"ޚިޔާލު ތަފާތުވާ ކޮންމެ މީހަކު ކާފިރުކޮށްގެން ނުވާނެ"
16 ސެޕްޓެމްބަރު 2022 | ހުކުރު 08:25ރަސޫލާ ވަނީ ދުޝްމިނުންނާ ވެސް ރިވެހި އުސޫލުތަކުގެ މަތިން މުޚާތަބުކުރައްވާފައި
ހުކުރު ނަމާދު
ތިމާއާ ޚިޔާލު ތަފާތުވާ ކޮންމެ މީހަކު ކާފިރުކޮށްގެން ނުވާނެ ކަމަށް ހުކުރު ޚުތުބާގައި ބުނެފިއެވެ.
"ދެބަސްވުމުގެ އަދަބުތައް" މި މައުޟޫއަށް އިއްވި ހުކުރު ޚުތުބާގައި މުއާމަލާތު ކުރުމުގެ ރިވެތި އުސޫލުތަކުގެ މައްޗަށް އަލިއަޅުވާލާފައިވެއެވެ. މިގޮތުން އެއް އިންސާނަކީ އަނެއް އިންސާނާއަށްވުރެ އެތަފާތު މީހެއްގެ ގޮތުގައި ހަލްގުކުރައްވާފައިވަނީ އެ ތަފާތުތަކުގެ ބޭނުން ރަނގަޅު ގޮތުގައި ހިފުމަށް ކަމަށް ޚުތުބާގައި ބުނެފައިވެއެވެ.
މިގޮތުން ކީރިތީ ރަސޫލާ މުޝްރިކުންނާއި މުއާމަލާތުކުރުމުގައި ވެސް ގެންގުޅުއްވި މަޑުމައިތިކަމާއި، ރިވެތި އުސޫލުތަކަށް ޚުތުބާގައި އަލިއަޅުވާލާފައިވެއެވެ. މިގޮތުން އެމީހެއްގެ ވާހަކަ މެދުކަނޑާނުލައްވައި ކަނުލާ އަޑު އެއްސެވިކަމަށް ޚުތުބާގައި ބުނެފައިވެއެވެ.
ޚިޔާލު ތަފާތުވިޔަސް ވާހަކަދެއްކުމުގައި ހިފަހައްޓަންޖެހޭ އަދަބުތަކެއް ވާކަން ޚުތުބާގައި ފާހަގަކޮށްފައިވެއެވެ. އިސްލާމީ ތާރީޚުން ފެނިފައިވާ އަދަދު ނުކުރެވޭހާ ގިނަ މިސާލުތަކުން އެނގެނީ މުސްލިމުންނަކީ ޚިޔާލު ފާޅުކުރުމުގެ ރިވެތި އުސޫލުތަކުގައި ހިފަހައްޓައިގެން މީސްތަކުންނާއި މުއާމަލާތުކޮށްފައިވާ ބައެއްކަން ކަމުގައި ޚުތުބާގައި ބުނެފައިވެއެވެ.
އެހެންކަމުން އެކުވެރިންނާއި، މުވައްޒަފުންނާއި، ގާތްތިމާގެ މީހުންނާއެކު ވާހަކަދައްކާއިރު، ނުވަތަ މައްސަލައަކާ ބަހުސް ކުރާއިރު، މި ރިވެތި އަދަބަށް ތަބާވާން ޖެހޭކަމަށް ޚުތުބާގައި ބުނެފައިވެއެވެ. އަދި ޚިޔާލު ތަފާތުވާ ކޮންމެ މީހަކު ކާފިރުކޮށްގެން ނުވާނެ ކަމަށާއި، ދެބަސްވާ ކޮންމެ މީހަކު މުޖުރިމަކަށް ހަދައިގެން ނުވާނެ ކަމަށެވެ. މީގެއިތުރުން ދީނީ މައްސަލައެއްގައި ބަހުސްކުރާނަމަ، އެ މައްސަލައަކާ ގުޅޭގޮތުން އިލްމުވެރިންގެ ރައުޔުތަކާއި، ހުއްޖަތުތަކުގެ އަލީގައި މެނުވީ ޖަދަލުތައް ކުރިއަށް ނުގެންދިއުމަށް ނަސޭހަތްތެރިވެފައިވެއެވެ.
ޚުތުބާގައި ވަނީ މިފަދަ ބޭއަދަބީ އަޚުލާގުތަކާއި ދުރުވެ، މާތްﷲ އާއި އެކަލާނގެ ރަސޫލާގެ މަންހަޖަށް އެނބުރި ދިއުމަށް ނަސޭހަތްތެރިވެފައެވެ.
