މޫދުގައި ފަތާހަދާއިރު، މިޔަރު އުޅެނީ ހީކުރި ވަރަށް ވުރެ ގާތުގައި ކަން އެނގޭތަ؟

ތަރައްޤީވެފައިވާ ސަރަހައްދުތަކުގައި މޫދަށް އެރި އުޅޭ މީހުން އެކަން ކުރަމުން ދަނީ، ހީ ނުކުރާހާ ގާތުގައި މިޔަރުތައް އުޅޭކަން ނޭނގޭ ހާލުގައި ކަމަށް، ޔުނިވަރސިޓީ އޮފް މައޭމީގެ ތަޖުރިބާކާރުންގެ ޓީމަކުން ދާދި ފަހުން ކުރި ދިރާސާއަކުން ހާމަވެއްޖެއެވެ.

ޔުނިވަރސިޓީ އޮފް މައޭމީގެ ތަޖުރިބާކާރުންގެ ޓީމުން ވަނީ، ފްލޮރިޑާގެ ދެކުނު އައްސޭރިފަށުގެ ސަރަހައްދުގައި މިޔަރުގެ ހަރަކާތްތައް ހުރި ނެތް ގޮތް ވަރަށް ގާތުން ބަލާ، ދިރާސާކޮށްފައެވެ. ދިރާސާގެ އިސް މުސައްނިފު، އަދި ޔުނިވަރސިޓީ އޮފް މައޭމީގެ ޑައިރެކްޓަރ އޮފް ޝަރކް ރިސަރޗް އެންޑް ކޮންޒަރވޭޝަން، ނީލް ހެމަރޝްލަގް ވިދާޅުވި ގޮތުގައި ދިރާސާގެ މައިގަނޑު ބޭނުމަށްކަށް ވީ، ތަރައްޤީއާއެކު ތަޣައްޔަރުވެފައިވާ ސަރަހައްދުތަކާ މިޔަރު ދުރުހެލިވޭތޯ ބެލުން ކަމަށެވެ.

ދިރާސާ ޓީމުން ވަނީ ޕެސިވް އެކޫސްޓިކް ޓެލެމެޓްރީ ބޭނުން ކޮށްގެން، މިޔަރުތަކުގެ ހަރަކާތްތައް އެތައް އަހަރެއް ވަންދެން މޮނިޓަރ ކޮށްފައެވެ. އެގޮތުން ބުލް، ނަރސް އަދި ގްރޭ ހެމަރހެޑް – މި 3 ބާވަތުގެ މިޔަރުގައި ޓްރެކިންގް ޑިވައިސް ހަރުކޮށް، ކުދި ޓްރާންސްމީޓަރުތަކެއްގެ އެހީގައި އަލްޓްރާސައުންޑު މައުލޫމާތު އެއްކުރިއެވެ. އެ އަޑުތައް އަހާ، މައުލޫމާތު ޖަމާ ކުރަމުން ދިޔައީ ފެނުއަޑީގައި ގާއިމު ކުރި ސްޓޭޝަންތަކެއް މެދުވެރިކޮށެވެ. އެ ސްޓޭޝަންތަކާ މަދު ސަތޭކައެއްހާ ފޫޓަށް މިޔަރު ކައިރިވުމުން މައުލުމާތު އެއްކުރަން ފަށައެވެ. އަދި މިޔަރަށް ދީފައިވާ އައިޑީއާއި، ވަގުތާއި ތާރީޚުވެސް ލޮގް ކުރެއެވެ.

ހެމަރޝްލަގް ވިދާޅުވީ، ހޯދުންތަކުގެ ނަތީޖާއާ މެދު، ފަތާ މީހުން ކަންބޮޑުވާން ނުޖެހޭ ކަމަށެވެ.

ތަރައްޤީ ވެފައިވާ ސިޓީތަކާ ގުޅިފައިވާ ސަރަހައްދުތަކަކީ އަޑާއި އަލި ވައިގެ ތަޣައްޔަރުކަން މަތީ މިންވަރަކަށް ހުންނަ ސަރަހައްދަކަށް ވީ ނަމަވެސް، އެ ސަރަހައްދުތައް ދޫކޮށް މިޔަރުތައް ނުދަނީ ކީއްވެކަން ކަނޑައެޅިގެން ސާފު ނުވާ ކަމަށް ހެމަރޝްލަގް ވިދާޅުވިއެވެ.

ދުރު ނުސާފު ވަގުތުތަކާއި ފެނުން ދަށް ގަޑިތަކުގައި މޫދަށް އެރި އުޅުމާ ދުރުހެލިވެލުމަށްވެސް އޭނާ ވަނީ އިރުޝާދު ދެއްވާފައެވެ. ނަމަވެސް، ޙަޤީޤީ ނުރައްކާ އަދިވެސް އޮތީ މިޔަރުތަކަށް ކަމަށްވެސް ހެމަރޝްލަގް ވަނީ ފާހަގަ ކުރައްވާފައެވެ.