުފުލިފައި ހުންނަ ގޮތަށް ހަދައިގެން ބޭނުން ކުރުމަކީވެސް މަނާކަމެކެވެ. އަދި އެއްގަމުގައި ދުއްވާ އުޅަނދުފަހަރުގެ ނަންބަރު ބޯޑު ކަރުދާހުން ހަދައިގެން ބޭނުންކުރުމަކީ ވެސް މި ގަވާއިދުގައި ބުނާގޮތުން މަނާކަމެކެވެ.
ގަވާއިދުގައި އިތުރަށް ބުނެފައި ވަނީ ވިޔަފާރި އުސޫލުން ބޭނުންކުރާ އުޅަނދު ފަހަރުގެ ނަމްބަރު ބޯޑު ހުންނަން ވާނީ ރީނދޫ ކުލައިގެ ބޯޑެއްގައި ކަޅުކުލައިގެ އަކުރުން ކަމަށެވެ. އަދި ކޮޮންސިއުލަރ މިޝަންތަކުގައި ބޭނުންކުރާ އުޅަނދުތަކުގެ ނަންބަރު ބޯޑު ނޫ ކުލައިގެ ބޯޑެއްގައި ހުދު ކުލައިގެ އަކުރުން ލިޔެފައި ހުންނަން ޖެހޭއިރު މިދެބާވަތުގެ އުޅަނދުތައް ފިޔަވައި އެހެން އުޅަނދުތަކުގެ ނަމްބަރު ބޯޑު ހުންނަން ވާނީ ކަޅު ކުލައިގެ ބޯޑެއްގައި ހުދު ކުލައިގެ އަކުރުން ލިޔެފައެވެ.
ބުދަ ދުވަހު ފުލުހުން ނެރުނު އިއުލާނެއްގައި ބުނެފައިވަނީ ޓްރާންސްޕޯޓް މިނިސްޓްރީން އެގޮތަށް އެންގުމާ ގުޅިގެން ގަވާއިދުގައިވާ ގޮތުގެ މަތިން ނަންބަރު ބޯޑު ރަނގަޅު ނުކުރާ ފަރާތްތަކާމެދު ފުލުހުން ފިޔަވަޅު އަޅަމުންދާނެ ކަމަށެވެ. އެގޮތުން 2022 އޮކްޓޯބަރ 1 ވަނަ ދުވަހާ ހަމައަށް ނަންބަރު ބޯޑުގައި ރަނގަޅު ކުރަން ހުރި ކަންކަމާ ގުޅޭގޮތުން ފުލުހުން ނަސޭހަތްތެރިވަމުންދާނެ ކަމަށާއި އޮކްޓޯބަރު 1 ވަނަ ދުވަހު ފެށިގެން ނަންބަރު ބޯޑު ރަނގަޅު ނުކުރާ ފަރާތްތަކާ މެދު ގަވާއިދުން ފިޔަވަޅު އަޅަމުންދާނެ ކަމަށް ފުލުހުން ބުނެފައި ވެއެވެ.
