ﷲ އަށް ވަކީލު ކުރުމަކީ ހަމައެކަނި އެހެން ބުނެ ދެ އަތް އުރާލައިގެން ތިބުމެއް ނޫންކަމަށް ހުކުރު ޚުތުބާގައި ބުނެފިއެވެ.
"ހިޖުރައިގެ ދަރުސްތަކުގެ ތެރެއިން" މި މައުޟޫގެ މައްޗަށް އިއްވި ހުކުރު ޚުތުބާގައި ބުނީ، ކީރިތި ރަސޫލާ މައްކާއިން މަދީނާއަށް ކުރެއްވި ހިޖުރައާމެދު ފުންކޮށް ވިސްނާލަން ޖެހޭ ކަމަށެވެ.
ހިޖުރައަކީ ތިމާގެ އަމިއްލަ ވަޒަން ދޫކޮށް އެހެން ރަށަކަށް ދިއުމަށްވުރެ މާ ފުޅާ މާނައެއް އޮތް ކަމެއްކަން ފާހަގަކޮށް ޚުތުބާގައި ބުނީ، ހިޖުރައިގެ އެންމެ މަތިވެރި މާނައަކީ ނުބައި ކަންކަން ދޫކޮށް ހެޔޮކަމުގެ މަގަށް ރުޖޫއަވުން ކަމަށެވެ.
ޚުތުބާގައި ބުނީ، ހިޖުރައިން ލިބޭ އެންމެ މަތިވެރި އެއް ފިލާވަޅަކީ އިސްލާމް ދީނަށްޓަކައި ތިމާގެ ހުރިހާ ކަމެއް ޤުރުބާން ކުރުމުގެ މަތިވެރި ފިލާވަޅު ކަމަށެވެ.
ހިޖުރައިން ލިބޭ އަނެއް ފިލާވަޅަކީ ކަމެއް ކާމިޔާބު ވުމުގެ އެންމެ މުހިއްމު އެއް ބަޔަކީ އެކަމެއް ފެށުމުގެ ކުރިން ފުރިހަމައަށް ރޭވުމާއި، ކަންކަން ކުރާނެ ފަރާތެއް ކަނޑައަޅައި ފުރިހަމައަށް ހަމަޖައްސާފައި ހުރުންކަންވެސް ޚުތުބާގައި ފާހަގަ ކޮށްފައިވެއެވެ. އެކަން ރަސޫލާ ކުރެއްވި ހިޖުރައިންވެސް ފުރިހަމައަށް ފެނިގެން ގޮސްފައިވާކަމަށް ޚުތުބާގައި ވަނީ ބުނެފައެވެ.
އޭގެ އިތުރުން، ދަތި އުނދަގޫ ވަގުތުގައިވެސް އިމާން ކަމުގެ އަހުލުވެރިން ސާބިތުކަމާއެކު ތިބޭނެކަމުގެ ފިލާވަޅަކީވެސް ޚުތުބާއިން ލިއްބައިދޭ މުހިއްމު ފިލާވަޅެއްކަން ބަޔާންކޮށްފައިވެއެވެ. އެގޮތުން ﷲ އަށް ވަކީލު ކުރުމަކީ ހަމައެކަނި އެހެން ބުނެ ދެ އަތް އުރާލައިގެން ތިބުން ނޫންކަން ފާހަގަކޮށް ޚުތުބާގައި ބުނީ، ވަކީލު ކުރުމަކީ ކަންކަން ކުރުމަށް ހުރި ވަސީލަތްތަކުގެ ބޭނުން ހިފުމާއެކު ﷲ ގެ ހަޟްރަތުން ރައްކާތެރިކަން ލިބޭނެކަން ކަށަވަރު ކުރުން ކަމަށެވެ.
ހިޖުރައިގެ މާނަތަކުގެ ތެރޭގައި ﷲ ގެ މަގަށް ކުރެވޭ ހިތުގެ ހިޖުރަވެސް ހިމެނޭކަމަށް އިލްމުވެރިންނާ ޙަވާލާދީ ޚުތުބާގައި ބުނެފައިވެއެވެ. އެގޮތުން ސިއްރާއި ފާޅުގައި އެކަލާނގެއަށް ހިތް ނިޔަތް ޚާލިސްކުރަން ވަނީ ގޮވާލާފައެވެ.
