އދގެ ޗާޓަރުގައި ހުރި މަސްއޫލިއްޔަތުތަކާއި ވާޖިބުތައް އަދާކުރުމުގެ ގާބިލްކަން ރާއްޖޭގައި ހުރިކަން ސާބިތުކޮށްދީފި: ޝާހިދު

މީގެ 57 އަހަރުކުރިން ރާއްޖެއިން އދގެ މެމްބަރު ގައުމަކަށްވާން މަސައްކަތްކުރިއިރު ރާއްޖެފަދަ ކުދި ޖަޒީރާ ގައުމުތަކަށް އދ ގެ ޗާޓަރުގައި ހުރި މަސްއޫލިއްޔަތުތަކާއި ވާޖިބުތައް އަދާކުރުމުގެ ގާބިލްކަންހުރިތޯ ސުވާލުކުރެވިގެންދިޔަ ކަމަށާއި މިއަދު އެސުވާލަށް ޖަވާބު ދެވިގެންގޮސްފިކަމަށް އދގެ 76 ވަނަ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

ފޮރިން މިނިސްޓަރު އަބްދުﷲ ޝާހިދު އދގެ 76 ވަނަ އާންމު މަޖިލީހުގެ ރައީސްގެ ހައިސިއްޔަތުން ދެއްވާ ވަދާއީ ތަގުރީރަށްފަހު ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަފުޅު ދައްކަވަމުން ޝާހިދު ވިދާޅުވީ 1965 ވަނަ އަހަރު ރާއްޖެއަށް މިނިވަންކަން ލިބުމާއެކު އެންމެ އިސްކަމެއްދެއްވި އެއްކަމަކީ އދގައި ބައިވެރިވުންކަމަށެވެ.

އެދުވަހު އދގެ މެމްބަރު ގައުމަކަށްވާން މަސައްކަތްކުރި ދުވަހު އދގެ ސަލާމަތީ މަޖިލީހުގައި ވާހަކަދެކެވުނު އިރު ބޭފުޅަކު އުފެއްދެވި ސުވާލަކީ ރާއްޖެފަދަ ކުދި ގައުމުތަކަށް އދގެ މަޖިލީހުގެ ޗާޓަރުގައި ހުރި މަސްއޫލިއްޔަތުތަކާއި ވާޖިބުތައް އަދާކުރުމުގެ ގާބިލުކަން ހުރިތޯކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ މިފަދަ ދަތި ދަނޑިވަޅެއްގައި ކުރެވިގެންދިޔަ މަސައްކަތްތަކާއި ދޭތެރޭ ހިތްޕުޅު ހަމަޖެހިވަޑައިގަންނަވާކަމަށެވެ. އެގޮތުން ކޮވިޑުން އަރައިގަތުމަށާއި ދުނިޔޭގެ ތިމާވެއްޓަށް ނުރައްކާތެރިކަން ކުރިމަތިވެފައިވާ ވަގުތެއްގެ އިތުރުން ޔޫކްރެއިން ހަނގުރާމައިގެ ސަބަބުން ކާބޯތަކެއްޗާއި ހަކަތައާއި ތެލުގެ އަގު އުފުލެމުންދާ ދަނޑިވަޅެއްގައި އދގެ 193 ގައުމު އެއްބަސްކުރުވާ އެއްއަމާޒަކަށް ގެންދިޔުމަށް ކުރެވުނު މަސައްކަތްތަކާ މެދު ހިތްޕުޅު ހަމަޖެހިވަޑައިގަންނަވާކަމަށް ވިދާޅުވިއެވެ.

މީގެއިތުރުން ޝާހިދު އދ ގެ އާންމު މަޖިލީހުގެ ރިޔާސަތާއި ހަވާލުވެވަޑައިގަންނަވަމުން ކަނޑައެޅުއްވި އުންމީދުގެ ފަސް ދޯދި ހާސިލުކުރެއްވިފައިވާކަމަށް ވިދާޅުވިއެވެ. އެކަންކަން ހާސިލުކުރުމަށްޓަކައި ޝާހިދުގެ ރިޔާސަތުގެ ދަށުން މުހިންމު މަސައްކަތްތަކެއް ފެށިގެންދިޔަކަމީ އުފާފުޅު ކުރައްވާކަމެއްކަމަށް ވެސް ވިދާޅުވިއެވެ.