ދިރާސީ އާ އަހަރު ބަދަލުކުރަން ރަސްމީކޮށް ޝަކުވާ އެއް ހުށަހަޅާފަ އެއް ނުވޭ
ރާއްޖެޓީވީގެ ޕްރޮގްރާމެއްގައި އެޑިކޭޝަންގެ ޕީއެސް އަހުމަދު އަލީ ވާހަކަދައްކަވަނީ
ދިރާސީ އާ އަހަރުގެ ކިޔެވުން ފެށުން ބަދަލުކުރަން ޖެހޭ ކަމަށް ވާނަމަ އެކަން ކުރަން ތައްޔާރަށް ތިބި ކަމަށް ތައުލީމީ ވުޒާރާގެ ޕަރމިނަންޓް ސެކޭޓްރީ އަހުމަދު އަލީ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އޭނާ ވިދާޅުވީ ދިރާސީ އާ އަހަރުގެ ފެށުން އޮގަސްޓް މަހަށް ބަދަލު ކުރީ އޭރުގެ ހާލަތަށް ބެލުމަށް ފަހުގައި ކަމަށެވެ. އެފަދަ ނިންމުންތައް ގެންނަނީ ދަރިވަރުންނަށް ކުރާނެ އަސަރު ވަރަށް ބޮޑަށް ވިސްނުމަށް ފަހުގައި ކަމަށާއި، ދިރާސީ އާ އަހަރުގެ ކިޔެވުން ފަށާ ދުވަސްވަރު ބަދަލު ކުރުމަކީ ދަރިވަރުންގެ ކިޔެވުމަށް އަނެއްކާވެސް ބަދަލުތަކެއް އަންނާނެ ކަމެއް ކަމުގައ ކަން އަހުމަދު ވިދާޅުވިއެވެ.
އެހެންނަމަވެސް ދިރާސީ އާ އަހަރު ފަށާ ދުވަސްވަރު ބަދަލުކުރުމަކީ ބެލެނިވެރިން އެންމެ އެދޭ ގޮތް ކަމަށް ވާނަމަ އެއީ ތައުލީމީ ވުޒާރާއިން ވިސްނާނެ ކަމެއް ކަަމަށް އޭނާ ވިދާޅުވިއެވެ.
ކޮވިޑް-19 އާ ގުޅިގެން އެކަޑަމިކް ކަލަންޑަރަށް އައި ބަދަލުތަކާއިއެކު ދިރާސީ އާ އަހަރުގެ ކިޔެވުން ފެށޭނީ އަހަރުގެ މެދު ތެރޭގައި ކަމަށް ނިންމީ 2020 ވަނަ އަހަރެވެ. ބެލެނިވެރިން ވަނީ ދިރާސީ އާ އަހަރު ފަށާ ދުވަސްވަރާއި މެދު ހިތްހަމަނުޖެހިގެން މީސްމީޑިއާގައި ނުރުހުން ފާޅުކޮށްފައެވެ. އެހެންނަމަވެސް ރަސްމީކޮށް އެއްވެސް ޝަކުވާއެއް ލިބިފައި ނުވާކަމަށް ތައުލީމީ ވުޒާރާއިން ވަނީ ބުނެފައެވެ.
