މައްސަލަތައް ސީދާ ޕީޖީގެ ސަމާލުކަމަށް ގެނެވޭގޮތް ހަދައިފި
ޕީޖީއަށް ހިއްސާ ކުރަން ބޭނުންވާ މައުލޫމާތު މިހާރު އީމެއިލްކުރެވޭނެ
ޕްރޮސެކިއުޓަރ ޖެނެރަލް ހުސައިން ޝަމީމް
ޕްރޮސެކިއުޓަރ ޖެނެރަލްގެ ސަމާލުކަމަށް ގެންނަން ބޭނުންވާ މައުލޫމާތާއި މައްސަލަތައް ސީދާ އެބޭފުޅާއަށް ފޮނުވޭގޮތް ހަދައިފިއެވެ.
ޕްރޮސެކިއުޓަރ ޖެނެރަލްގެ އޮފީހުން ނެރުނު ބަޔާނެއްގައި ބުނީ, އެ އޮފީހުގެ މަސައްކަތްތަކާ ބެހޭގޮތުންނާއި، ގާނޫނު އަސާސީއާއި ގާނޫނުން ޕްރޮސެކިއުޓަރ ޖެނެރަލްއާ މަތިކޮށްފައިވާ ޒިންމާތަކާގުޅިގެން، ނުވަތަ ޖިނާއީ އަދުލުގެ ނިޒާމާ ގުޅިގެން ޕީޖީގެ ސަމާލުކަމަށް ގެންނަން ބޭނުންވާ ކަމެއް އޮތްނަމަ ސީދާ ޕީޖީއަށް އީމެއިލްގެ ޒަރީއާއިން އެ މައުލޫމާތު މިހާރު ފޯރުކޮށްދެވޭނެކަމަށެވެ. އެގޮތުން concerns@pgoffice.gov.mv އަށް އީމެއިލް ކުރުމަށް އެ އޮފީހުން ވަނީ އެދިފައެވެ.
ޕީޖީ އޮފީހުން މި ބަދަލު ގެނެސްފައިވަނީ ބުދަ ދުވަހުން ފެށިގެންނެވެ. މިގޮތަށް ފޮނުވާ މެއިލްތަކުގެ ތެރެއިން ސީދާ ޕީޖީ ޖަވާބެއް ނުވަތަ ރައުޔެއް ދެއްވަންޖެހޭ މެއިލްތަކަށް ޕީޖީ ހުސައިން ޝަމީމް އަމިއްލަފުޅަށް ޖަވާބުދެއްވާނެއެވެ.
މީގެ އިތުރުން ބައެއް މެއިލްތަކަށް ޖަވާބު ނުދެއްވިނަމަވެސް ޕީޖީ އޮފީހުގެ މަސައްކަތްތައް ބައްޓަން ކުރުމުގައި އީމެއިލް މެދުވެރިކޮށް ހިއްސާކުރާ ކަންކަމަށް ރިއާޔަތްކުރާނެކަމަށް އެ އޮފީހުގެ ބަޔާނުގައި ވަނީ ބުނެފައެވެ.
މިކަމާ ގުޅޭގޮތުން ޝަމީމް "ރާއްޖެ އެމްވީ"އަށް ވިދާޅުވީ، ޓްވިޓަރއިން ދުރަށް ވަޑައިގެންނެވީވެސް މިފަދަ ކަންކަމަށް ވަގުތު ހުސްކުރައްވަން ކަމަށެވެ.
މިއީ ޕީޖީ އޮފީހުގެ މަސައްކަތްތާއި ޖިނާއީ އަދުލުގެ ނިޒާމު އިތުރަށް ހަރުދަނާކުރުމަށް ކުރަމުންދާ މަސައްކަތްތަކުގައި އާއްމުންގެ ޚިޔާލާއި މަޝްވަރާއާއި ބައިވެރިވުން އިތުރުކުރުމަށް ޝަމީމް އިސްނަންގަވައިގެން ގެންނެވި ބަދަލެއް ކަމަށްވެސް ޕީޖީ އޮފީހުން ބުނެއެވެ.
