އުނގޫފާރުގެ ފެނާއި ނަރުދަމާ އަދި ކަރަންޓުގެ ނިޒާމު ފެނަކައާ ހަވާލުކުރުމުގެ ރަސްމިއްޔާތު ބާއްވައިފި
7 ސެޕްޓެމްބަރު 2022 | ބުދަ 12:33އިންޖީނުގެ ފެނަކައާއި ރަސްމީކޮށް ހަވާލުކުރުމަށް އެއްބަސްވުމެއްގައި ސޮއިކޮށްފައިވޭ
ރ. އުނގޫފާރު ކަރަންޓުގެ ނިޒާމު ފެނަކައާ ރަސްމީކޮށް ހަވާލުކުުރުމަށް ބޭއްވި ރަސްމިއްޔާތުގެ ތެރެއިން
ރ. އުނގޫފާރުގެ ފެނާއި ނަރުދަމާ އަދި ކަރަންޓުގެ ނިޒާމު ފެނަކައާ ހަވާލުކުރުމުގެ ރަސްމިއްޔާތު ބާއްވައިފިއެވެ.
ބުދަ ދުވަހު ރ. އުނގޫފާރުގައި މި ރަސްމިއްޔާތު ބާއްވާފައިވާއިރު ކަރަންޓުގެ ނިޒާމު ފެނަކައާއި ރަސްމީކޮށް ހަވާލުކުރުމަށް އެއްބަސްވުމެއްގައި ވަނީ ސޮއިކޮށްފައެވެ. ފެނަކަގެ ފަރާތުން މި އެއްބަސްވުމުގައި ސޮއިކުރެއްވީ އެ ކޯޕަރޭޝަންގެ މެނޭޖިންގް ޑިރެކްޓަރ އަހްމަދު ސައީދު މުހައްމަދާއި ރ. އުނގޫފާރު ކައުންސިލްގެ ރައީސް އަބްދުﷲ ރަޝީދުއެވެ.
މީގެއިތުރުން ރ. އުނގޫފާރު އިންޖީނުގޭގެ މުވައްޒަފުން ފެނަކަ ކޯޕަރޭޝަނަށް ބަދަލުކުރުމާއި ގުޅިގެން އެ މުވައްޒަފުންނަށް ލިޔުން ވެސް ވަނީ ހަވާލުކޮށްފައެވެ. ޖުމްލަ 21 މުވައްޒަފުންނަށް މި ލިޔުން ހަވާލުކޮށްދެއްވީ ފެނަކައިގެ މެނޭޖިންގް ޑިރެކްޓަރ އަހްމަދު ސައީދު މުހައްމަދުއެވެ.
މި ރަސްމިއްޔާތުގައި ވާހަކަފުޅު ދައްކަވަމުން އުނގޫފާރު ކައުންސިލްގެ ރައީސް އަބްދުﷲ ރަޝީދު ވިދާޅުވީ ވަރަށް ބުރަ މަސައްކަތުގެ ނަފާ މިއަދު ލިބިގެން ހިނގައްޖެ ކަމަށެވެ. 7 ޑިސެމްބަރު 1997 ގައި ކަރަންޓުގެ ޙިދުމަތް އެ ރަށުގައި ދެވެން ފެށުނުކަން ފާހަގަކުރައްވާ އަބްދުﷲ ރަޝީދު ވިދާޅުވީ އެންމެ ރަނގަޅު ކަރަންޓުގެ ޚިދުމަތް މެދުނުކެނޑި ދެވުނު ރަށަކީ ރ. އުނގޫފާރު ކަމަށެވެ.
ލިބޭ އާމްދަނީ އަށްވުރެން ހިނގާ ޚަރަދުތައް ބޮޑުވުމުން ގޮތް ހުސްވެފައިވާކަން ފާހަގަކުރައްވާ އަބްދުﷲ ރަޝީދު ވިދާޅުވީ ޙިދުމަތްތަކަށް ލިބުނު ފައިސާއަށްވުރެން ހިނގި ޚަރަދު ބޮޑުވެފައިވާކަމަށެވެ. ރަޝިޔާ ޔޫކްރެއިން ހަނގުރަމާއާ ގުޅިގެން ދުނިޔޭގެ ތެލުގެ ބާޒާރަށް އައި ބަދަލުގެ އަސަރު އެ ރަށަށް ވެސް ކުރި ކަމަށެވެ. ސަރުކާރުން ސަބްސިޑީ ހޯދުމަށް މަސައްކަތް ކުރި ކަމަށާއި އެހެންނަމަވެސް ސަބްސިޑީ ދެވޭނީ ސަރުކާރުގެ ކުންފުންޏަކަށް އެކަނިކަން ހާމަކުރުމުން މި މަސައްކަތް ފެނަކައާ ހަވާލުކުރަން ނިންމީ ކަމަށެވެ.
ކަރަންޓުގެ ޙިދުމަތް މިހާރަށްވުރެން ރަނގަޅަށް ފެނަކައިން ފޯރުކޮށްދޭނެކަމުގެ އުންމީދު އެބައޮތް ކަމަށް ވެސް އަބްދުﷲ ރަޝީދު ވިދާޅުވިއެވެ.
