ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރުގެ މައްޗަށް އުފުލާފައިވާ މަނީ ލޯންޑަރުކުރުމާއި ގުޅޭ ދެ ދައުވާ މަދަނީ މިންގަނޑުން ކުރިއަށް ގެންދެވޭނެ ކަމަށް ނިންމާފައިވާ ނިންމުން ބަދަލުކުރަންޖެހޭ ތަނެއް ނެތް ކަމަށް ކްރިމިނަލް ކޯޓުން ނިންމައިފިއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ އާދަމްއެވެ.

އާޒިމާގެ މައްޗަށް އުފުލާފައިވަނީ ރަސްމީ އިދާރާތަކަށް ދޮގު މައުލޫމާތު ދިނުމާއި، މަނީ ލޯންޑަރިންއަށް މަގުފަހިކޮށްދިނުމުގެ ކުށުގެ ދައުވާއެވެ. އެ ދެ ދައުވާ މަދަނީ މިންގަނޑުން ކުރިއަށް ގެންދެވޭނެކަމަށް ކަނޑައަޅުއްވާފައިވަނީ 27 މާރޗު 2022 ގައެވެ. އެ ދުވަހު މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވިދާޅުވީ، މަދަނީ މިންގަނޑުން ކުރިއަށް ގެންދާއިރު، މިއީ ހުށައަޅާ ހުރިހާ ހެކިތަކުގެ ފުނަށް ފަނޑިޔާރު ވާސިލުވާން ޖެހޭ މަރުޙަލާއެއް ނޫން ކަމަށެވެ.

ވުމާއެކު، ދައުލަތުން ހުށައަޅާފައިވާ ހެކިތަކަށް ބަލާއިރު، މި ދައުވާއަކީ މަދަނީ މިންގަނޑުން ކުރިއަށް ގެންދެވޭނެ މައްސަލައެއްކަމަށް ގާޒީ އެ ދުވަހު ވަނީ ކަނޑައަޅުއްވާފައެވެ.

އެ ނިންމެވުން އާޒިމާގެ ފަރާތުން އިސްތިއުނާފުކޮށް، ސުޕްރީމް ކޯޓުން ވަނީ އެކަމަށް ގޮތެއް ނިންމާފައެވެ. އެގޮތުން މަދަނީ މިންގަނޑުން ދައުވާއެއް ކުރިއަށް ގެންދެވޭނެކަމަށް ނިންމާ ބާވަތުގެ ނިންމުންތަކަކީ އިސްތިއުނާފު ކުރެވޭ ބާވަތުގެ ނިންމުންތަކެއް ނޫންކަމަށް ބަޔާންކޮށް ސުޕްރީމް ކޯޓުން އެ ނުކުތާއަށް ގޮތެއް ކަނޑައަޅާފައެއް ނުވެއެވެ.

އެހެންނަމަވެސް ސުޕްރީމް ކޯޓުން އޭރު މި މައްސަލަ ނިންމިއިރު ވަނީ މަދަނީ މިންގަނޑުން މައްސަލަ ކުރިއަށް ނުގެންދެވޭނެ ފަދަ ޙާލަތްތަކެއް ބަޔާންކޮށް، އެ ކަމާއި ގުޅޭ ޤާނޫނީ އުސޫލުތަކެއް ބަޔާންކޮށްފައެވެ.

އެ އުސޫލުތަކުގެ މައްޗަށް ރިއާޔަތްކޮށް ހޯމަ ދުވަހުގެ އަޑުއެހުމުގައި އާޒިމާގެ ފަރާތުން ވަނީ ސިޓީއެއް ހުށައަޅާފައެވެ. އެ ސިޓީގައި އާޒިމާ އެދިވަޑައިގެންފައިވަނީ މި މައްސަލައިގައި މަދަނީ މިންގަނޑުން ކުރިއަށް ގެންދެވޭނެކަމަށް ގާޒީ ނިންމަވާފައިވާ ނިންމެވުން އަލުން މުރާޖައާކޮށްދެއްވައި، އަލުން އެކަމަށް ގޮތެއް ނިންމެވުމަށެވެ. އެގޮތުން އާޒިމާގެ ފަރާތުން ފާހަގަކުރައްވާ ގޮތުގައި ރައީސް ޔާމީނަށް މަނީލޯންޑަ ކުރުމުގައި އާޒިމާ މަގުފަހިކޮށްދެއްވިކަމަށް ދައުލަތުން ބުނި ނަމަވެސް، ރައީސް ޔާމީނުގެ މައްޗަށް މަނީ ލޯންޑަރިންގެ ކުށާއި އަމަލު ސާބިތުނުވާކަމަށް ސުޕްރީމް ކޯޓުން ނިންމާފައިވާ ކަމަށެވެ.

އެކަމާ ގުޅޭގޮތުން ދައުލަތުން ޙަވާލާދިނީ ޤާނޫނުލްއުޤޫބާތުގެ 30 ވަނަ މާއްދާއަށެވެ. އެގޮތުން ކުށްކުރި މީހާގެ މައްޗަށް ކުށް ސާބިތުނުވާ ޙާލަތުގައިވެސް، ކުށުގެ ބައިވެރިއަކަށް ނުވަތަ އެހީތެރިއަކަށް ދައުވާ ކުރެވިދާނެކަން އެ މާއްދާގައި ބަޔާންކޮށްފައިވާކަމަށް ދައުލަތުން ބުނެއެވެ.

އެހެންނަމަވެސް ދައުލަތުން އާޒިމާގެ މައްޗަށް އެ ދައުވާ ކޮށްފައިވަނީ މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ޤާނޫނުގެ ދަށުންކަން ބަޔާންކޮށް ދިފާއުން ވަނީ، އެއީ ޤާނޫނުލްއުޤޫބާތުގައި ބަޔާންކޮށްފައިވާ ކަންކަން އޭގެ މައްޗަށް ނުހިނގާނެ ޚާއްސަ ޤާނޫނެއްކަންވެސް ކަނޑައެޅީ ދައުލަތުން ކަމަށެވެ.

މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ނިންމެވީ، މި މައްސަލައިގައި މަދަނީ މިންގަނޑުން ކުރިއަށް ގެންދިއުމާމެދު ކްރިމިނަލް ކޯޓުން ނިންމާފައިވާ ނިންމުމަށް ބަދަލެއް ގެންނަންޖެހޭނެ ތަނެއް ނެތް ކަމަށެވެ.

ދެން މި މައްސަލައިގައި އޮންނާނީ ޝަރީއަތުގެ ކުރީގެ ހުށައެޅުންތަކަށް ދެފަރާތުން ވާހަކަ ދެއްކުމެވެ.