މިދިޔަ ދެ އަހަރު ދަރިވަރުން ކުރި ބުރަ މަސައްކަތަކީ، ދަތި އުނދަގޫ ޙާލަތްތަކަށް ކެތްތެރިވެ، ހިތްވަރާއެކު ކަންތައްތަކާ ކުރިމަތިލުމުގެ ނަމޫނާއެއް: ރައީސް

މިދިޔަ ދެ އަހަރު ދަރިވަރުން ކުރި ބުރަ މަސައްކަތަކީ، އަދި ދަތި އުނދަގޫ ޙާލަތްތަކަށް ކެތްތެރިވެ، ހިތްވަރާއެކު އާ ޢަޒުމެއްގައި ކަންތައްތަކާ ކުރިމަތިލުމުގެ ވަރަށް ފުރިހަމަ ނަމޫނާއެއް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

މަތީ އަރުތަވެރިންގެ އިނާމު ދިނުމުގެ ޖަލްސާ ޝަރަފްވެރިކޮށްދެއްވައި ބުދަ ދުވަހުގެ ރޭ ވާހަކަފުޅު ދައްކަވަމުން ރައީސް ވިދާޅުވީ ކޮވިޑް-19ގެ ދަތިކަމުގެ ތެރޭގައި، ކިޔެވުން ކުރިއަށް ގެންދިޔައިރު، ދަރިވަރުން ވަރަށް އައު ކަންތައްތައް ތަޖުރިބާކޮށްފައިވާނެކަމަށެވެ. ބައެއް ދުވަސްތަކުގައި ސްކޫލަށް ހާޒިރުވެ މާސްކް އަޅައިގެން ދުރުދުރުގައި ތިބެގެން، އަދި ބައެއް ދުވަސްތަކުގައި ގޭގައި ތިބެ އޮންލައިންކޮށް ކިޔެވުމަކީ މުޅިން އައު ތަޖުރިބާއެއްކަމަށް ރައީސް ވިދާޅުވިއެވެ.

Advertisement

މީގެއިތުރުން ރައީސް ވިދާޅުވީ މިފަހަރުގެ އަރުތަވެރިންގެ ކާމިޔާބީ ރަމްޒުކޮށްދެނީ، ދިރިއުޅުމުގެ ޢަމަލީ މައިދާނަށް ކުދިން ތައްޔާރުކޮށްދިނުމުގައި ސްކޫލްތަކުންނާއި ބެލެނިވެރިން ކުރި ބުރަ މަސައްކަތްކަމަށެވެ. ކޮވިޑްގެ ދަތިކަމުގެ ތެރޭގައި ސްކޫލްތަކުންނާއި ބެލެނިވެރިން އުފުލި ބުރަ އިހުސާސްވެވަޑައިގަންނަވާކަމަށް ރައީސް ވިދާޅުވިއެވެ.

ރަނގަޅު ނަތީޖާއާއި ފޮނި ކާމިޔާބީ ޙާޞިލްކުރާއިރު، ހަނދާނުގައި ބަހައްޓަންޖެހޭ ވަރަށް މުހިންމުކަމެއް އެބައޮތްކަމަށް ރައީސް ވިދާޅުވިއެވެ. އެއީ މޮޅު ކުއްޖަކަށް ވަނީ، ފޮތުގެ ތަޢުލީމުން ރަން ވަނަ ޙާޞިލު ކުރުމުން އެކަނި ނޫންކަންކަމަށެވެ. މާތް ﷲ ކޮންމެ މީހަކަށް ދެއްވި 20 އިނގިލި ވެސް، އެއް އިނގިލި އަނެއް އިނގިއްޔާ ތަފާތުކަމަށާއި އެހެންވިޔަސް، އެއިން ކޮންމެ އިނގިއްޔަކީ އޭގެ ޒާތުގައި މުހިންމު ގުނަވަނެއްކަމަށް ރައީސް ވިދާޅުވިއެވެ.

ހަމަ އެ ތަފާތު އިންސާނުންގެ މެދުގައިވެސް ހުންނާނެ.ކަމަށާއި އެ ތަފާތާއެކު ކޮންމެ ކުއްޖެއްގެ ކިބައިގައިވެސް ތަފާތު ޤާބިލުކަމެއް ހުންނާނެކަމަށް ރައީސް ވިދާޅުވިއެވެ. ރައީސް ވިދާޅުވީ ދައުލަތުގެ މުއައްސަސާތަކުންނާއި، މައިންބަފައިންނާއި ބެލެނިވެރިން ވެސް، މަސައްކަތް ކުރަންވީ، ކުދިންގެ ކިބައިގައި ހުރި އެފަދަ ހުނަރުވެރިކަމާއި ޤާބިލުކަން ދެނެގަނެ، އެ ހުނަރު އިތުރަށް ތަރައްޤީކޮށްދިނުމަށެވެ.