ރައީސް ބަދުއަޚުލާގީ އަމަލު ހިންގަވާ ފޮޓޯތަކެއް ހުރި ކަމަށް ނަޝީދު ވިދާޅުވި މައްސަލަ ކަމާބެހޭ ފަރާތްތަކަށް ހުށައަޅައިފި

ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު ބަދު އަޚްލާގީ އަމަލު ހިންގަވާ މަންޒަރު ފެންނަ ފޮޓޯތަކެއް އެބަހުރި ކަމަށް ވިދާޅުވެ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ދެއްކެވި ވާހަކަ ތަހުގީގުކޮށްދިނުމަށް އެދި ކަމާ ބެހޭ ފަރާތްތަކަށް ހުށައަޅައިފިއެވެ.

މި ތަހުގީގު ކުރިއަށްގެންދިއުމަށް އެދި ފުލުހުންނަށާއި ސުޕްރީމް ކޯޓުގެ އިތުރުން ޕްރޮސެކިއުޓަރ ޖެނެރަލްގެ އޮފީހަށް ހުށައަޅާފައިވަނީ ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރ އަހުމަދު ސަލީމް (މާޒް ސަލީމް)އެވެ. އޭނާ އެ ތިން އިދާރާއަށް ފޮނުވާފައިވާ ސިޓީ "ރާއްޖެ އެމްވީ" އަށް ވަނީ ލިބިފައެވެ.

އޭނާ ގެ ސިޓީގައި ބުނެފައިވަނީ ރައީސްއާއި ގުޅޭގޮތުން ނަޝީދު ކުރެއްވީ ވަރަށް ބޮޑު ތުހުމަތެއް ކަމަށާއި އެފަދަ ފޮޓޯތައް އެއްވެސް މީހެއްގެ އަތުގައި ވުމަކީ ޤާނޫނީ ކުށެއް ކަމަށެވެ. އަދި ޤައުމުގެ ވަލިއްޔުލް އަމުރުގެ އެފަދަ ފޮޓޯތަކެއް ކަމަށް މަޖިލީހުގެ ރައީސް ވިދާޅުވުމުން އެއީ ޤާނޫނުއަސާސީގައި ބުނާ ރައީސުލްޖުމްހޫރިއްޔާގެ ސިފައެއް ގެއްލޭ ކަމެއް ކަމަށާއި އެހެންކަމުން އެ މައްސަލަ ތަހުގީގު ކުރަން ޖެހޭ ކަމަށް ވަނީ ބުނެފައެވެ.

މިއީ މިފަދަ އިސްލާމީ ޤައުމެއްގެ ރައްޔިތުންނަށް ކުޑަ މައްސަލެއް ނޫންކަން ފާހަގަކުރައްވައި ސަލީމް ވިދާޅުވީ ނަޝީދު ވިދާޅުވާ ފޮޓޯތައް ހުރިކަން އެމަނިކުފާނަށް ތަހުގީގަށް ސާބިތުުކޮށް ނުދެއްވިއްޖެނަމަ އެއީ ގަޒުފުގެ ހައްދު ކަނޑައެޅިފައިވާ ޤާނޫނީ ކުށެއް ކަމަށެވެ. އަދި މީޑިއާތަކުގެ ރިޕޯޓްތަކުން ނަޝީދު، ރައީސް ބްލެކްމެއިލް ކުރެއްވިކަން ހާމަވާއިރު އެއީވެސް ޤާނޫނީ ގޮތުން އަދަބު ކަނޑައެޅިފައިވާ ކުށެއްކަން އޭނާ ފާހަގަކުރެއްވިއެވެ.

ރައީސް ސާލިޙް އާއި ގުޅުވައިގެން ރައީސް ނަޝީދު ދެއްކެވި ވާހަކަ ތަހުގީގު ކުރުމަށް ކަމާބެހޭ ފަރާތްތަކުގައި އެދިފައިވަނީ ރައިސުލްޖުމްހޫރިއްޔާ އިބްރާހިމް މުޙައްމަދު ސާލިޙް ހިލޭ އަންހެނަކާއެކު ބަދައަޚުލާގީ އަމަލު ހިންގާ މަންޒަރުފެންނަ ފޮޓޯ ލިބިފައިވާ ކަމަށާއި އެ ފޮޓޯތައް އާއްމުކުރަންވީތޯ ނަޝީދު ވިދާޅުވެފައިވާތީއެވެ. އެފަދަ އެއްވެސް ފޮޓޯއެއް އެއްވެސް މީހެއްގެ އަތުގައި ނުހުންނާނެ ކަމަށާއި ރައީސް ސޯލިހު އެފަދަ އެއްވެސް ކަމެއް ނުކުރައްވާކަމަށް ރައީސް އޮފީހުގެ ތަރުޖަމާނު މަބުރޫކް އަބްދުލް އަޒީޒް ވަނީ ވިދާޅުވެފައެވެ.

ރައީސްގެ ފޮޓޯތައް ހުރިކަމަށް ރައީސް ނަޝީދު ވިދާޅުވީ އެމަނިކުފާނުގެ ކޮއްކޮ ނާޒިމް ސައްތާރު، އެއްޖިއްސުން ގުޅުން ހިންގާ ވީޑިއޯއެއް އާއްމުވުމާ ގުޅިގެން އެ މައްސަލައިގެ ތަހުގީގަށް އޭނާ ހައްޔަރު ކުރުމާ ގުޅިގެންނެވެ. ނަޝީދު ވިދާޅުވި ގޮތުގައި އެމަނިކުފާނުގެ ކޮއްކޮ ހައްޔަރުކޮށްފައިވަނީ މި ސަރުކާރުން ސިޔާސީ ބޭނުމެއްގައި ހަރުކަށި ފިކުރުގެ މީހުން ރުއްސަން ވެގެންކަމަށެވެ.

ރައީސް ނަޝީދު، ރައީސް ސާލިޙްގެ އެފަދަ ފޮޓޯތައް އެމަނިކުފާނަށް ލިބިފައިވާ ކަމަށް ވިދާޅުވި ފަހުން، ޔޫކޭގެ ރެސްޓޯރެންޓެއްގައި އިންނަވަނިކޮށް މީހަކު އައިސް އެމަނިކުފާނުގެ ފޯނު ފޭރިގެންފައިވާ ކަމަށް ރައީސް ނަޝީދު މީޑިޔާތަކަށް މައުލޫމާތު ދެއްވާފައި ވެއެވެ.