ވެމްކޯގެ މެނޭޖިން ޑިރެކްޓަރުގެ މަގާމަށް ޔޫސުފް ސިރާޖު ހަމަޖައްސައިފިއެވެ.

ވެމްކޯގެ އެމްޑީއަކަށް ޔޫސުފް މިއަދު އައްޔަންކޮށްފައިވާކަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ ހާމަކޮށްފައެވެ. އޭނާ އެ މަޤާމަށް އައްޔަންކުރައްވާފައި ވަނީ ބުދަ ދުވަހުއެވެ. އޭނާ މީގެ ކުރިން ހުންނެވީ ވެމްކޯގެ ޑެޕިއުޓީ މެނޭޖިން ޑިރެކްޓަރުގެ މަގާމުގައެވެ. ޔޫސުފް ސިރާޖް ވެމްކޯގެ ޑެޕިއުޓީ މެނޭޖިން ޑިރެކްޓަރަކަށް ހަމަޖައްސާފައިވަނީ 2019 ވަނަ އަހަރުގެ ނޮވެމްބަރު މަހުގެ ތެރޭގައެވެ. ބިޒްނަސް އެޑްމިނިސްޓްރޭޝަންގެ ދާއިރާ އިން މާސްޓާސް ހާސިލްކުރައްވާފައިވާ ޔޫސުފް ސިރާޖު އަކީ 2011-2014އަށް ހއ. އަތޮޅުގެ އަތޮޅު ކައުންސިލަރު ކަމާއި ރައީސް ކަންވެސް ކުރައްވާފައިވާ ބެފުޅެކެވެ.

ވެމްކޯގެ މެނޭޖިން ޑިރެކްޓަރުގެ މަޤާމަށް ބޭފުޅަކު އައްޔަންކުރައްވާފައި މި ވަނީ އެ މަޤާމު ހުސްކޮށް އޮންނަތާ 5 މަސް ދުވަސް ފަހުންނެވެ. ވެމްކޯގެ މެނޭޖިން ޑިރެކްޓަރުގެ މަގާމު ހުސްވެފައި ވަނީ މީގެ ކުރިން އެމަގާމުގައި ހުންނެވި އާދަމް މުހައްމަދު އެ މަޤާމުން ވަކި ކުރުމާއި ގުޅިގެންނެވެ. އޭނާ މަޤާމުން ވަކިކޮށްފައި ވަނީ މިދިޔަ މާޗު މަހު 14 ވަނަ ދުވަހުއެވެ. އޭގެ ފަހުން އާދަމް މުހައްމަދު ޕޯޓްސް ލިމިޓެޑްގެ މެނޭޖިން ޑިރެކްޓަރު ކަަމަށް ވަނީ އައްޔަންކޮށްފައެވެ.