ހާއްސަ އެހީއަށް ބޭނުންވާ ފަތުރުވެރިންނަށް ފަހި މަންޒިލަކަށް ރާއްޖެ ހެދުމުގެ މަސައްކަތް ކުރަނީ
7 ސެޕްޓެމްބަރު 2022 | ބުދަ 07:00ރާއްޖެއަކީ ހުރިހާ ފަތުރުވެރިންނަށް ވެސް މިނިވަންކަމާއެކު އުޅެވޭ ތަނަކަށް ހެދުމަށް މަސައްކަތް ކުރައްވާނެ ކަމަށް ވިދާޅުވި
ޓޫރިޒަމް މިނިސްޓަރު ޑރ. އަބްދުﷲ މައުސޫމް
ރާއްޖޭގެ ފަތުރުވެރިކަން ފުޅާކުރުމަށް ހަދާފައިވާ މާސްޓަރ ޕްލޭނުގެ ދަށުން އެންމެ ބޮޑު އިސްކަމެއް ދޭ އެއް ކަމަކީ ދުނިޔޭގެ އެކި ޤައުމުތަކުން ރާއްޖެއަށް އަންނަން ބޭނުންވާ ހާއްސަ އެހީއަށް ބޭނުންވާ ފަތުރުވެރިންނަށް ފަހި މަންޒިލަކަށް ރާއްޖެ ހެދުން ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ރާއްޖޭގެ ފަތުރުވެރިކަމަށް ހާއްސަ ކޮށްގެން ބައިނަލްއަގުވާމީ ގިނަ ފަރާތްތަކުން ބައިވެރިވާ އައިއެމްޓީއެމް ފެށުމުގެ ރަސްމިއްޔާތުގައި ވާހަކަދައްކަވަމުންނެވެ. މިނިސްޓަރ ވިދާޅުވީ މި މާސްޓަރ ޕްލޭނުގެ ދަށުން ރާއްޖެއަކީ ހުރިހާ ފަތުރުވެރިންނަށް ވެސް ފަހި މާހައުލެއް އޮތް ޤައުމަކަށް ހެދުމުގެ މަސައްކަތް ކުރިއަަށްދާނެ ކަމަށެވެ. މި ޕްލޭނުގެ ދަށުން ދުނިޔޭގައި ހާއްސަ އެހިއަށް ބެނުންވާ ފަރާތްތަކަށް ފަތުރުވެރިކަމުގެ ޚިދުމަތް ދޭ އެންމެ މަގުބޫލު މަންޒިލުގެ ގޮތުގައި ރާއްޖެ ހެދުމުގެ ވިސްނުންފުޅު ގެންގުޅުއްވާ ކަމަށް ވެސް މައުސޫމް ވިދާޅުވިއެވެ.
މިކަމާ ގުޅޭގޮތުން މީޑިއާތަކާ ވާހަކަދައްކަވަމުން މިނިސްޓަރު މައުސޫމް ވިދާޅުވީ ދުނިޔޭގެ ހުރިހާ ޤައުމުތަކުގައި ވެސް އެންމެ ގިނައިން ދެކެވޭ އެއް ވާހަކައަކީ އެންމެނަށް ހަމަހަމަ ފުރުސަތުތައް ހޯދައިދިނުން ކަމަށާއި ރާއްޖެ ފަދަ ރީތި މަންޒިލެއް ތަޖުރިބާ ކުރުމުގެ ފުރުސަތު ވެސް ކޮންމެ މީހަކަށް ލިބެން ޖެހޭ ކަމަށެވެ. އަދި މިއީ މުޅި ދުނިޔޭގައި ރާއްޖެ ފަތުރުވެރިކަމުގެ ދާއިރާއިން މަޝްހުރުވަމުންދާއިރު ޒިންމާއެއްގެ ގޮތުގައި ދެކިގެން ކުރުމަށް މަސައްކަތް ކުރަމުން އަންނަ ކަމެއް ކަމަށް ވެސް މައުސޫމް ވިދާޅުވިއެވެ.
މީގެ އިތުރުން މި މަސައްކަތް ކުރުމުގައި ގޮންޖެހުންތައް އެބަހުރިކަމަށާއި އެގޮތުން އެންމެ ބޮޑު ގޮންޖެހުމަކީ ދަތުރުފަތުރުކަމަށް މައުސޫމް ވިދާޅުވިއެވެ. މި މައްސަލަ ހައްލު ކުރުމަށް އިންފްރާސްޓްރަކްޗަރ ތަރައްގީ ކުރުމުގައި ވެސް އެކަމަށް ހާއްސަ ސަމާލުކަމެއް ދޭނެ ކަމަށް ވެސް ވިދާޅުވިއެވެ.
މިނިސްޓަރު ވިދާޅުވީ މި ވިސްނުމުގައި ރާއްޖޭގެ ފަތުރުވެރިކަން ތަރައްގީ ކުރާއިރު އިންސާނާގެ ކޮންމެ ކަހަލަ ނުކުޅެދުންތެރިކަމެއް ހުރި ނަމަވެސް އެ މީހަކަށް އެ ބޭނުންވާ ޚިދުމަތެއް އެންމެ ފުރިހަމައަށް ލިބޭގޮތް ހަމަޖެހިގެންދާނެ ކަމަށެވެ.
ރާއްޖޭގެ ބައެއް ރިސޯޓުތަކުން މިހާރު ވެސް ނުކުޅެދުންތެރިކަން ހުންނަ ފަރާތްތަކަށް އެހީތެރިކަން ފޯރުކޮށްދޭކަން ފާހަގަކުރައްވައި މައުސޫމް ވިދާޅުވީ ބޭނުންވަނީ ކޮންމެ މީހަކަށްވެސް މިނިވަން ކަމާއެކު ރާއްޖޭގައި އުޅެވޭ ގޮތް ހަދައިދިނުން ކަމަށެވެ.
ކޮވިޑް-19 ގެ ހާލަތާއެކު ވެސް ރާއްޖޭން ފަތުރުވެރިކަމުގައި ދެއްކި ނަމޫނާގެ ސަބަބުން 2020 ވަނަ އަހަރު ދުނިޔޭގެ އެންމެ މަގުބޫލު މަންޒިލްގެ ލަގަބު ރާއްޖޭން ވަނީ ހޯދައިފައެވެ. އަދި 2021 ވަނަ އަހަރު ވެސް ރާއްޖޭން ވަނީ މި ލަގަބު ދިފާއު ކޮށްފައެވެ. ޓޫރިޒަމް މިނިސްޓްރީގެ އުއްމީދަކީ މި އަހަރުގެ ލަގަބު ވެސް ހޯދުމެވެ.
ރާއްޖޭގެ ފަތުރުވެރިކަން އިތުރަށް ފުޅާކޮށް ސިންދަފާތު ކުރުމަށް ކުރާ މަސައްކަތުގެ ދަށުން އަމަލު ކުރަން ފަށާ މާސްޓަރ ޕްލޭންގައި ރަށްތަކުގެ ފަތުރުވެރިކަމަށް ވެސް ވަނީ ހާއްސަ އިސްކަމެއް ދީފައެވެ. އެގޮތުން، ސަގާފަތާއި ތަރިކައަށް ހާއްސަ ފަތުރުވެރިކަމާއި ކާބޯތަކެއްޗާ ގުޅުންހުރި ފަތުރުވެރިކަން ވެސް ރާއްޖޭގައި ތައާރަފުކޮށް ފުޅާ ކުރުމަށް މި ޕްލޭނުގައި ވަނީ ހިމަނައިފައެވެ.
މި މާސްޓަރ ޕްލޭނަށް އަމަލު ކުރަން ފަށާނީ އަންނަ އަހަރުން ފެށިގެންނެވެ. މިއަހަރުގެ ޑިސެމްބަރު މަހު މި ޕްލޭން ތައާރަފު ކުރުމަށް ވަނީ ނިންމާފައެވެ.
