ރިޔާސީ އިންތިޚާބަށް 120 މިލިއަން ރުފިޔާގެ ބަޖެޓެއް އީސީން ކަނޑައަޅައިފި
25 އޯގަސްޓު 2022 | ބުރާސްފަތި 10:59ބަޖެޓް ކަނޑައަޅާފައިވަނީ އިންތިޚާބުގައި ދެ ބުރު ބާއްވަން ޖެހިއްޖެ ހާލަތުގައި އެކަމަށްވެސް ބެލުމަށްފަހު
އިލެކްޝަންސް ކޮމިޝަންގެ ރައީސް ފުއާދު ތައުފީގު
އަންނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބަށް 120 މިލިއަން ރުފިޔާގެ ބަޖެޓެއް އިލެކްޝަންސް ކޮމިޝަން (އީސީ)ން ކަނޑައަޅައިފިއެވެ.
ރާއްޖެއެމްވީއަށް މައުލޫމާތު ދެއްވަމުން އީސީގެ ރައީސް ފުއާދު ތައުފީގު ވިދާޅުވީ، ބަޖެޓް ކަނޑައަޅާފައިވަނީ ވަރަށް ބޮޑަށް މަޝްވަރާކޮށްގެން ކަމަށެވެ.
އިލެކްޝަނުން ބަޖެޓް ކަނޑައަޅާފައިވަނީ އިންތިޚާބުގައި ދެ ބުރު ބާއްވަންޖެހިއްޖެ ހާލަތުގައި އެކަމަށްވެސް ބެލުމަށްފަހު ކަމަށާއި އިންތިޚާބުގެ ފުރަތަމަ ބުރަށް 95 މިލިއަން ރުފިޔާ، އަދި ދެވަނަ ބުރެއް ބާއްވަން ޖެހިއްޖެނަމަ 25 މިލިއަން ރުފިޔާގެ ބަޖެޓެއް ކަނޑައަޅާފައިވާނެ ކަމަށްވެސް ފުއާދު ވިދާޅުވިއެވެ.
ފުއާދު އިތުރަށް ވިދާޅުވީ މެޝިނަރީއާ އެއްޗެހި ބާ ވެފައި ހުރުމުންނާއި އެހެން ގައުމުތަކުގައި ދިރިއުޅޭ ދިވެހިންގެ އަދަދު އިތުރުވުމުން، ބަހައްޓަންޖެހޭ ފޮށިތަކުގެ އަދަދު އިތުރުވާނެކަމަށެވެ.
ބަޖެޓް ކަނޑައެޅުމަށްފަހު މިހާރު ރިޔާސީ އިންތިޚާބުގެ ކަލަންޑަރު ތައްޔާރުކުރުމުގެ މަސައްކަތް ކުރިއަށްދާކަމަށްވެސް ފުއާދު ވިދާޅުވިއެވެ. އަދި ވަރަށް އަވަހަށް ކަލަންޑަރު އާންމުކުރާނެ ކަމަށްވެސް ވިދާޅުވިއެވެ.
ރިޔާސީ އިންތިޚާބަކީ ރާއްޖޭގައި ބާއްވާ އެންމެ ބޮޑު އިންތިޚާބެވެ. މި އިންތިޚާބުގެ ވޯޓުފޮށިތައް ރިސޯޓުތަކާއި ރާއްޖޭން ބޭރުގެ ގައުމުތަކާއި އިންޑަސްޓްރިއަލް ރަށްތަކުގައި ވެސް ބަހައްޓަންޖެހޭއިރު، ވޯޓުލާ މަރުކަޒުތަކުގައި ހަރަކާތްތެރިވާ އޮފިޝަލުންވެސް އިތުރުވާނެއެވެ.
2023ވަނަ އަހަރުގެ އިންތިޚާބަށް މިހާރުވެސް ބައެއް ޕާޓީތަކުން ވަނީ ތައްޔާރުވާން ފަށާފައެވެ. އެގޮތުން، އެ ޕާޓީތަކުން ވާދަކުރާނެ ކެންޑިޑޭޓުން ކަނޑައަޅައި ޓިކެޓްވެސް މިހާރު ވަނީ ހަވާލުކޮށްފައެވެ. ރާއްޖޭގެ އެންމެ ބޮޑު ސިޔާސީ ޕާޓީ، އެމްޑީޕީ އިންވެސް މިއަހަރު އެ އިންތިޚާބަށް މަސައްކަތް ފަށާނެކަމަށް އެ ޕާޓީން ވަނީ ބުނެފައެވެ.
