ހޮރައިޒަން މައްސަލައިގައި މިނިސްޓަރު މަޖިލީހުގައި ދެއްވި ޖަވާބުތަކާއި ގުޅިގެން މައްސަލައެއް ހުށަހަޅައިފި
ނޯޓިސްއާއި ގުޅިގެން އިތުރު އެއްވެސް ފިޔަވަޅެއް އަޅާފައި ނުވޭ
ހޮރައިޒަންއަށް ހޯނޑެއްދޫއިން ދޫކޮށްފައިވާ ބިން
ހޮރައިޒަން ފިޝަރީޒްއަށް ހޯނޑެއްދޫއިން މަސް ފެކްޓަރީ އަޅަން ދޫކޮށްފައިވާ ބިމުގެ އެގްރީމަންޓްގެ މައްސަލާގައި، ފިޝަރީޒް މިނިސްޓަރު ޑރ. ހުސައިން ރަޝީދު ހަސަން، މަޖިލީހުގައި ދެއްވާފައިވާ ޖަވާބުތަކާއި ގުޅޭގޮތުން މަޑަވެލި ދާއިރާގެ މެންބަރު ހުސައިން ފިރުޝާން ރައްޔިތުންގެ މަޖިލީހަށް މައްސަލައެއް ހުށަހަޅައިފިއެވެ.
މެންބަރު ފިރުޝާން ހުށަހެޅުއްވި މައްސަލައިގައި ބުނެފައިވަނީ ހޯނޑެއްދޫ ބިމުން ފިޝަރީޒް މިނިސްޓްރީއަށް ދޫކޮށްފައިވާ ބިން އެ މިނިސްޓްރީން 2005 ވަނަ އަހަރު ހޮރައިޒަން ފިޝަރީޒް ޕްރައިވެޓް ލިމިޓެޑަށް މަސް ފެކްޓްރީއެއް އެޅުމުގެ ބޭނުމަށް ކުއްޔަށް ދޫކޮށްފައިވާ ކަމަށެވެ. ނަމަވެސް މިއަދާ ހަމައަށް އެ ބިން ކުއްޔަށް ދޫކުރިތާ 17 އަހަރު ވާންދާއިރު، އެ ބިމުގައި މަސް ފެކްޓްރީއެއް އަޅައި އެތަނުން، މަސްވެރިންނަށް ޚިދުމަތް ދީފައި ނުވާ ކަމަށެވެ.
އަދި މި މައްސަލައިގައި، އެ ބިމުގައި މަސް ފެކްޓްރީ އަޅައި އޮޕަރޭޝަނަށް ނުގެނެސް ލަސްވާތީ ރައްޔިތުންގެ މަޖިލީހަށް ފިޝަރީޒް މިނިސްޓަރު ހާޒިރުކުރައްވާ އެކަމާއި ގުޅޭގޮތުން، މަޑަވެލި ދާއިރާގެ ރައްޔިތުންގެ ކަންބޮޑުވުމާއި، އަދި އުފެދޭ ސުވާލުތައް އަދި އެދޭ ހައްލުތަކުގެ ވާހަކަވެސް ތަކުރާރުކޮށް އެތައް ފަހަރެއްގެ މަތިން ދަންނަވާފައިވާނެ ކަމަށެވެ. މީގެ އިތުރުން މަޖިލީހުގެ ސުވާލު ކުރުމުގެ ފުރުސަތުގައި ތަކުރާރުކޮށް ކުރާ ސުވާލުތަކަށް މިނިސްޓަރު ދެއްވާ ޖަވާބުތަކަކީ ގަބޫލުކުރާ ގޮތުގައި އެ ކުންފުނީގެ ދިފާއުގައި ދެއްވާ ޖަވާބުތަކެއް ކަމަށެވެ. އަދި އެ ޖަވާބުތަކުން ދޭހަވަނީ، މިނިސްޓްރީގެ އަދި މިނިސްޓަރުގެ އެއްވެސް ސީރިއަސްކަމެއް އަދި ނިޔަތެއްވެސް މި މައްސަލަ ހައްލުކުރުމުގައި ނެތްކަން ކަމުގައި މި މައްސަލައިގައި ބުނެފައިވެއެވެ.
އަދި 29 އޮގަސްޓް 2022 ގައި މަޖިލީހުގައި ކުރި ސުވާލަކަށް ޖަވާބުދެއްވަމުން، މި މަސް ފެކްޓްރީ އެޅުމަށް ވެފައިވާ އެއްބަސްވުމާއި އަދި ސްކިޕްޖެކް އިންވެސްޓްމަންޓް އެގްރީމަންޓް ފޯ ޒޯން 3 އެންޑް 4 ގެ ދަށުން ހޮރައިޒަން ފިޝަރީޒް ޕްރައިވެޓް ލިމިޓެޑްގެ ފަރާތުން ހޯނޑެއްދޫގައި އަޅާ ކޯލްޑް ސްޓޯރޭޖް އަދި މަސް ގަންނަ ފެސިލިޓީގެ މަސައްކަތް ފުރިހަމަކޮށްފައި ނުވާތީ 30 ދުވަހުގެ ތެރޭގައި އެ މަސައްކަތް ފުރިހަމަކޮށް ނިންމުމަށް އަންގައި 10 ޖޫން 2020 ގައި އެއްބަސްވުމާއި ޚިލާފުވެގެން ދޭ ނޯޓިސް ހޮރައިޒަން ފިޝަރީޒް ޕްރައިވެޓް ލިމިޓެޑަށް ދީފައިވާ ކަމަށް މިނިސްޓަރު ޑރ. ހުސައިން ރަޝީދު ހަސަން ވިދާޅުވެފައިވާ ކަމަށް ވެސް މި މައްސަލައިގައި ވަނީ ބުނެފައެވެ.
ހޮރައިޒަން ފިޝަރީޒް ޕްރައިވެޓް ލިމިޓެޑުންވަނީ އެތައް ފަހަރެއްގެ މަތިން އެއްބަސްވުމާއި ޚިލާފުވެފައިކަން މަޖިލީހުގައި ފިޝަރީޒް މިނިސްޓަރު އެކި ފަހަރު މަތިން ދެއްވާފައިވާ ޖަވާބުތަކުން އެނގޭކަމަށް މި މައްސަލައިގައި ބުނެފައިވެއެވެ. އަދި ކަން މިހެންއޮތް އިރު، އެއްބަސްވުމާއި ޚިލާފުވެގެން މިއަދާ ހަމައަށް ހޮރައިޒަން އިން އެއްވެސް ފިޔަވަޅެއް އަޅާފައި ނުވާ ކަމަށާއި އެއްބަސްވުން ބާތިލްކޮށްފައި ނުވާ އިރު، ފިޝަރީޒް މިނިސްޓްރީން މި މައްސަލައިގައި އެއްވެސް ނިންމުމެއް ނުނިންމައި ތިބޭ ތިބުމަކީ ކޮރަޕްޝަނާއި ފައިދާތަކަށް ހުޅުވިގެން ތިބޭ ތިބުން ކަމަށް މެންބަރުގެ މައްސަލައިގައި ބުނެފައިވެއެވެ.
އެހެންކަމުން މި މައްސަލައިގައި ފިޝަރީޒް މިނިސްޓަރު އެއްވެސް ގޮތެއް ނުނިންމަވާ ސަބަބެއް، އަދި މިކަމުގައި ކޮރަޕްޝަނަށް މަގުފަހިވާ އެއްވެސް ވޭތޯއާއި، ހޮރައިޒަން ފިޝަރީޒް ޕްރައިވެޓް ލިމިޓެޑާއި، ފިޝަރީޒް މިނިސްޓްރީއާ ވެފައިވާ އެއްބަސްވުން ބާތިލުވެފައިވާއިރު ވެސް ރާއްޖޭގައި ހެދިފައި ހުރި ގާނޫނުތަކާއި، ގަވާއިދުތައް އަދި ހެދިފައިވާ އެންމެހައި އުސޫލުތަކުގެ ބޭރުން އެއްބަސްވުން ދަމަހައްޓާ މައްސަލަ ރައްޔިތުންގެ މަޖިލީހުގެ ކަމާއި ގުޅުންހުރި ކޮމިޓީތަކުން ބައްލަވައިދެއްވުމަށާއި މި މައްސަލައިގައި ހައްލެއް ހޯދައިދެއްވުމަށް މެމްބަރު ފިރުޝާން ވަނީ އެދިވަޑައިގަންނަވާފައެވެ.
