ޔޫޕީއާރުން ރާއްޖެ އަށް 187 ރިކޮމެންޑޭޝަން!

އދގެ ޔުނިވަރސަލް ޕީރިއަޑިކް ރިވިއު (ޔޫޕީއާރު) އިން ވަނީ 187 ރިކޮމެންޑޭޝަން ނުވަތަ ހުށަހެޅުންތައް ހުށަހަޅާފައެވެ. އެ 187 ހުށައެޅުމުގެ ތެރެއިން 11 ހުށައެޅުމަކީ މިހާރު ވެސް ދައުލަތުން ތަންފީޒު ކުރާ ކަންކަމެވެ. އޭގެ ތެރޭގައި އެންމެ ގިނައީ އަމަން އަމާންކަމާއި އަދުލު އިންސާފްއާއި ގުޅޭ ރިކޮމެންޑޭޝަން ތައްކަން ފާހަގަކޮށްލެވެއެވެ. މީގެ އިތުރުން އިންސާނީ ހައްގުތަކުގެ ދާއިރާތަކުގެ ތެރެއިން ޤާނޫނީ ނިޒާމް އިތުރަށް ހަރުދަނާ ކުރުމާއި، އަންހެނުން އަދި ހަވާސާވެފައިވާ ފަރާތްތައް ހިމާޔަތްކުރުމާއި ގުޅުން ހުރި ރިކޮމެންޑޭޝަންތައް ޔޫޕީއާރުއިން ވަނީ ހުށަހަޅާފައެވެ.

ޔޫޕީއާރުން ރާއްޖެ އަށް ހުށަހެޅި ކަންކަމުގެ ތަފްސީލަށް ބަލާއިރު އިދާރާތަކުގެ އޮނިގަނޑު ރަނގަޅުކޮށް ހަރުދަނާ ކުރުމަށް ހުށަހަޅާފައިވާ ހުށހަޅުންތައް ހުށަހަޅާފައިވެއެވެ، އޭގެ ތެރޭގައި އަޅުވެތިކަމާއި، އިންސާނީ ވަގުފާރިކުރުމާއި، ކުޑަކުދިން ލައްވާ ހަށިވިއްކުމުގެ ވިޔަފާރިކުރުވުމާއި، މަޖުބޫރުކޮށްގެން ކައިވެރިކުރުވުން ފަދަ ކަންކަން ނުހިނގާކަން ޔަގީން ކުރުމަށް ހަރުދަނާ އުސޫލުތަކެއް އެކުލަވާލުމަށް ވަނީ ހުށަހަޅާފައެެވެ. އަދި ހަމަ އެއާއި އެކު ގުޑް ގަވަނަންސް އާއި ކޮރަޕްޝަން، ހިޔާލް ފާޅުކުރުމުގެ މިނިވަންކަން އަދި މައުލޫމާތު ހޯދާ ލިބިގަތުމުގެ ހައްގާއި ގުޅޭ ގޮތުން ވެސް ޔޫޕީއާރު ރިޕޯޓްގައި ރިކޮމެންޑޭޝަންތައް ވަނީ ހިމަނާފައެވެ.

އަދި އަދުލު އިންސާފާއި އިންސާނީ ހައްގުތަކުގެ ދާއިރާ އިން އިންސާނީ ހައްގުތައް ހިމާޔަތް ކުރުން ތަންފީޒުކުރުން ހަރުދަނާކުރުމާއި، އިންސާނީ ހައްގުތައް ހިމާޔަތް ކުރުމަށް އެކުލަވާލާފައިވާ ނިޒާމް ހަރުދަނާކޮށް ވަރުގަދަކުރުމާއި، އެޗްއާރުސީއެމްގެ ވަސީލަތްތައް އިތުރުކުރުމުގެ އިތުރުން، ހައްގުތައް ހިމާޔަތް ކުރެވޭކަން ކަށަވަރުކުރަން އިތުރު ހުށަހެޅުންތައް ވަނީ ހުށަހަޅާފައެވެ. ހަމައެހެންމެ މައްސަލަތަކުގައި ހައްޔަރުކުރާ މީހުންގެ ހައްގުތައް ހިމާޔަތްކުރުމާއި ހައްޔަރު ކުރާމީހުންނާއި މެދު ނުހައްގުން ހިނގާ އަމަލުތަކާއި ލާއިންސާނީ އަމަލުތައް ނުހިނގާކަން ޔަގީން ކުރުމަށް ކުރެވިދާނެ ކަންކަމާއި ގުޅޭ ރިކޮމެންޑޭޝަންތައް ވެސް ޔޫޕީއާރުން ވަނީ ހުށަހަޅާފައެވެ.

މީގެ އިތުރުން ވިޔަފާރީގެ ދާއިރާގެ ހައްގުތަކާއި، ތިމާވެއްޓާއި ގުޅުން ހުރި އިންސާނީ ހައްގުތައް އަދި ކުރިއެރުމާއި ގުޅުން ހުރި ހައްގުތަކާއި ގުޅިގެން ވެސް ބައެއް ހުށަހަޅުންތައް ޔޫޕީއާރުން ވަނީ ހުށަހަޅާފައެވެ.