"ވިއަވަތި ރާއްޖެ" މަހާސިންތާ ފެށުމުގެ ގޮތުން ގަމުގައި ކުރިއަށް ގެންދިޔަ ކުޅިވަރު ފެސްޓިވަލްގައި ރައީސުލްޖުމްހޫރިއްޔާ ބައިވެރިވެވަޑައިގެންފި

"ވިއަވަތި ރާއްޖެ" މަހާސިންތާ ފެށުމުގެ ގޮތުން ބޭއްވި ކުޅިވަރު ފެސްޓިވަލްގައި ރައީސުލްޖޫމްހޫރިއްޔާ އިބްރާހިމް މުޙައްމަދު ޞާލިޙު ބައިވެރިވެ ވަޑައިގެންފިއެވެ.

ކުޅިވަރުތަކުގައި ރައީސް ބައިވެރިވެ ވަޑައިގެންފައިވަނީ ވިއަވަތި ރާއްޖެ މަހާސިންތާގައި ބައިވެރިވެ ވަޑައިގަތުމަށް ހޮނިހިރު ދުވަހުގެ ހަވީރު ލ. ގަމަށް ވަޑައިގަތުމަށްފަހުއެވެ. މި ކުޅިވަރުތަކުގައި ރައީސުލްޖުމްހޫރިއްޔާގެ އިތުރުން ދައުލަތުގެ ވަޒީރުންނާއި، ކުންފުނިތަކުގެ އެމްޑީންގެ އިތުރުން އިސް ފަރާތްތަކުން ވަނީ ބައިވެރިވެވަޑައިގެންފައެވެ. އަދި މީގެ އިތުރުން މި މަހާސިންތާގައި ކައުންސިލަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ މެމްބަރުންވެސް ވަނީ ބައިވެރިވެވަޑައިގެންފައެވެ.

ބޮޑުބެރުގެ ހަރަކާތްތަކާއެކު ކުރިއަށްދިޔަ ކުޅިވަރު ފެސްޓިވަލްގެ ހުރިހާ ކުޅިވަރެއްގައި ރައީސުލްޖުމްހޫރިއްޔާ ވަނީ ބައިވެރިވެވަޑައިގެންފައެވެ. ގްރޫޕްތަކުގެ މެދުގައި ކުރިއަށްގެންދިޔަ ކުޅިވަރު ހަރަކާތްތައް ގޮސްފައިވަނީ ވަރަށް ފޯރިޔާއި ވާދަވެރިކަމާއެކުއެވެ. ވަގުތު ނެތުމުގެ ސަބަބުން، ރާވާފައިވާ ހުރިހާ ކުޅިވަރެއް ކުރިއަށް ގެންގޮސްފައެއްނުވެއެވެ. އަދި ކުޅިވަރުތަކަށްފަހު ރައީސް ވަނީ މަހާސިންތާގެ ބައެއް ބައިވެރިންނާ ބައްދަލުކުރައްވާފައެވެ.

ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއެކު ބާއްވާ މި މަހާސިންތާއަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ދައުލަތުގެ ވަޒީރުންގެ އިތުރުން ލޯކަލް ގަވަރމަންޓް އޮތޯރިޓީ (އެލްޖީއޭ)އިން ކައުންސިލްތަކާ ބައްދަލުކުރައްވައި މަޝްވަރާކުރުމަށް ބާއްވާ ކޮންފަރެންސެކެވެ.