ހިތަދޫ ސްކޫލަށް އާ ކޮމްޕިއުޓަރު ސިސްޓަމް ދިންކަމެއް އެނގިވަޑައިނުގެން މެންބަރު ސައީދު ސުވާލުކުރައްވައިފި

މާވަށު ދާއިރާގައި ހިމެނޭ ލ. ހިތަދޫ ސްކޫލްގެ ސްޓާފް ރޫމްގައި ހުރި ކޮމްޕިއުޓަރުތައް ހަލާކުވެގެން އޭގެ ބަދަލުގައި އާ ސިސްޓަމްތަކެއް ދިންކަމެއް މާވަށު ދާއިރާގެ މެންބަރު މުހައްމަދު ސައީދަށް އެނގިވަޑައިނުގެން އެޑިއުކޭޝަން މިނިސްޓަރ ޑރ. އައިޝަތު އަލީއާއި ސުވާލުކުރައްވައިފިއެވެ.

23 އެޕްރީލްގައި އެޑިއުކޭޝަން މިނިސްޓަރ ޑރ. އައިޝަތު އަލީއާއި ކުރެއްވި ސުވާލަކީ ލ. ހިތަދޫ ސްކޫލްގެ 37 ޓީޗަރުން ބޭނުންކުރާ ސްޓާފްރޫމުގައި ހުރީ 2 ކޮމްޕިއުޓަރު ކަމަށެވެ. އަދި ސްޓާފްރޫމްގެ އޭސީ ހަލާކުވެފައި ހުންނަތާ އަހަރެއްހާ ދުވަސްވެއްޖެ ކަމަށާއި، ސްޓާފްރޫމަށް ކޮމްޕިއުޓަރު އިތުރުކުރެއްވުމަށް މިނިސްޓަރު ގަސްތުކުރައްވަންތޯ އަދި ކުރައްވާނަމަ ކިހާ ދުވަހެއްގެ ތެރޭގައި ކޮމްޕިއުޓަރު ލިބޭނެތޯ އަދި ސްޓާފްރޫމްގެ އޭސީ ރަނގަޅުކުރުމަށް ކިހާ ދުވަހެއް ނަގާނެތޯއެވެ.

މެންބަރު ސައީދުގެ ސުވާލުގެ ޖަވާބުގައި އެޑިއުކޭޝަން މިނިސްޓަރު ވިދާޅުވީ ސަރުކާރާއި ހަވާލުވެވަޑައިގެންނެވި އިރު، ވަރަށް ގިނަ ސްކޫލްތަކެއްގެ ކޮމްޕިއުޓަރުތައް ހުރީ ބާވެފައި ކަމަށެވެ.

މިނިސްޓަރު ވިދާޅުވީ ލ. ހިތަދޫ ސްކޫލްގެ ކަންތަކުގައި އެ ސްކޫލަށް 3 ކޮޕްމިއުޓަރާއި 2 ލެޕްޓޮޕް ހަވާލުކޮށްފައިވާ ކަމަށެވެ. އަދި 2 ލެޕްޓޮޕް ހަވާލުކުރީ 2021 ވަނަ އަހަރު ކަމަށާއި، އަދި 2022 ވަނަ އަހަރު 2 ކޮމްޕިއުޓަރު ހަވާލުކުރެވުނު ކަމަށެވެ. އޭސީއާއި ކޮމްޕިއުޓަރު ކަންތައްތަކުގައި ސްކޫލްތަކަށް އެ ސާމާނު ފޯރުކޮށްދެނީ ސްކޫލުން މިނިސްޓްރީއަށް ރިކުއެސްޓެއް އައުމުން ކަމަށާއި، މެންބަރު ކުރެއްވި ސުވާލު ލިބިވަޑައިގަތުމުން ސްކޫލަށް ގުޅާ، އެހާ ދުވަހު ހަލާކުވެފައި ހުރި އިރު މިނިސްޓްރީއަށް އެކަން ހިއްސާނުކޮށްވަނީ ކީއްވެތޯ ބެއްލެވި ކަމަށެވެ.

ގުޅިގެން ކުރާ ސުވާލަށް މެންބަރު ސައީދަށް ފުރުސަތު އެރުވުމުން އެކަމާއި ގުޅިގެން އިތުރަށް ކުރައްވާނެ ސުވާލެއް ނެތްކަމަށް މެންބަރު ވަނީ ވިދާޅުވެފައެވެ.