ސްރީލަންކާގެ ރައީސް ރަނިލް ވިކްރަމް ސިންގހަ އަންގާރަ ދުވަހު އެގައުމުގެ ޤާނޫނު ހަދާ މަޖިލީހަށް ހުށަހަޅުއްވާ އިންޓަރިމް ބަޖެޓުން ބައެއް ޚަރަދުތައް ކަނޑާލުމަށް ނިންމަވާފައިވާކަމަށް ވިދާޅުވެއްޖެއެވެ.

މިއަހަރުގެ ބާކީ އޮތް ދުވަސްތަކުގައި ގައުމު ހިންގާނެ ގޮތާއި ގުޅޭގޮތުން ހުށަހަޅުއްވާ އިންޓަރިމް ބަޖެޓާއި ގުޅޭގޮތުން ރަނިލް ވިދާޅުވީ ސަތޭކަ ބިލިއަނެއްހާ ރުޕީސް ދިފާއީ ކަންކަމާއި، ވެލްފެއަރ އަދި ލޯނުތައް ދެއްކުމަށް ކަނޑައަޅާފައިވާ ބައިން އުނިކުރާނެކަމަށެވެ. ސްރީލަންކާއިން މަސައްކަތްކުރަމުން އަންނަނީ ނޮވެމްބަރ މަހު ހުށަހަޅާ އަންނަ އަހަރުގެ ބަޖެޓުގައި ހިންގުމުގެ ޚަރަދު 3.9 ޓްރިލިއަން ރުޕީސް ނުވަތަ 10.9 ބިލިއަން ޑޮލަރުގައި ބެހެއްޓުމަށެވެ.

ސްރީލަންކާގެ ފިނޭންސް މިނިސްޓަރުކަންވެސް ކުރައްވަމުންގެންދަވާ ރަނިލް ހުށަހަޅުއްވާ ބަޖެޓުގައި އެންމެ މަދުން އާމްދަނީ ލިބޭ މީހުންނާއި އިގްތިޞާދީ އަނދަވަޅުގެ ސަބަބުން އެންމެ ބޮޑަށް އަސަރުކުރި މީހުންނަށް އެހީތެރިކަންވެދޭނެ ގޮތްތަކާއި ދަރަނި ކުޑަކުރުމަށްޓަކައި އަލުން ނަގާނެ ޓެކްސްތަކާއި ގުޅޭގޮތުން ހިމަނުއްވާނެއެވެ.

ރަނިލް ގެންގުޅުއްވާ މި ޕްލޭން ފުޅާ ދާއިރާއެއްގައި ނޮވެމްބަރ މަހު ހުށަހަޅުއްވާ އަންނަ އަހަރުގެ ބަޖެޓްގައި ހިމަނުއްވާނެކަމަށް ބެލެވެއެވެ.

އިންވެސްޓްމަންޓް ފަރމް އޭޝިޔާ ސެކިޔުރިޓީސް ގައި މެކްރޯއިކޮނޮމިސްޓެއްގެ ގޮތުގައި މަސައްކަތްކުރައްވާ ލާކްޝިނީ ފެރްނާންޑޯ ވިދާޅުވީ އިންޓަރިމް ބަޖެޓުން ޑެފިސިޓް ހުންނާނެކަމަށް ބެލެވެނީ 9.9 އިންސައްތައިގައެވެ. ކުރިން ބެލެވިފައިވަނީ މިއަހަރު ޑެފެސިޓް ހުންނާނީ 12 އިންސައްތައިގައި ކަމުގައެވެ.

ނަމަވެސް މިހާރު އާމްދަނީ ލިބޭ މިންވަރު ހުރި މިންވަރާއި ޚަރަދުކުރާ މިންވަރާއި ވެލްފެއަރ ކަންކަމަށް އޮތް ޑިމާންޑަށް ބަލާއިރު އެއީ ކުރަން އުނދަގޫ ކަމެއްކަމަށް އޭނާ ވިދާޅުވިއެވެ.

ލަންކާއިން ޖޫން 3، ޖޫން 28 އަދި ޖުލައި 18 ގައި ދައްކަންއޮތް އިންޓަރެސްޓް ޕޭމަންޓާއި ޖުލައި 25 ވަނަ ދުވަހު ދައްކަން އޮތް އިންޓަރެސްޓާ ނުލާ ދައްކަންއޮތް ޕޭމަންޓް އޮތީ ނުދައްކައެވެ.

ލަންކާގެ އިގްތިޞާދު ހަމައަކަށް އެޅުމަށް އިންޓަރނޭޝަނަލް މަނިޓަރީ ފަންޑު (އައިއެމްއެފް)އިން ލަންކާ ސަރުކާރާއެކު ކުރިޔަށްގެންދިޔަ ވާހަކަތައް މިދިޔަ ހަފުތާގެ ބުދަ ދުވަހު ވަނީ ނިންމާލާފައެވެ. އައިއެމްއެފުން ލަންކާއަށް 3 ބިލިއަން ޑޮލަރުދޭން ނިންމާފައިވާއިރު އެކަމަށް އެއްބަސްވެވޭނެކަމަށް ލަންކާ އޮފިޝަލުން ގަބޫލުކުރެއެވެ.

މީގެއިތުރުން އައިއެމްއެފުގެ ޓީމުން ވަނީ ލަންކާގެ 29 ބިލިއަން ޑޮލަރުގެ ދަރަނި ރީސްޓްރަކްޗަރ ކުރުމާއި ގުޅޭގޮތުން ވާހަކަދައްކާފައެވެ.

22 މިލިއަން މީހުން ދިރިއުޅެމުން އަންނަ ލަންކާއަށް މިހާރު ކުރިމަތިވެފައިވާ އިގްތިޞާދީ ކާރިސާ އާއި ގުޅިގެން އެގައުމުގެ ފޮރިން ރިޒަރވް ވަނީ ދަށަށްގޮސްފައެވެ.