ޖުލައި މަހު ރާއްޖެއަށް 4.3 ބިލިއަން ރުފިޔާގެ މުދާ އިމްޕޯޓްކޮށްފި
14 އޯގަސްޓު 2022 | އާދީއްތަ 12:55މި އަހަރުގެ ޖުލައި މަހު 316 މިލިއަން ރުފިޔާ ދައުލަތަށް ލިބުނު
ކަސްޓަމްސް ބިލްޑިންގް
ޖުލައި މަހު ރާއްޖެއަށް 4.3 ބިލިއަން ރުފިޔާގެ މުދާ އިމްޕޯޓްކޮށްފިއެވެ.
ފާއިތުވި ޖުލައި މަހު ރާއްޖެއަށް އިމްޕޯޓް ކުރެވުނު މުދަލުގެ ސީ.އައި.އެފް އަގު 2021 ވަނަ އަހަރުގެ ޖުލައި މަހާ އަޅާބަލާއިރު 56 އިންސައްތަ އިތުރުވެފައިވާ ކަމަށް މޯލްޑިވްސް ކަސްޓަމްސް ސަރވިސްއިން ވަނީ ބުނެފައެވެ. ފާއިތުވި ޖުލައި މަހު ދައުލަތަށް ލިބުނު އާމްދަނީ, 2021 ވަނަ އަހަރުގެ ޖުލައި މަހާ އަޅާބަލާއިރު 31 އިންސައްތަ ވަނީ އިތުރުވެފައެވެ. 2021 ވަނަ އަހަރުގެ ޖުލައި މަހު 241 މިލިއަން ރުފިޔާ ދައުލަތަށް ލިބިފައިވާއިރު، މި އަހަރުގެ ޖުލައި މަހު މި އަދަދު ވަނީ 316 މިލިއަން ރުފިޔާއަށް ދަށްވެފައެވެ.
ފާއިތުވި މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ އޮމާން، އިންޑިއާ، ޔޫއޭއީ، ޗައިނާ އަދި ސިންގަޕޫރެވެ. އޮމާން އިން 19 އިންސައްތަ މުދާ އެތެރެކޮށްފައިވާއިރު, އިންޑިއާ 16 އިންސައްތަ މުދާ, އަދި ޔޫއޭއީ އިން 13 އިންސައްތަ މުދާ ފާއިތުވި މަހު ވަނީ އެތެރެކޮށްފައެވެ. ރާއްޖެއިން އެންމެ ގިނައިން މުދާ އެކްސްޕޯޓްކޮށްފައިވަނީ ޖަރުމަންވިލާތަށެވެ. އެގޮތުން ޖަރުމަންވިލާތަށް 27 އިންސައްތަ މުދާ އެކްސްޕޯޓްކޮށްފައިވެއެވެ. އަދި އިނގިރޭސިވިލާތަށް 23 އިންސައްތަ މުދާ، މޮރިޝަސްއަށް 16 އިންސައްތަ މުދާ އެކްސްޕޯޓްކޮށްފައިވާ ކަމަށް ކަސްޓަމްސްގެ ތަފާސްހިސާބުތަކުން ދައްކައެވެ. މީގެއިތުރުން ބަންގްލަދޭޝް އަށް 7 އިންސައްތަ މުދާ އަދި އިންޑިއާއަށް 5 އިންސައްތަ މުދާ ވަނީ އެކްސްޕޯޓްކޮށްފައެވެ.
ޖުލައިި މަހު ރާއްޖެއަށް ޕްރޮސެސްކުރެވުނު ޑިކްލަރޭޝަން އިތުރުވެފައިވާއިރު ރާއްޖެއިން ބޭރުން އައިސްފައިވާ އުޅަނދާއި، ރާއްޖެއިން ފުރާފައިވާ އުޅަނދުފަހަރުގެ އަދަދު ވަނީ މަދުވެފައެވެ. މި އަހަރުގެ ޖުލައި މަހު ރާއްޖެއަށް ޕްރޮސެސްކުރެވުނު ޑިކްލަރޭޝަންގެ އަދަދަކީ 17،255 އެވެ. 2021 ވަނަ އަހަރު މިއަދަދު އުޅުނީ 15،153 ގައެވެ. ޖުލައި މަހު ރާއްޖެއިން ބޭރުން އައިސްފައިވާ އުޅަނދުގެ އަދަދަކީ 93 އެކެވެ. އަދި ރާއްޖެއިން ފުރާފައިވަނީ 99 އުޅަނދެވެ.
ކަސްޓަމްސް އިން ތަފާސްހިސާބުތައް އާންމުކޮށްފައިވާއިރު ޓެކްނޮލޮޖީގެ ޒަރީއާއިން މޯލްޑިވްސް ކަސްޓަމްސް ސަރވިސްގެ މުޅި ކްލިއަރެންސް ޕްރޮސެސް ވަނީ ޑިޖިޓަލައިޒް ކުރެވިފައިކަމަށާއި، އެކަމުގެ ސަބަބުން ކަސްޓަމްސްގެ ޚިދުމަތްތައް ހޯދުމުގައި އާންމު ރައްޔިތުންނަށް ވަރަށް ބޮޑުތަން ލުއިފަސޭހަވާނެ ކަމަށް ކޮމިޝަނަރ ޖެނެރަލް އޮފް ކަސްޓަމްސް އަބްދުﷲ ޝަރީފު ވަނީ ވިދާޅުވެފައެވެ.
