ޕޮލިއޯ ފެތުރޭތީ ނިއުޔޯކްގައި ކުއްލި ހާލަތު އިއުލާނުކޮށްފި

އެމެރިކާގެ ނިއުޔޯކް ސްޓޭޓްގައި ޕޯލިއޯ ބަލި ފެތުރޭތީ އެސްޓޭޓްގެ ގަވަނަރު ކުއްލި ހާލަތު އިއުލާނުކޮށްފިއެވެ.

އެ ސްޓޭޓްގެ ސިއްހީ އޮފިޝަލުން ވިދާޅުވާގޮތުގައި ނިއުޔޯކާއި އަދި ކައިރި ހަތަރު ކައުންޓީއެއްގެ ނަޖިސްފެން ޓެސްޓްކުރިއިރު ޕޯލިއޯ ވައިރަހަށް ޕޮޒިޓިވްވެފައިވެއެވެ. ނަޖިސް ފެނުން ޕޯލިއޯގެ އަސަރު ފެނުނުނަމަވެސް އަދި ފެނިފައިވަނީ ޕޯލިއޯގެ އެންމެ ބަލި މީހެއްކަމަށް ޚަބަރުލިބެއެވެ. އަދި ކުއްލި ހާލަތު އިއުލާނުކުރުމުގެ މަގުސަދަކީ ވެކްސިނޭޝަން ޕްރޮގްރާމް އަވަސްކޮށް، ބާރު ސްޕީޑެއްގައި ވެކްސިން ދިނުމުގެ ޕްރޮގްރާމް ހިންގުންކަމަށް އޮފިޝަލުން ވިދާޅުވެފައިވެއެވެ.

މީގެ ކުރިން އެންމެ ފަހުން ޕޯލިއޯބަލި ބަލިމީހަކު ނިއުޔޯކް ސްޓޭޓުން ފެނިފައިވަނީ މީގެ ދިހަވަރަކަށް އަހަރު ކުރިންކަމަށް ޚަބަރުލިބެއެވެ.

އެމެރިކާގައި 1955 ވަނަ އަހަރުން ފެށިގެން އައީ ޕޯލިއޯ ވެކްސިން ދެމުންނެވެ. އަދި 1979ގައި ވަނީ ޕޯލިއޯ ނެތް ގައުމެއް ގޮތުގައި އިއުލާނުކޮށްފައެވެ.

ޕޯލިއޯއަކީ އަދި ފަރުވާއެއް ހޯދިފައިނުވާ ބައްޔެކެވެ. މިބަލިޖެހުމުން މަސްތަކުގެ ބާރު ދެރަވެ ވާގިނެތޭގޮތްވެއެވެ. މިބަލިން ދިފާއުވުމަށް ކުރެވެން އޮތް ކަމަކީ ވެކްސިން ފުރިހަމަކުރުމެވެ.

ނިއުޔޯކްގެ ސްޓޭޓް ހެލްތު ޑިޕާޓްމަންޓްގެ އޮފިޝަލުން ވިދާޅުވީ، އަލަށް ފަށާ ވެކްސިން ޕްރޮގްރާމްގެ އަމާޒަކީ، ވެކްސިން ދެވުނު މީހުންގެ އަދަދު މިހާރު ހުރި 70 އިންސައްތައިގެ ރޭޓުން 90 އިންސައްތައަށް މައްޗަށް ޖެއްސުމެވެ. އޮފިޝަލުން ވިދާޅުވާގޮތުގައި ޕޯލިއޯ ބަލި ފެންނަ ކޮންމެ މީހަކަށް، ބަލިޖެހި އަދި ބަލި ދެނެނުގަނެވި އެތައްސަތޭކަ މީހުން ތިބުމަކީ އެކަށީގެންވާކަމެކެވެ.  

މިފަހަރުވެސް ނަޖިސް ފެން ތަހުލީލުކުރަން ފެށީ ނިއުޔޯކްގެ އުތުރުން އޮންނަ ރޮކްލަންޑް ކައުންޓީގައި، ވެކްސިން ނުޖަހައި ހުރި މީހަކަށް ޕޯލިއޯ ޖެހި، ހަށިގަނޑުން ވާގިނެތުމުންނެވެ. މި ކޭސްފެނުމުގެ ކުރިން ނިއުޔޯކުން ޕޯލިއޯ ބަލި މީހަކު ފެނިފައިވަނީ 2013 ވަނަ އަހަރުއެވެ.