3 ވަނަ ދައުރުގެ ފުރަތަމަ ޖަލްސާ ބުރާސްފަތި ދުވަހު، މިނިސްޓަރ އަސްލަމާއި ސުވާލު ކުރާނެ

2022 ވަނަ އަހަރުގެ ތިންވަނަ ދައުރުގެ ފުރަތަމަ ޖަލްސާ ބުރާސްފަތި ދުވަަހަށް ތާވަލުކޮށްފިއެވެ.

ރައްޔިތުންގެ މަޖިލީހުގެ އިދާރާއިން ބުނީ ޖަލްސާ އޮންނާނީ ބުރާސްފަތި ދުވަހުގެ ހެނދުނު 9:00 ގައި ކަމަށެވެ.

ބުރާސްފަތި ދުވަހުގެ ޖަލްސާއަށް ވަނީ ޕްލޭނިންގ މިނިސްޓަރު މުހައްމަދު އަސްލަމާއި ސުވާލުކުރުމަށް އެޖެންޑާކޮށްފައެވެ. ޕްލޭނިންގ މިނިސްޓަރ އަސްލަމާއި ސުވާލުކުރެއްވުމަށް ހުށަހަޅުއްވާފައިވަނި އުނގޫފާރު ދާއިރާގެ މެންބަރު މުހައްމަދު ވަހީދެވެ. މެންބަރު ވަހީދު ކުރައްވާ ސުވާލަކީ ރ. އުނގޫފާރު ބިން ހިއްކުމަކީ ރައީސުލްޖުމްހޫރިއްޔާ ވެވަޑައިގެންފައިވާ ވައުދުފުޅެއް ކަމަށެވެ. އަދި މިދިޔަ 2 އަހަރުގެ ބަޖެޓުގައި ހިމެނި އެމްޓީސީސީއާއި ކޮންޓްރެކްޓްވެސް ކުރެވިފައިވާ ކަމަށެވެ. އަދި މާފަހުން ކޮންޓްރެކްޓް ކުރެވުނު މަޝްރޫއުތައް ފަށާއިރު އުނގޫފާރު ބިން ހިއްކުމުގެ އަމަލީ މަސައްކަތް ލަސްވަނީ ކީއްވެގެންތޯއެވެ.

މަޖިލީހުގެ ރައީސްގެ މޭޒުން ހުށަހަޅާ ކަންކަމުގެ ތެރޭގައި ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 115 ވަނަ މާއްދާގެ (ދ) އާއި، ދިވެހިރާއްޖޭގެ ފޮރިން ސަރވިސް ގާނޫނުގެ 14 ވަނަ މާއްދާފައިވާ ގޮތުގެ މަތިން، 6 ގައުމަކަށް ދިވެހިރާއްޖެއިން ކަނޑައަޅުއްވާފައި ހުންނަވާ ނޮން-ރެސިޑެންޓް ސަފީރުކަމަށް އައިޝަތު ޝާން ޝާކިރު، ހަމަޖެއްސެވުމަށްޓަކައި ރައީސުލްޖުމްހޫރިއްޔާ ފޮނުވާފައިވާ މައްސަލަ ދިރާސާކޮށް ގޮތެއް ނިންމުމަށް އެ މައްސަލަ ދާއިމީ ކޮމިޓީއަށް ފޮނުވުމެވެ.

ކޮމިޓީން 3 ކަމެއް ހުށަހަޅަން ވަނީ އެޖެންޑާ ކުރެވިފައެވެ. އެއީ އެމެރިކާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުކަމަށް ބޭފުޅަކު ހަމަޖެއްސުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ މައްސަލައާއި، މެލޭޝިއާއަށް ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރުކަމަށް ބޭފުޅަކު ހަމަޖެއްސުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ މައްސަލަ އަދި އިންޑިއާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފިރުކަމަށް ބޭފުޅަކު ހަމަޖެއްސުމަށްޓަކައި ރައީސުލްޖުމްހޫރިއްޔާ ފޮނުއްވާފައިވާ މައްސަލ، ހާރިޖީ ގުޅުންތަކުގެ ކޮމިޓީން ދިރާސަކޮށް ނިންމިގޮތުގެ ރިޕޯޓު ހުށަހެޅުމެވެ.