ހުކުމް ނުކޮށް ބަންދުގައި ތިބި މީހުންގެ އަޑުއެހުންތައް އަވަސްކުރަންޖެހޭ: މޯދީ

އިންޑިއާގައި، އެކި ތުހުމަތުތަކުގައި ހުކުމްނުކޮށް ބަންދުގައި ތިބި މީހުންގެ އަޑުއެހުންތައް އަވަސްކުރަންޖެހޭކަމަށް އެގައުމުގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.

އިންޑިއާގެ ބޮޑުވަޒީރު މިހެން ވިދާޅުވީ އޯލް އިންޑިއާ ޑިސްޓްރިކްޓް ލީގަލް ސަރވިސަސް އޮތޯރިޓީސް މީޓްގައި ވާހަކަފުޅުދައްކަވަމުން، ހޮނިހިރު ދުވަހުއެވެ.

މޯދީ ވިދާޅުވީ، ވިޔަފާރީގެ މުއާމަލާތްތައް ކުރުމުގައާއި ދިރިއުޅުމުގައި ފަސޭހަގޮތްތައް ފޯރުކޮށްދޭފަދައިން، އިންސާފު ހޯދުމުގައިވެސް ފަސޭހަގޮތްތައް ހޯދައިދޭންޖެހޭނެކަމަށެވެ. އަދި ޖުޑިޝަރީގެ މަސައްކަތްތައް އަވަސްކޮށް، ހުކުމުކާނުލައި ބަންދުގައި ތިބޭ މީހުން ބަންދުން ދޫކޮށްލުމުގެ މަސައްކަތް އަވަހަށް ކުރަންޖެހޭކަމަށް ވިދާޅުވިއެވެ.

މިހާރުވެސް ހުކުމަކާނުލައި ބަންދުގައި އެތައް ބަޔަކު އެބަތިބިކަން ފާހަގަކުރައްވައި މޯދީ ވަނީ، ޑިސްޓްރިކްޓް ލީގަލް ސަރވިސް އޮތޯރިޓީތަކަށް އެމީހުންގެ އަޑުއެހުންތައް އަވަސްކޮށްދިނުމުގެ މަސައްކަތް ކުރެވޭނެކަމަށް ވިދާޅުވެފައެވެ.

މޯދީ ވަނީ، އަޑު އެހުންތައް ވީހާވެސް އަވަހަކަށް ކުރިއަށް ގެންދިއުމަށް ޑިސްޓްރިކްތަކުގެ ގާޒީންނަށް އިލްތިމާސްކުރައްވާފައެވެ.