ޖުލައި މަހު މަސްތުވާތަކެތީގެ 102 މައްސަލަ ކޯޓުތަކަށް ހުށަހެޅިފައިވޭ

ޖުލައި މަހު މަސްތުވާތަކެތީގެ 102 މައްސަލަ ކޯޓުތަކަށް ހުށައެޅިފައިވާކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.

ޕީޖީ އޮފީހުގެ ޖުލައި މަހުގެ ތަފާސްހިސާބުތައް ދައްކާ ގޮތުން ޖުލައި މަހު މަސްތުވާތަކެތީގެ 102 މައްސަލައެއް ކޯޓުތަކަށް ހުށައެޅިފައިވާއިރު، އެއީ ޖުލައި މަހު ކޯޓަށް ހުށައެޅުނު މައްސަލަތަކުގެ 51 އިންސައްތައެވެ.

Advertisement

އެހެނިހެން ބާވަތްތަކުގެ 37 މައްސަލަ ހުށައެޅިފައިވާއިރު، ތިންވަނައަށް އެންމެ ގިނައިން ހުށައެޅިފައިވަނީ މުދަލާއި ގުޅުންހުރި މައްސަލަތަކެވެ.

އޭގެ އިތުރުންވެސް، ވައްކަމުގެ 18 މައްސަލައާއި، ބަނގުރާ ބުއިމުގެ 10 މައްސަލައާއި، މާރާމާރީ ހިންގުމުގެ 8 މައްސަލައިގެ އިތުރުން، ކުޑަކުދިންނަށް ޖިންސީ ގޯނާ ކުރުމުގެ 4 މައްސަލަވެސް މި މުއްދަތުގެ ތެރޭގައި ކޯޓަށް ހުށައެޅިފައިވެއެވެ.

ޖުލައި މަހުގެ ތެރޭގައި 199 މައްސަލައެއް ކޯޓުތަކަށް ހުށައެޅިފައިވެއެވެ. އޭގެ ތެރެއިން 44 އިންސައްތަ މައްސަލައަކީ އަލަށް ދައުވާ ކުރެވުނު މައްސަލަތަކެވެ.

ޕީޖީ އޮފީހުން ތަފާތު އެކި މައްސަލަތަކުގައި ކޯޓުތަކަށް ދައުވާތައް ހުށައަޅާފައިވާއިރު، ޖުމުލަ 402 މައްސަލައެއް ކޯޓުގައި ކުރިއަށް ގެންދެވިފައިވެއެވެ. އެއީ ރާއްޖޭގެ 59 ކޯޓެއްގައި ކުރިއަށް ގެންދެވިފައިވާ އަޑުއެހުންތަކެވެ.

އޭގެ އިތުރުން، 268 މައްސަލައެއްގެ އަޑުއެހުންތައް މި މުއްދަތުގެ ތެރޭގައި ކެންސަލްވެފައިވެސް ވެއެވެ.

ޑްރަގް ކޯޓު ފިޔަވައި އެހެނިހެން ކޯޓުތަކުން މައްސަލަ ނިންމި އަދަދާއި  ބާވަތަށް ބަލާއިރު، އެންމެ ގިނައިން ނިންމާފައިވަނީ ވައްކަމުގެ މައްސަލަތަކެވެ. އެގޮތުން ވައްކަމުގެ 8 މައްސަލައެއް ނިންމާފައިވާއިރު، ދެން އެންމެ ގިނައިން ނިންމާފައިވަނީ އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތުގައި ބާރު ހިންގުމާއި، އެނގިހުރެ ހުއްދަ ނޫން ތަންތަނަށް ވަނުމާއި، ބަނގުރާ ބުއިން ފަދަ މައްސަލަތަކެވެ.

ޖުލައި މަހު ޕީޖީ އޮފީހަށް 81 އިންސައްތަ މައްސަލަ ކާމިޔާބު ކުރެވިފައިވެއެވެ. އެއީ 39 މައްސަލައެވެ.

ދެ މައްސަލައެއްގައި މަދަނީ މިންގަނޑުން ދައުވާ ބާތިލު ކުރެވިފައިވާއިރު، 7 މައްސަލައެއް ސާބިތު ނުވާކަމަށް ވަނީ ނިންމާފައެވެ.