މިއަހަރުގެ ދީރާސީ އަހަރު ފެށުނުއިރު ޓެކްސްޓް ފޮތްތައް ނުލިބި ހުރީ ސްކޫލް ބަދަލުވި ދަރިވަރުންނަށް އެކަނި ކަމަށް އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ އަހުމަދު އަލީ ވިދާޅުވެއްޖެއެވެ.

ރާއްޖެޓީވީގެ ފަލަސުރުޙީ ޕްރޮގްރާމުގައި ވާހަކަ ދައްކަވަމުން އަހުމަދު އަލީ ވިދާޅުވީ ކުދިންގެ ޓެކްސްޓް ފޮތްތައް ގެންދިޔުމުގެ ކަންތައްތައް އިންތިޒާމު ކުރަނީ ވަކި ނިޒާމެއްގެ ދަށުން ކަމަށާއި ސްކޫލް ބަންދުވާ ދުވަހު ކުދިންގެ އަދަދު ނަގާ ކަމަށެވެ. އެ އަދަދުތަކަށް ވައުޗަރތައް ދޫކުރާ ކަން ފާހަގަކުރައްވާ އަހްމަދު އަލީ ވިދާޅުވީ އެ ވައުޗަރތަކަށް ޓެކްސްޓް ފޮތްތައް ދޫކުރަމުންދާ ކަމަށެވެ.

އަދި ވައުޗަރ ދޫކުރި ސްކޫލަށް ކުއްޖާގެ ޓެކްސްޓް ފޮތްތައް ދާނެ ކަމަށާއި ކުއްޖާގެ ސްކޫލް ބަދަލުވުމުން، އެ ޓެކްސްޓް ފޮތްތައް އަނބުރާ ބަދަލުވި ސްކޫލަށް ގެންނަ ކަމަށެވެ. އެފަދަ ކުދިންނަށް ޓެކްސްޓް ފޮތްތައް ނުލިބި ހުރެދާނެ ކަމަށް ވިދާޅުވިއެވެ.

މާލެސަރަހައްދުގެ ސްކޫލުތަކަށް މި ދީރާސީ އަހަރު ކުދިން ވަތް މިންވަރު އިތުރުވެގެން ހިނގައްޖެ ކަމަށާއި ގާތްގަނޑަކަށް ތިންހާހާއި ގާތްކުރާ އަދަދަކަށް ކުދިން އަލަށް އެންރޯލްވެފައިވާ ކަމަށް އަހްމަދު އަލީ ފާހަގަކުރެއްވިއެވެ. އޭގެތެރޭގައި އަތޮޅުތެރެއިން ބަދަލުވެފައިވާ ކުދިންގެ ނިސްބަތް ގިނަ ކަމަށް ވެސް ވިދާޅުވިއެވެ.

ޕްރޮގްރާމުގައި ވާހަކަ ދައްކަވަމުން އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ އަޙުމަދު މުޖާހިދު ވިދާޅުވީ މިފަހަރު ފޮތްތައް ފޮނުވުމުގެ މަސައްކަތް މިނިސްޓްރީން ވަރަށް ކުރިން ފަށާފައިވާ ކަމަށެވެ. އަދި ފޮތްތައް ފޮނުވުމަށް ވަރަށް ގިނަ ފަރާތްތަކުގެ އެހީތެރިކަން ލިބުނު ކަމަށާއި ކިޔެވުން ފެށުނުއިރު ސްކޫލްތަކަށް ފޮތްތައް ވަނީ ފޯރުކޮށްދީފައި ކަމަށެވެ.

މުޖާހިދު ވެސް ވިދާޅުވީ ދަރިވަރަކު ކުރިން އުޅުނު ސްކޫލު އެހެން ސްކޫލް އަކަށް ބަދަލުވިނަމަ، އެފަދަ ކުދިންނަށް ފޮތްތައް ނުލިބި ހުރެދާނެ ކަމަށެވެ. މިނިސްޓްރީ އިން ކުރަމުން ގެންދާ މަސައްކަތްތަކުގެ މައުލޫމާތު ހިއްސާ ކުރައްވަމުން މުޖާހިދު ވިދާޅުވީ 1150  ކްލާސްރޫމުގެ މަސައްކަތް މިހާރު ވެސް ކުރިއަށްދާ ކަމަށާއި 196 ކްލާސްރޫމް ނިމިފައިވާ ކަމަށެވެ. އަދި ސެޕްޓެމްބަރު މަހުގެ ކުރީކޮޅު ކާމިލްދީދީގެ ނަމުގައި ޕްރައިމަރީ ސްކޫލެއް ހުޅުވިގެންދާނެ ކަމަށެވެ.

މިއަހަރުގެ ދިރާސީ އަހަރުގެ ކިޔެވުން ފަށާފައިވަނީ 93278 ދަރިވަރުންނާ އެކުގައެވެ. ރާއްޖޭގެ 217 ސްކޫލެއްގައި އާދިއްތަ ދުވަހު ކިޔެވުން ފަށާފައިވާއިރު ސްކޫލްތަކުން ވަނީ ދަރިވަރުންނަށް ވަރަށް ހޫނު މަރުޚަބާއެއް ކިޔާފައެވެ. ޕްރައިވެޓް ސްކޫލްތައް ހިމެނޭހެން، މިއަހަރު އަލަށް ސްކޫލަށް ވަން ދަރިވަރުންގެ އަދަދަކީ 7700އެވެ. ދިރާސީ އާ އަހަރުގެ ކިޔެވުން ފެށި އިރު ރާއްޖޭގެ ސްކޫލްތަކުގައި އުނގަންނައިދޭ ޖުމްލަ 8,364 ޓީޗަރުން އެބަތިއްްބެވެ. އޭގެ ތެރޭގައި ހިމެނެނީ ބިދޭސީ 1،693 ޓީޗަރުންނާއި، 6،006 ދިވެހި ޓީޗަރުންގެ އިތުރުން ވަގުތީ ޓީޗަރުންގެ ގޮތުގައި އުނގަންނައިދޭ 665 ޓީޗަރުންނެވެ. ސްކޫލް ފެށުނު އިރު ހުރިހާ ސްކޫލެއްގައި ވެސް ޓީޗަރުން ހަމަވާނެ ކަމަށާއި ދަރިވަރުންނަށް ބޭނުންވާ ފޮތްތައް ހަމަވާނެ ކަމަށް ތައުލީމީ ވުޒާރާއިން ވަނީ ބުނެފައެވެ.

މި އަހަރުގެ ފުރަތަމަ ޓާރމްގެ ކިޔެވުން ނިމޭނީ ޑިސެންބަރު މަހުގެ 22ވަނަ ދުވަހުއެވެ. އަދި ދެވަނަ ޓަރމްގެ ކިޔެވުން ފަށާނީ އަންނަ އަހަރުގެ ޖެނުއަރީ މަހުގެ 8 ވަނަ ދުވަހުއެވެ. ދެވަނަ ޓާމްގެ ކިޔެވުން ނިމޭނީ ޖޫންމަހުގެ 22ވަނަ ދުވަހުއެވެ.