މިދިޔަ އަހަރު އޯލެވެލް އަދި އޭލެވެލް ނިންމި ދަރިވަރުންގެ ތެރެއިން މަތީ އަރުތަވެރިންގެ އިނާމު 1100 އަށްވުރެ ގިނަ ދަރިވަރުންނަށް
އޯލެވެލް ހެދި 759 ދަރިވަރުން ގަދަ 10 ގައި ހިމެނުނު
ގަދަ 10 ގައި ހިމެނުނު ބައެއް ދަރިވަރުން
މިދިޔަ އަހަރުގެ މެއި/ޖޫން ގައި އޯލެވެލް އަދި އޭލެވެލް ނިންމި ދަރިވަރުންގެ ތެރެއިން 1100 އަށްވުރެ ގިނަ ދަރިވަރުން ގަދަ 10 ގައި ހިމެނިއްޖެއެވެ.
މިއީ ރާއްޖޭގެ ތާރީހުގައި ވެސް އެންމެ ގިނަ އަދަދެއްގެ ދަރިވަރުން ގަދަ 10 ގައި ހިމެނުނު ފަހަރެވެެ. އެގޮތުން، ސާނަވީ އިމްތިހާނު ހެދި ދަރިވަރުންގެ ތެރެއިން 759 ދަރިވަރުން ގަދަ 10ގައި ހިމެނިފައިވާއިރު މަތީ ސާނަވީ އިމްތިހާނު ހެދި ދަރިވަރުންގެ ތެރެއިން 348 ދަރިވަރުން ވަނީ ގަދަ 10ގައި ހިމެނިފައެވެ.
ސާނަވީ އިމްތިހާނުތަކުންނާއި މަތީ ސާނަވީ އިމްތިހާނުތަކުން އެންމެ ރަނގަޅު ނަތީޖާ ހާސިލު ކުރާ ދަރިވަރުން ފާހަގަކޮށް ކޮންމެ އަހަރަކު "މަތީ އަރުތަވެރިންގެ އިނާމު" ސަރުކާރުން ދެއެވެ. މި ޖަލްސާ ބުދަ ދުވަހުގެ ރޭ ބާއްވާފައިވާއިރު އިނާމު ހޯދި ދަރިވަރުންގެ އަދަދު އިތުރުވެ، ޖަލްސާ ވަނީ ދެ ބަޔަކަށް ބަހާލައިފައެވެ. އެހެންވެ ބުރާސްފަތި ދުވަހުގެ ރޭ ވެސް މަތީ އަރުތަވެރިންގެ އިނާމު ދިނުމުގެ ޖަލްސާ ކުރިއަށްދާނެއެވެ.
އެޑިއުކޭޝަން މިނިސްޓްރީގެ ތަފާސްހިސާބުތައް ދައްކާގޮތުގައި 2020-2021 ގައި އޯލެވެލް ހެދި ދަރިވަރުންގެ ތެރެއިން 759 ދަރިވަރުން ގަދަ 10ގައި ހިމެނިފައިވާއިރު މީގެ ތެރެއިން 13 ދަރިވަރުން ވަނީ 5 މާއްދާއިން ދުނިޔޭގެ އެންމެ މޮޅު 10 ދަރިވަރުންގެ ތެރޭގައި ހިމެނިފައެވެ. އެ އަހަރު އޭލެވެލް ހެދި ދަރިވަރުންގެ ތެރެއިން 348 ދަރިވަރުން ގަދަ 10ގައި ހިމެނުނުއިރު މީގެ ތެރެއިން 13 ދަރިވަރުން ވަނީ 8 މާއްދާއިން ދުނިޔޭގެ އެންމެ މޮޅު 10 ދަރިވަރުންގެ ތެރޭގައި ހިމެނިފައެވެ.
2020-2021 އަހަރުގެ އޯ ލެވެލް އަދި އޭލެވެލް އިމްތިހާނުތައް ހެދި ދަރިވަރުންނަކީ ކޮވިޑް-19ގެ ހާލަތަށްފަހު އެންމެ ފުރަތަމަ މި އިމްތިހާނުތައް ހެދި ދަރިވަރުންނެވެ. އެ ދަރިވަރުންނަށް ދިމާވި ގޮންޖެހުންތަކާއެކު ވެސް ރަނގަޅު ނަތީޖާއެއް ނެރެދީ ރާއްޖޭގެ ތާރީހުގައި ވެސް ތަޢުލީމީ ދާއިރާއިން އެންމެ ކާމިޔާބު އަހަރަށް ވަނީ ހަދައިދީފައެވެ.
ބުދަ ދުވަހު ބޭއްވި މަތީ އަރުތަވެރިންގެ އިނާމު ދިނުމުގެ ޖަލްސާ ޝަރަފުވެރިކޮށްދެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހުއެވެ. އެމަނިކުފާނުގެ އަރިހުގައި އަނބިކަނބަލުން ފަޒުނާ އަހުމަދު އާއި ނައިބު ރައީސް ފައިސަލް ނަސީމް އާއި އެޑިއުކޭޝަން މިނިސްޓަރު ޑރ. އައިޝަތު އަލީގެ އިތުރުން ދައުލަތުގެ އެހެނިހެން ބައެއް ވަޒީރުންނާއި ސަރުކާރުގެ ބައެއް އިސް ބޭފުޅުން ވެސް ބައިވެރިވެވަޑައިގެންނެވިއެވެ.
