މުދައްރިސުން މަގާމުތަކުގައި ދެމިތިބުމަށް އަސަރުކުރާ 9 ކަމެއް ހިމެނޭ – ތައުލީމީ ދިރާސާ
އެވްރެޖްކޮށް ކޮންމެ 9 ދަރިވަރަކަށް މުދައްރިސެއް ހުރޭ
ކްލާހެއްގައި ޓީޗަރަކު ކިޔަވައިދެނީ
މުދައްރިސުންގެ މަސައްކަތުގެ މާހައުލު ރަނގަޅުކުރުންފަދަ ކަންކަން އެންމެ ފުރިހަމަގޮތުގައި ނުކުރެވުމާއި ބައެއް އެހެނިހެން ސަބަބުތަކާ ގުޅިގެން، މުދައްރިސުން މަގާމުގައި ދެމިތިބުމަށް އަސަރުކުރާކަމަށް ތައުލީމީ ދާއިރާގެ ދިރާސީ ރިޕޯޓުގައި ބުނެފިއެވެ.
ރާއްޖޭގެ ސްކޫލްތަކުގައި ކިޔަވައިދޭނެ މުދައްރިސުން ލިބުމުގައާއި, ލިބިފައިވާ މުދައްރިސުންނަށް، ކިޔަވައިދިނުމުގައި ދެމިތިބުމަށް ދިމާވެފައިވާ ދަތިތަކާއި ގޮންޖެހުންތަކާއި އަދި އޭގެ ސަބަބުތައް ދެނެގަތުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ އެދިވަޑައިގަތުމަކަށް ކުރި ދިރާސާގެ ރިޕޯޓުގައި ބުނެފައިވަނީ، ދިވެހިރާއްޖޭގެ ބައެއް ސްކޫލްތަކުގައި ދަރިވަރުންގެ އަދަދު މަދުކަމަށެވެ. ނަމަވެސް ވަރަށް ގިނަ ސްކޫލްތަކުގައި ސާނަވީ ފެންވަރުގައި ވަކިވަކި މާއްދާތަކަށް ޚާއްސަ މުދައްރިސުން ކިވައިދޭންޖެހުމުގެ ސަބަބުން "ޓީޗަރ ޕިއުޕިލް ރޭޝިއޯ" ވަރަށް ދަށްކަމަށެވެ.
އެވްރެޖްކޮށް ކޮންމެ 9 ދަރިވަރަކަށް މުދައްރިސެއް ހުންނަކަމަށް މި ރިޕޯޓުގައި ބުނެފައިވެއެވެ. އާބާދީ މަދު ރަށްރަށުގެ ސްކޫލްތަކުގައި މި ނިސްބަތް 4ށް ވެސް ދަށްކަމަށް ބުނެފައިވެއެވެ. ދަރިވަރުން ގިނަ ސްކޫލްތަކުގައި މުދައްރިސަކަށް 12 ނުވަތަ 13 ދަރިވަރުން ޖެހެއެވެ. މި ސަބަބާހުރެ، ދިވެހި ސިވިލް ސަރވިސްގެ 50 އިންސައްތައަށްވުރެ މަތީ ނިސްބަތެއް ހިއްސާކުރަނީ ތައުލީމީ ދާއިރާގެ މުވައްޒަފުންކަމަށް މި ރިޕޯޓުގައި ބުނެފައިވެއެވެ. މީގެ ތެރޭގައި ގިނައީ ފަންނީ މުވައްޒަފުންކަމަށްވެސް ބުނެފައިވެއެވެ.
ތައުލީމީ ދާއިރާގެ ފަންނީ މުވައްޒަފުންގެ އަދަދު ދިވެހި ސިވިލް ސަރވިސްގައި ގިނަވުމުގެ ސަބަބުން، އެ މުވައްޒަފުންގެ ގަދަރު ހިފެހެއްޓުމަށާއި، އެ މުވައްޒަފުން ޝައުގުވެރިކަމާއެކު ވަޒީފާގައި ދެމި ތިބުމަށާއި، ރަނގަޅު މީހުން އެ ވަޒީފާތަކަށް އައުމުގެ ޝައުގުވެރިކަން އިތުރުކުރުމަށްޓަކައި، މުސާރައާއި އިނާޔަތްތައް މަތިކުރުމާއި މުދައްރިސުން ތާޒާކޮށް އިތުރު ތަމްރީނު ދިނުމާއި، މުދައްރިސުންގެ މަސައްކަތުގެ މާހައުލު ރަނގަޅުކުރުންފަދަ ކަންކަން އެންމެ ފުރިހަމަގޮތުގައި ނުކުރެވޭކަމަށް މި ދިރާސާގައި ބުނެފައިވެއެވެ.
އަދި މިކަމުގެ ނޭދެވޭ އަސަރު މި ދާއިރާއަށް ކޮށްފައިވާކަމަށާއި، އެންމެ ފާހަގަކޮށްލެވޭ ނުރަނގަޅު އަސަރުތަކުގެ ތެރޭގައި 9 ކަމެއް ވަނީ ފާހަގަކޮށްފައެވެ.
މީގެ އިތުރުން ވެސް މުދައްރިސުންގެ ޒިންމާތަކަށް އަންނަމުންދާ ބަދަލުތަކާއި އިތުރުވަމުންދާ މަސައްކަތްތައް މުދައްރިސުން ފާހަގަކޮށްފައިވެއެވެ. ވަކިން ޚާއްސަގޮތެއްގައި 2020 ވަނަ އަހަރު ކުރިމަތިވި ކޮވިޑް-19ގެ ވަބާގައި މުދައްރިސުން ގިނަ ގޮންޖެހުންތަކާއެކުވެސް ބޮޑެތި ގުރުބާނީތަކެއް ވެފައިވާކަމަށާއި، މިފަދަ ގުރުބާނީތަކުގެ އަގު އެކަށީގެންވާ ގޮތުގައި ވަޒަންނުކުރާކަމުގެ ޝަކުވާ މުދައްރިސުން ކުރާކަމަށް ދިރާސާގައި ބުނެފައިވެއެވެ.
މީގެ އިތުރުން މުދައްރިސުންނަށް އިހުތިރާމު ނުކުރާ ވާހަކައާއި، އެމީހުންގެ ހައްގުތަކަށް އަޅާނުލެވޭކަމުގެ ޝަކުވާތައް ކޮށްފައިވެއެވެ. އަދި މިފަދަ ކަންކަމާގުޅިގެން، ކިޔަވައިދިނުމަކީ ވަޒީފާއެއްގެގޮތުގައި އިޚްތިޔާރުކުރަން ރަނގަޅު ފަންނެއްކަމުގައި ހީކުރި ހީކުރުން ބަދަލުވެފައިވާކަމަށާއި، އެއާއެކު މުދައްރިސުންނަށް ވާން ބޭނުންވާ ޒުވާނުންގެ އަދަދު މަދުވަމުންދާކަމަށް ދިރާސާގައި ބުނެފައިވެއެވެ.
އަދި ސާނަވީ ތައުލީމު ނިންމާ ރަނގަޅު ފެންވަރުގެ ދަރިވަރުން މުދައްރިސުންގެ ގޮތުގައި ތަމްރީނުވުން ވަރަށް ބޮޑަށް މަދުވެއްޖެކަމަށާއި، މިކަންކަމުގެ އަސަރުތައް ވަރަށް ނާޒުކު ހާލަތަކަށް ދިވެހިރާއްޖެ ގެންގޮސްފާނެކަމަށް މި ދިރާސާގައި ބުނެފައިވެއެވެ.
