ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕް ފެށުމުގެ ރަސްމިއްޔާތު ކުލަގަދަކޮށް ބާއްވައިފި

މިހާރު ކުރިއަށްދާ ގދ އަތޮޅު ކައުންސިލް އެތުލެޓިކްސް ޗެމްޕިއަންޝިޕް ފެށުމުގެ ރަސްމިއްޔާތު ވަރަށް ކުލަގަދަކޮށް ބާއްވައިފިއެވެ.

ތިނަދޫ ސްޓޭޑިއަމްގައި އާދީއްތަ ދުވަހުގެ ހަވީރު ބޭއްވި މި ރަސްމިއްޔާތު ޝަރަފުވެރިކޮށްދެއްވީ މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒުއެވެ. މި ރަސްމިއްޔާތުގައި މާލޭ ސިޓީ ކައުންސިލްގެ އިސްވެރިންގެ އިތުރުން, ގދ އަތޮޅު ކައުންސިލާއި ތިނަދޫ ކައުންސިލްގެ އިސްވެރިން ބައިވެރިވެވަޑައިގަތެވެ.

މުބާރާތް ފެށުމުގެގޮތުން ދަންމަރު ރޯކުރީ، ތިނަދޫއަށް ނިސްބަތްވާ ގައުމީ ޓީމުގެ އެތުލީޓު އިބާދުﷲ އާދަމްއެވެ. މުބާރާތް ހުޅުވުމުގެ ރަސްމިއްޔާތުގައި އަބޫބަކުރު ސްކޫލު ދަރިވަރުންގެ ޚާއްސަ އައިޓަމެއްވެސް ހުށަހަޅާފައެވެ.

މުބާރާތް ހުޅުވުމުގެ ރަސްމިއްޔާތުގެ އިތުރުން ބައެއް އުމުރުފުރާތަކުގެ ދުވުންވެސް މިއަދު ހަވީރު ކުރިއަށް ގެންގޮސްފައިވެއެވެ.

މި މުބާރާތުގައި ރާއްޖޭގެ އެކި ކަންކޮޅުތަކުން 24 ސްކޫލެއްގެ ދަރިވަރުން ވާދަކުރާނެއެވެ. މުބާރާތް ހިންގުމަށް ގދ އަތޮޅު ކައުންސިލުން ހަވާލުކޮށްފައިވަނީ ރައުހަތު ސްޕޯޓްސް ކްލަބާއެވެ. މުބާރާތުގެ މީޑިއާ ޕާޓްނަރަކީ ރާއްޖެޓީވީއެވެ.