ބްރިޖް ޕްލެޓްފޯމް ވިލިމާލެ ފަރަށް އަރައި ފަރަށް ގެއްލުން ލިބެމުންދާތީ ކުއްލި މައްސަލައެއް ހުށައަޅައިފި
22 އޯގަސްޓު 2022 | ހޯމަ 11:42ބްރިޖް ޕްރޮޖެކްޓްގެ މަސައްކަތް ކުރަމުންދާ ފެންވަރު ސަރުކާރުގެ ކަމާގުޅުންހުރި އިދާރާތަކުން ވަރަށް ކައިރިން ބަލައި މިހާރުން މިހާރަށް ވެސް މުހިންމު ފިޔަވަޅިތަކެއް އަޅަން އެދިފައިވޭ
ތިލަމާލެ ބްރިޖު އެޅުމަށް ބޭނުންކުރާ ޕްލެޓްފޯމެއް ފަަރަށް އަރައިފި
ތިލަމާލެ ބްރިޖުގެ މަސައްކަތް ކުރުމަށް ބޭނުންކުރަމުންދިޔަ ޕްލެޓްފޯމް އެއް ވިލިމާލެ ފަރަށް އަރައި އެ ފަރަށް ގެއްލުން ލިބެމުންދާ މައްސަލައާއި ގުޅިގެން، ރައްޔިތުންގެ މަޖިލީހަށް ކުއްލި މައްސަލައެއް ހުށައަޅައިފިއެވެ.
މި މައްސަލަ ރައްޔިތުންގެ މަޖިލީހަށް ހުށައެޅުއްވީ ވިލިމާލެ ދާއިރާގެ މެންބަރު އަހުމަދު އުޝާމް އެވެ. އުޝާމު ހުށައެޅުއްވި މައްސަލައިގައި ވިދާޅުވެފައިވަނީ، މިއީ ތިލަމާލެ ބްރިޖުގެ މަސައްކަތްކުރުމަށްޓަކާ ބޭނުންކުރަމުންދިޔަ ޕްލެޓްފޯމް އެއް 16 އޮގަސްޓްގައި ވިލިމާލެ ފަރަށް އަރައި، ވިލިމާލޭގެ ފަރަށް ބޮޑެތި ގެއްލުންތަކެއް ވަމުން އަންނަ އިރު، މި ހާދިސާއަށް އެއް ހަފްތާވާން ކައިރިވާއިރު އަދި މިހާތަނަށް ވެސް އެ ޕްލެޓްފޯމް ފަރުމަތިން ނެގުމަށްޓަކައި ބްރިޖުގެ މަސައްކަތްކުރާ ކުންފުނިން ވެސް އަދި ސަރުކާރުގެ އިދާރާތަކުން ވެސް އެކަށީގެންވާ މަސައްކަތް ކުރަމުން ނުދާ ކަމަށެވެ.
މިކަމުގެ ސަބަބުން އެ ސަރަހައްދުގެ ތިމާވެއްޓަށް އިއާދަނުކުރެވޭވަރުގެ ބޮޑެތި ގެއްލުންތަކެއް ވަމުން އަންނާތީ، އެ ފަރަށް ލިބެމުންދާ ގެއްލުންތައް ހުއްޓުވުމަށްޓަކާ އެ ޕްލެޓްފޯމް ފަރުމަތިން ނެގުމުގެ ކަންކަން ސަރުކާރުގެ ފަރާތުން މިހާރުން މިހާރަށް ފެށުމަކީ މުހިންމު ކަމެއް ކަމަށް ފެންނާތީއާއި، މިފަދަ ކަންކަން ތަކުރާރުވިޔަ ނުދިނުމަށްޓަކާ ބްރިޖް ޕްރޮޖެކްޓްގެ މަސައްކަތް ކުރަމުންދާ ފެންވަރު ސަރުކާރުގެ ކަމާގުޅުންހުރި އިދާރާތަކުން ވަރަށް ކައިރިން ބަލައި މިހާރުން މިހާރަށް ވެސް މުހިންމު ފިޔަވަޅުތަކެއް އަޅަންޖެހޭކަމަށް ފެންނަ ކަމަށް ވިދާޅުވެފައިވެއެވެ.
އަދި މިކަމުގައި ހުރި ކަންބޮޑުވުންތައް ރައްޔިތުންގެ މަންދޫބުން މެދުވެރިކޮށް ސަރުކާރާއި ދައުލަތުގެ ކަމާފުޅުންހުރި މުއައްސަސާތަކުގެ ސަމާލުކަމަށް ގެނައުމަށްޓަކައި ހުށައަޅާ މައްސަލައެއް ކަމަށް އުޝާމް ހުށަހެޅުއްވި މައްސަލައިގައި ވިދާޅުވެފައިވެއެވެ.
އޮގަސްޓް 16 ވަނަ ދުވަހު ފަރަށް އެރި ބްރިޖް ޕްލެޓްފޯމް އާއި ގުޅޭގޮތުން ޕްލޭނިން މިނިސްޓްރީ އިން ބުނީ ވިލިމާލޭ ފަރު މައްޗަށް އަރާފައިވާ އެ ޕްލެޓްފޯމް ނެގުމުގެ މަސައްކަތް ކުރަމުން އަންނަކަމަށެވެ.
