ސަރުކާރުގެ ލޯނުތަކަށް މަޖިލީހުން ހުއްދަ ހޯދަން ޖެހޭ ބިލު ބޭރުކޮށްލައިފި
24 އޯގަސްޓު 2022 | ބުދަ 10:4941 މެންބަރުން ވަނީ ބިލު ބަލައިގަންނަން ނުފެންނަ ކަމަށް ވޯޓު ދެއްވާފަ
މަޖިލިސް
ސަރުކާރުން ލޯނު ނެގުމުގެ ކުރިން ރައްޔިތުންގެ މަޖިލީހުގެ ހުއްދަ ހޯދަން ޖެހޭ ގޮތަށް މަހިބަދޫ ދާއިރާގެ މެންބަރު އަހްމަދު ތޯރިގް ހުށަހެޅުއްވި ބިލު ބަލައިނުގަނެ މަޖިލީހުގެ ތަޅުމުން ބޭރުކޮށްލައިފިއެވެ.
ދައުލަތުގެ މާލިއްޔަތު ގާނޫނަށް އިސްލާހު ގެނައުމަށް ތޯރިގް ހުށަހެޅުއްވި ބިލު ބަލައިގަތުމާމެދު ގޮތެއް ނިންމުމަށް ނެގި ވޯޓުގައި 41 މެންބަރުން ވަނީ ބިލު ބަލައިގަންނަން ނުފެންނަ ކަމަށް ވޯޓު ދެއްވާފައެވެ. ބިލު ބަލައިގަންނަން ފެންނަ ކަމަށް ވޯޓު ދެއްވީ ޖުމުލަ 5 މެންބަރުންނެވެ. އެހެންކަމުން އެ ބިލް ބަލައިގަންނަން ފާހެއް ނުވިއެވެ.
ތޯރިގް ހުށަހެޅުއްވި އެ ބިލަކީ ކޮވިޑް-19 އާއި ރަޝިއާ/ޔޫކްރެއިން ހަނގުރާމައިގެ ސަބަބުން ދުނިޔޭގެ އިގްތިސޯދު ދަށްވެފައިވާ ހާލަތެއްގައި ކޮންމެހެން ނަގަން ޖެހޭ ލޯނެއް ނޫނީ ނުނަގާކަން ކަށަވަރު ކުރުމުގެ މަގްސަދުގައި ހުށަހެޅުއްވި ބިލެއް ކަމަށް އެ ބިލް ހުށަހަޅުއްވަމުން އޭނާ ވަނީ ވިދާޅުވެފައެވެ. ސަރުކާރުން ނަގާ ލޯނުތަކުގައި، ގެރެންޓީ އެއްގެގޮތުން، ކޮންމެ ބާވަތެއްގެ ދަރަންޏެއް ނެގިނަމަވެސް އެކަމުގެ ސަބަބުން އިގްތިސޯދަށް ކުރާ އަސަރު ދިރާސާކޮށް ފިނޭންސް މިނިސްޓަރު ރިޕޯޓެއް ތައްޔާރުކުރަން ވާނެ ކަމަށް ތޯރިގް ހުށަހެޅުއްވި ބިލުގައިވެއެވެ. އަދި މިނިސްޓަރު ތައްޔާރު ކުރާ ދިރާސާ ރިޕޯޓް ރައްޔިތުންގެ މަޖިލީހަށް ފޮނުވަން ޖެހޭނެ ކަމަށާއި އެ ދަރަންޏެއް ނެގޭނީ މަޖިލީހުގެ ޖަލްސާއަކަށް ހާޒިރުވުމަށް ފަހު އެ ކަމަށް ނެގޭ ވޯޓުގައި ބައިވެރިވާ މެންބަރުންގެ އަގުލަބިއްޔަތު ފާސްކޮށްގެން ކަމަށް އެ ބިލުގައި ވަނީ ބުނެފައެވެ.
