ޕީޖީ އޮފީހުގެ ލެތުން: މަތީ މަރްޙަލާގެ ކޯޓުތަކުން ނިންމާފައިވާ ހުރިހާ ނިންމުމެއް ހިމަނަނީ
އިޞްލާޙުތަކަށް ޢަމަލުކުރަން ފަށާ ތާރީޚާއެކު ފެންނަން ހުންނާނެ
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
މިއަހަރު ނިމެންވާއިރަށް ޖިނާއީ އަދުލުގެ ނިޒާމާ ގުޅިގެން މަތީ މަރްޙަލާގެ ކޯޓުތަކުން ނިންމަވާފައިވާ ހުރިހާ ނިންމުމެއް ޕްރޮސެކިއުޓަރ ޖެނެރަލް އޮފީހުން ތައާރަފްކުރި"ލެތުން"ވެބްސައިޓުގައި ހިމެނުމަށް މަސައްކަތް ކުރައްވަމުން ގެންދަވާކަމަށް ޕީޖީ ހުސައިން ޝަމީމް ވިދާޅުވެއްޖެއެވެ.
ޝަމީމް އެހެން ވިދާޅުވީ އޭނާގެ ބްލޮގްގައި ޝާއިއު ކުރައްވާފައިވާ ލިއުމެއްގައެވެ.
ޝަމީމް ވިދާޅުވީ، ލެތުން ވެބްސައިޓުގައި، ޖިނާއީ ޢަދުލުގެ ނިޒާމުގައި ޢަމަލުކުރާ ތަފާތު 37 ޤާނޫނަކާއި، 64 ގަވާއިދަކާއި، 9 ފޮތާއި، 2 ކޮމެންޓްރީއަކާއި، (ޖިނާއީ މައްސަލަތަކުގައި ޢަމަލުކުރުމަށް) ސުޕްރީމް ކޯޓުން ނެރުއްވާފައިވާ 19 އިރުޝާދެއް ފެންނަން އޮންނާނެ ކަމަށެވެ.
އޭގެ އިތުރުން، ޤާނޫނުތަކަށް ގެނެވިފައިވާ އިޞްލާޙުތަކާއި، އިޞްލާޙުތަކަށް ޢަމަލުކުރަން ފަށާ ތާރީޚާއެކު ފެންނަން ހުންނާނެކަމަށްވެސް ޝަމީމް ވިދާޅުވިއެވެ.
އޭގެ އިތުރުން، ހައިކޯޓުގެ 49 ނިންމުމާއި، ސުޕްރީމް ކޯޓުގެ 14 ނިންމުންވެސް ހިމެނިފައިވާނެކަމަށް ޝަމީމް ވިދާޅުވިއެވެ.
ޝަމީމް ވިދާޅުވީ، އަމާޒަކީ، މިއަހަރު ނިމެންވާއިރަށް، ޖިނާއީ އަދުލުގެ ނިޒާމާ ގުޅިގެން މަތީ މަރްޙަލާގެ ކޯޓުތަކުން ނިންމަވާފައިވާ ހުރިހާ ނިންމުމެއް ވެބްސައިޓެއް އަޅައި ފުރިހަމަކުރުން ކަމަށެވެ. އެގޮތުން މަތީ މަރްޙަލާގެ ނިންމުންތައް އަޅާއިރު، އެމައްސަލައެއް ނިންމެވި ފަނޑިޔާރުންގެ ބެންޗާއި، އެފަނޑިޔާރަކު ނިންމަވާފައިވާ ވަކިވަކި މައްސަލަތައްވެސް ޓެގުކުރެވޭނެކަމަށް ޝަމީމް ވިދާޅުވިއެވެ.
ދިވެހިރާއްޖޭގެ ޤާނޫނީ ނިޒާމަށް، 2008 އިން ފެށިގެން އިންޤިލާބީ ބަދަލުތަކެއް އަންނަމުންދާކަަމަށް ޝަމީމް ފާހަގަ ކުރެއްވިއެވެ. ޝަމީމް ވަނީ އެކަމާ ގުޅޭ ބައެއް ތަފާސްހިސާބުތައް ބްލޮގްގައި ހިއްސާ ކުރައްވާފައެވެ. އެގޮތުން 1998 އިން 2007 އަށް ހިނގި 10 އަހަރު، ރައްޔިތުންގެ މަޖިލީހުން ފާސްކުރެއްވީ ޖުމްލަ 17 ޤާނޫނުކަމަށް ޝަމީމް ވިދާޅުވިއެވެ.
އެހެންނަމަވެސް، އޭގެ ފަހުން 2008 އިން ފެށިގެން 2017 އަށް ހިނގި 10 އަހަރު ތެރޭގައި އެ އަދަދު 1152 އިންސައްތައަށް އިތުރު ކުރެވިފައިވާކަމަށް ޝަމީމް ވިދާޅުވިއެވެ. އެއީ 213 ޤާނޫނެވެ.
މުޅި ރާއްޖޭގައި ދުވާލަކު އެވްރެޖްކޮށް، 180 އާއި 210 އާ ދެމެދުގެ ޖިނާއީ މައްސަލަތަކުގެ އަޑުއެހުން ބާއްވާކަމަށް ޝަމީމް ވިދާޅުވިއެވެ.
ޖިނާއީ އަދުލުގެ ނިޒާމާ ގުޅުންހުރި ގާނޫނުތަކާއި ގަވާއިދުތަކާއި އުސޫލުތައް އެއްތަނަކުން ފެންނަން ހުންނާނެގޮތަށް ޕްރޮސެކިއުޓަރ ޖެނެރަލް އޮފީހުން އެކުލަވާލި “ލެތުން” ޑޭޓާބޭސް އިފްތިތާހު ކޮށްފައިވަނީ މެއި މަހުގެ 29 ވަނަ ދުވަހުއެވެ.
ޕީޖީ އޮފީހުން މައުލޫމާތުދޭގޮތުގައި މި ޑޭޓާބޭސް މެދުވެރިކޮށް، ގާނޫނުތަކާއި ގަވާއިދުތަކުގެ މާއްދާތައް ވަގުތުން ސަރޗް ކޮށްލެވޭނެއެވެ. އަދި ޖިނާއީ އަދުލުގެ ނިޒާމާއި ގުޅުންހުރި އެކި ކީވޯރޑުވެސް ވަކިން ސަރޗްކޮށް، އެ ކީވޯރޑަކާގުޅޭ، ފަހުގެ ގަނޫނުތަކާއި ގަވާއިދުތައް ބަލާލެވޭނެއެވެ.
