"އެކަކު އަނެކަކަށް އެހީވެ، ހަމްދަރުދީވުމަކީ މުސްލިމުންގެ މައްޗަށްވާ ދީނީ ވާޖިބެއް"

މުއުމިނުންނަކީ ފޭރާމެއްގެ ރޮދިތަކެއް ފަދައިން ވަރަށް ގިނަ ގޮތްގޮތުން އެކަކު އަނެކަކާ ގުޅިލާމެހިފައިވާ ބައެއް ކަމަށާއި، އެކަކު އަނެކަކަށް އެހީތެރިވެ، އިހުސާންތެރިވާންޖެހޭކަމަށް ހުކުރު ޚުތުބާގައި ބުނެފިއެވެ.

"އިސްލާމީ އަޚުވަންތަކަން" މި މައުޟޫއަށް ރާއްޖޭގެ އެކި ކަންކޮޅުތަކުގައި އިއްވި ހުކުރު ޚުތުބާގައި ވަނީ މުސްލިމުންގެ މެދުގައި އޮންނަންޖެހޭ ރިވެތި ގުޅުންތަކުގެ މައްޗަށް އަލިއަޅުވާލައްވާފައެވެ.

ކޮންމެ އިންސާނަކީވެސް އަނެކުންގެ އެހީތެރިކަމާއި، މަދަދަށް ބޭނުންވާ ބައެއް ކަމަށާއި، މުސީބާތާއި ތަކުލީފުގެ ވަގުތުގައި އެހެން މީހުންނަށް އެހީތެރިވެ، ހަމްދަރުދީ ވުމަކީ އަހަރުމެންގެ މައްޗަށް ވާޖިބު ވެގެންވާ ކަމެއް ކަމަށް ހުކުރު ޚުތުބާގައި ބުނެފައިވެއެވެ. އެއީ މުއުމިނުންގެ ސިފައެއް ކަމަށާއި، އީމާންކަން ފުރިހަމަވުމުގެ ރަމްޒެކެވެ.

ޚުތުބާގައި ބުނީ އިސްލާމީ މުޖުތަމައުގެ އަފްރާދުން ވާންޖެހޭނީ އެއް ހަށިގަނޑެއްފަދަ އެކުވެރި ބަޔަކު ކަމުގައެވެ. އެއްބަޔަކު އަނެއް ބަޔަކަށް ހެޔޮކޮށް ހިތައި، އެކަކު އަނެކެއްގެ ހާލު ބަލައި، އެކަކު އަނެކަކަށް އަޅާލައި، އޯގާތެރިވާންޖެހެއެވެ. މިއީ އިންސާނިއްޔަތުގެ އިތުރުން މުސްލިމުންގެ އީމާންތެރިކަންވެސް ގުޅިފައިވާ ކަމެއް ކަމުގައި ޚުތުބާގައި ބުނެފައިވެއެވެ.

ދުނިޔޭގެ އެކި ކަންކޮޅުތަކުގައި ނިކަމެތި ހާލުގައި ޖެހިފައިވާ މުސްލިމުންގެ މަތިން ހަނދާންކޮށް އެމީހުންނަށްޓަކާ ހެޔޮ ދުއާ ކުރަންޖެހެއެވެ. އިހުސާންތެރިވާންޖެހެއެވެ. އިހުސާންތެރިވުމާއި، އެހީތެރިވުމުގައި މާތް ނަބިއްޔާ މުހައްމަދު صلى الله عليه وسلم ގެ އަސްހާބު ބޭކަލުންގެ ހަޔާތްޕުޅުން ގިނަގުނަ އިބުރަތްތަކެއް ލިބޭ ކަމަށް ޚުތުބާގައި ބުނެފައިވެއެވެ.

ކޮންމެ މީހަކުވެސް އަނެކުންނަށް އަޅާލައި، އިހުސާންތެރިވުމަކީ އޭނާގެ މައްޗަށްވާ ދީނީ ވާޖިބެއް ކަމަށް ޚުތުބާގައި ބުނެފައިވެއެވެ. އެފަދަ މީހަކަށް މާތް ﷲ ގެ ރުއްސެވުމާއި، މަދަދު ލިބިގެންވާކަން ޚުތުބާގައި ވަނީ ފާހަގަކޮށްފައެވެ.