ނުޙައްޤުން މީހުން މެރުމާއި މީހުންގެ ނަފްސަށް ގެއްލުން ދިނުން ހުއްޓުމަށް އޮތް ނިހާއީ ހައްލަކީ އިލާހީ ޝަރީއަތް ތަންފީޒު ކުރުން: ޚުތުބާ
19 އޯގަސްޓު 2022 | ހުކުރު 08:09ޙައްގަކާއި ނުލައި އިންސާނަކު ޤަތުލު ކުރުމަކީ އެންމެ ބޮޑެތި ފާފަތަކުގެ ތެރެއިން ވާކަމެއް
ހުކުރު ނަމާދު ކުރިއަށްދަނީ
ނުޙައްޤުން މީހުން މެރުމާއި މީހުންގެ ނަފްސަށް ގެއްލުން ދިނުން ހުއްޓުމަށް އޮތް ނިހާއީ ހައްލަކީ އިލާހީ ޝަރީއަތް ތަންފީޒުކޮށް، ޤިސާސް ހިފުން ކަމަށް ހުކުރު ޚުތުބާގައި ބުނެފިއެވެ.
ރާއްޖޭގެ ހުރިހާ ރަށެއްގައި "ނަފްސުގެ ހުރުމަތްތެރިކަން" މި މައުޝޫއަށް ހުކުރު ދުވަހު އިއްވި ޚުތުބާގައި ބުނީ ﷲ ތަޢާލާ ހެއްދެވި ގިނަ މަޚުލޫގުންގެ މައްޗަށް އިންސާނާ މާތްކުރައްވައި މަތިކުރައްވައި، އުޑުތަކާއި ބިމުގައި ވާހައެއްްޗެއް އިންސާނާގެ ޚިދުމަތުގައި ލައްވާފައިވުމުން އިސްލާމް ދީނުގެ ނަޒަރުގައި އިންސާނާގެ ނަފްސަކީ ވަރަށް ބޮޑަށް ހުރުމަތްތެރިވެގެންވާ އެއްޗެއްކަން އެނގޭ ކަމަށެވެ. އަދި ޙައްގަކާއި ނުލައި އިންސާނަކު ޤަތުލު ކުރުމަކީ އެންމެ ބޮޑެތި ފާފަތަކުގެ ތެރެއިން ވާކަމަކަށްވި ނަމަވެސް، މިއަދު މުޖުތަމަޢުން މި ބޮޑު ފާފައަށް އަރައިގަތުން ދެކެނީ ވަރަށް އާދައިގެ ކުޑަ ކަމެއްގެ ގޮތުގައި ކަމަށް ވަނީ ބުނެފައެވެ.
ހަނގުރާމައިގެ ހާލަތުގައި ވެސް ކުރުން ޙަރާމް ކުރައްވާފައިވާ އަމަލެއް ކަމަށްވާ ގުނަވަންތައް ބުރިބުރިކޮށް ވަކިކުރާކަން ފާހަގަކޮށް ޚުތުބާގައި ބުނެފައިވަނީ ނުޙައްގުން އެންމެ ނަފުސެއް ވެސް މަރާލުމަކީ ހުރިހާ އިންސާނުން މަރާލުން ފަދަ ނުބައިކަން ބޮޑު ޢަމަލެއް ކަމަށް ކީރިތި ޤުރުއާނުގައި ބަޔާން ކުރައްވާފައިވާ ކަމަށެވެ.
ދިރިހުރުމުގެ ޙައްގަކީ އިންސާނާގެ އެންމެ އަސާސީ ޙައްގުކަން ފާހަގަކޮށް ހުކުރު ޚުތުބާގައި ވަނީ އެ ޙައްގަށް ހުރުމަތްކޮށް ހިތަނީ ކިތައް މީހުންތޯ ސުވާލު އުފައްދާފައެވެ. ޙައްގަކާ ނުލައި އެންމެންގެ ކުރިމަތީގައި އަނިޔާކޮށް، މީހުން މަރަމުންދާއިރު އަނިޔާ ލިބޭ މީހާ ދިފާއުނުކޮށް ކުޅި ބަލަން ތިބެނީ ކިތައް މީހުންތޯ ސުވާލު އުފައްދައި ޚުތުބާގައި ބުނެފައިވަނީ މިއީ ހިތުގައި ރަހުމުހުރި ކޮންމެ މީހަކު ކަރުނަ އަޅައި ރޯން ޖެހޭ ވަރުގެ ހިތާމަ ހުރި ކަމެއް ކަމަށެވެ.
އިސްލާމް ދީނާއި ބައިނަލްއަގުވާމީ މުއާހަދާތަކުގައިވެސް އިންސާނުންގެ ފުރާނަ ހިމާޔަތްކުރުމުގެ ޙައްގު ލިބިދީފައިވާއިރު ނުޙައްގުން މީހުން މެރުމާއި މީހުންގެ ނަފުސަށް ގެއްލުންދިނުން ހުއްޓުމަށް އޮތް ނިހާއީ ހައްލަކީ އިލާހީ ޝަރީއަތް ތަންފީޒުކޮށް، ޤިސާސް ހިފުން ކަމުގައި ކީރިތި ޤުރުއާނުގައި މާތް ﷲ އަންގަވާފައިވާ ކަމަށް ޚުތުބާގައި ވަނީ ބުނެފައެވެ.
ދީނުގައި ކަންތައްތަކެއް މަނާކުރައްވާފައިވަނީ އިންސާނާގެ ހެވާ ލާބައަށްޓަކައިކަން ފާހަގަކޮށް ޚުތުބާގައި ބުނެފައިވަނީ ހަވާ ނަފުސައް ހެއްލި ކަންކަން ކުރުމުން ފަހުން ދެރަވެ، ހިތާމަ ކުރަން ޖެހޭނެ ކަމަށެވެ. އަދި މަރު އައިސް ބައްދަލުވުމުގެ ކުރިން ތައުބާވެ، ފާފަތަކާ ދުރުހެލިވުމަށް ޚުތުބާގައި ވަނީ އިލްތިމާސްކޮށްފައެވެ.
